Read Sidama_Qullaawa _Maxaafa MAATEWOOSI 15 Bible Online

MAATEWOOSI 15 - Sidama_Qullaawa _Maxaafa bible

MAATEWOOSI 15

¹Hakkunni gedensaanni Yerusaalametenni daggino Farisootinna Muse Seeri rosiisaano Yesuusiwa shiqqe,

²«Rosaanokki albi manni woga mayira diigganno? Anga hayishshidhukkinni sagale ittanno!» yitu.

³Yesuusi qole, «Ki'nena, woga'ne agadhitinara yitine Maganu hajajo mayira diigginanniyya?

⁴Maganu, ‹Annakkinna amakki ayirrisi! Annanna ama xonannohu reyo› yee hajajino.

⁵Ki'ne kayinni, mittu manchi annasinna amasi, ‹Anewiinni afidhinanni ba'raa'ra Maganoho uyi'reemmo› yiiro,

⁶‹Hakku manchi annasi[6] ayirrisa dihasiissannosi› yitinanni. Kunninni, bude'ne kaajjishi'rate yitine Maganu Seera diigginanni.

⁷Ki'ne lawisiisaano, Isayaasi ki'nere,

⁸‹Tini gosa afuunni ayirrissannoe; wodaninsanni kayinni anewiinni faffe no. Magansidhannoehuno woga wonshateeti.

⁹Mannu woganna bude, seeru gede assite rosiissanni, kaphunni magansidhannoe› yee himanino himani halaaleho» yii.

¹⁰Yesuusi manna isiwa woshshe, «Macciishshitine huwatte!

¹¹Manna lageessannohu mannu afiinni fulanno coyeti ikkinnina, afuu giddora eannore di"ikkino» yiinsa.

¹²Hakkunni gedensaanni rosaanosi Yesuusiwa shiqqe, «Konne coyi'ritto coye macciishshite Farisootu so'rantinota afoottoni?» yite xa'mitusi.

¹³Isi kayinni, «Gordu Anni'ya kaasinokki kaashshi baalu buqqisamanno.

¹⁴Insa illiweelte heedhe illiweeloota massaggannoreetina agurre. Illiweelu illiweelo massagiro lamunku balete ubbanno» yiinsa.

¹⁵Pheexiroosi Yesuusa, «Maammaashshu tiro kulinke» yii.

¹⁶Yesuusino, «Ki'ne xaa geeshsha dihuwattinoonni?

¹⁷Afuu giddora eannohu baalu godowa mare hakkaanni hige gobbara fulannota dibuuxxinoonni?

¹⁸Afuunni fulannohu kayinni wodanu giddonni fulanno; manna lageessannohuno hakkonneeti.

¹⁹Hakkuri: busha hedooti, manna shaate, foorrete, baashaawate, moorate, beebba coyi'rate, mannu su'ma hunate; kuri baalu mannu wodani giddonni fulanno.

²⁰Manna lageessannori koreeti ikkinnina hayishshi'noonnikki anganni ita dilageessitanno» yii.

²¹Yesuusi hakkiinni kae, Xiroosinna Sidoonu katamma ha'ri.

²²Hakkiicho mitte Kana"aanitte mancho Yesuusiwa dagge, «Daawiti Beetto Mooticha, beetto'ya bushu ayyaani amadeenna shette noona ballo mararie!» yite huuccidhu.

²³Isi kayinni mittoreno didawarinose. Rosaanosi isiwa shiqqe, «Tini mancho hoodenke hadhanni cancitanni noona ballo ha'risi!» yite huuccitusi.

²⁴Isino, «Ani soqqame dayommohu Israeelete giddonni ge'reewu gede ikke ballehino manniraatilla» yee dawari.

²⁵Mancho kayinni shiqqi yite lekkasira ubbe, «Mooticha ballo, eeggatena kaa'lie» yitu.

²⁶Yesuusi qole, «Oosote sagale haa'ne woshshaho tuga digaraho» yii.

²⁷Ise qolte, «Mooticha, hatti halaaleho; ikkirono woshshuno mootoollesi ittanna uwino giggilo xinqi'rannowe» yitu.

²⁸Hatte yannara Yesuusi, «Tee mancho, amma'nakki jawate; kunni daafira hasi'roottari ikkohe» yiise. Beettoseno hakkawoyintenni hurtu.

²⁹Yesuusi hakkiinni kae Galiilu Baari mulira daye, ilaalu iimira fule ofolli.

³⁰Lowo manni naafoota, illiweeloota, laanshaawoota, danqitinorenna wole dhiwamaanono haa're Yesuusiwa abbe lekkasi mule wori. Isino hursinsa.

³¹Mannuno danqitinori coyidhanna laanshaabbinori hurtanna, naafootu qaaffe hadhanna, illiweelootu la'anna afe dhaggeeffate Israeelete Magano galati.

³²Yesuusi rosaanosi woshshe, «Mannu ane ledo sase barra keeshshino; ittanno sagaleno nookki daafira mararoommonsa. Ha'ranni doogote shaqqe uwannokki gede itikkinni diha'riseemmo» yii.

³³Rosaanosi kayinni, «Hatto ikkina, tenne halallitte gobbara kageeshshi mannira ikkitanno sagale maminni abbinanni?» yitu.

³⁴Yesuusi qole, «Meu timi noo'ne?» yiinsa. Insano, «Lamalu timinna boodu shiimmaaddu qulxu'mi noonke» yitusi.

³⁵Hakkunni gedensaanni, Yesuusi mannu uulla ofollanno gede hajaji.

³⁶Lamalanka timanna qulxu'me haa're, galatu huuccatto assi. Hiiqqaqqe rosaanosira uyi; insano mannaho iillishshu.

³⁷Mannu baalu ite duuwi; rosaano gatino hambaa gamba assite lamala soro kayissu.

³⁸Itino manni meentonna ooso kiirrikkinni shoole kumeeti.

³⁹Yesuusi manna ha'risihu gedensaanni yowolote ofolle Megedooni yinanni gobba ha'ri.