Read Sidama_Qullaawa _Maxaafa MAATEWOOSI 16 Bible Online

MAATEWOOSI 16 - Sidama_Qullaawa _Maxaafa bible

MAATEWOOSI 16

¹Farisootunna Saduqootu Yesuusiwa dagge jiffe la'asira yite, «Gordunni malaate leellishinke» yitu.

²Isi kayinni, [«Hawarro gordu duu'miha affinanni woyite, ‹Foorararaati› yitinanni.

³Soodanno woyite, ‹Techo gordu gomiche kolishshi'rinona xeena gananno› yitinanni. Gordu dana baddine affinanni; diru malaate kayinni baddine afa didandiitinanni.][7]

⁴Bushanna foora ilama malaate la"a hasidhanno; ikkollana Himanaanchu Yoonaasi malaate agurranna wole malaate dileellinshanninsa» yii. Hakkunni gedensaanni insa hakko agure wolewa ha'ri.

⁵Rosaanosi baara widoonni fultu woyite sinqe adhitukkinni habbe hadhino.

⁶Yesuusi rosaanosi, «Wodana asse; Farisootunna Saduqootu gamaancho qorophe!» yiinsa.

⁷Insa kayinni, «Togo yaannonkehu anga sinqe adha hoongoommohuraati» yite mimmitu ledo hasaabbu.

⁸Yesuusi kayinni hedonsa afe, «Ki'ne amma'na xe'ino'neri, ‹Sinqe anga hoongoommohuraati› yitine mayira hasaabbinanni?

⁹Xaa geeshsha dibuuxxinoonni? Ontu timi onte kume manna duushshe gateenna hambaa me"e soro kayissiniro diqaagginanni?

¹⁰Lamalu timi shoolu kumi mannira ikke gateenna hambaa me"e soro wo'ma kayissinirono diqaagginanni?

¹¹Farisootunna Saduqootu gamaancho qorophe yeemmo'neti timu haja ikkitinokkita mayira buuxa hoogginiyya?» yiinsa.

¹²Hakkunni gedensaanni rosaanosi, Yesuusi qorophitanno gede kulinonsahu Farisootunna Saduqootu roso ikkinnina waasu gamaancho ikkinokkita huwattu.

¹³Yesuusi, Filiphoosi Qiisaariyaati yinanniwa dayi yannara rosaanosi, «Mannu Manchi Beetto ayeti yaanno?» yee xa'minsa.

¹⁴Insa qolte, «Mitu, ‹Cuuaancho Yohaannisiiti› yaanno; wolu kayinni, ‹Eeliyaasiiti› yaanno; wolu qole, ‹Ermiyaasiiti, woy Himanaanote giddonni mittichoho› yaanno» yite qoltusi.

¹⁵Yesuusino, «Ki'ne ane ayeti yitinannieyya?» yee xa'minsa.

¹⁶Hatte yannara Simiooni Pheexiroosi qole, «Ati Heeshshote Magani Beetto Kiristoosaati» yii.

¹⁷Yesuusino, «Yoona Beetto Simiooni, ba'raa'rootto! Konne coye gordoho hee'rannohu Anni'ya xawisinohe ikkinnina mannu dikulinohe.

¹⁸Ani kuleemmohena, Pheexiroosi ati kinchoho; kunni kinchi aana Beetekiristaane'ya mi'neemmo. Ise reyote wolqa nafa diqeeltannose.

¹⁹Kuneeti atera gordu gashshooti waalchi fannanniricho eemmohe; uulla usuroottohu gordohono usuraminoha ikkanno. Uulla tiroottohu gordohono tidhaminoha ikkanno» yiisi.

²⁰Hakkunni gedensaanni Yesuusi rosaanosi Isi Kiristoosa ikkinota ayerano kultannokki gede hajajinsa.

²¹Hatte yannanni kayise Yesuusi rosaanosira, «Yerusaalame ha'ra hasiissannoe; hakkiicho geerru, qeesootu roorrootinna Seeru rosiisaano qarra kalaqqannoe; shitannoe. Sayikki barra kayinni kaeemmo» yiinsa.

²²Pheexiroosi Yesuusa bade qacce fushshe, «Mooticha, horontanni di"ikkanno! Kuni coyi atera iilloonkehe!» yee hayi yaate wo'naali.

²³Yesuusi kayinni caaqqi yee Pheexiroosi, «Ati Sheexaanu muli'yanni ho'li! Ati mannunnita ikkinnina Maganunnita hedattokki daafira ati anera gufichoho» yiisi.

²⁴Hakkunni gedensaanni Yesuusi rosaanosi, «Ane hoode ha'ra hasi'rannohu umosi kaado; masiqalasino duqqe hoode'ya dayo!

²⁵Lubbosi gatisi'ra hasi'rannohu baalu hu'nanno; ane daafira yee lubbosi hunannohu kayinni gatisi'ranno.

²⁶Mannu gobba baalate jiro afi're lubbosi hu'niro, ma lexxanno? Woy kayinni lubbosi gatisi'rate maricho aanno?

²⁷Manchi Beetti Annisi ayirrinyinni sokkaasinesi ledo daanno woyite, mittu mittunkura loosisi garinni aanno.

²⁸Halaale kuleemmo'nena, Manchi Beetti Gashshootisi ayirrinyinni daanna la'a geeshsha konniicho uurrite noori giddonni reyitannokkiri no» yii.