Read Sidama_Qullaawa _Maxaafa MAATEWOOSI 18 Bible Online

MAATEWOOSI 18 - Sidama_Qullaawa _Maxaafa bible

MAATEWOOSI 18

¹Hatte yannara rosaanosi Yesuusiwa shiqqe, «Gordu Gashshootira baalanka roorannohu ayeti?» yite xa'mitusi.

²Yesuusi mitto qaaqqo haa're mereeronsa uurrise,

³«Halaale kuleemmo'nena, higa gibbinironna qaaqquullu gedeere ikka hoogginiro, gordu gashshoote horonta die'inanni.

⁴Kunni qaaqqi gede umosi heeshshi assannohu, gordu gashshootira roore ikkanno.

⁵Togoo qaaqqo su'mi'yanni adhannohu aneno adhanno.

⁶«Aye manchino ane amma'nitinori kuri shiimmaaddu giddonni mitto so'risiisannoha ikkiro, lowo daamma haxote usudhe baaru diimera bairo woyyate» yiinsa.

⁷Qoleno, «Manna cubbu giddora eessitanno alamera aanne'e! So'risiisanno coyi dayikkinni digatanno. Ikkollana so'risiisannori daanno gede doogo fanannohura aanne'e!

⁸Kunnira, angakki woy lekkakki cubboho massitannoheha ikkiro murte huni! Lame anga woy lame lekka heedheennahe xo'annokkitera hegere giirara tugamattonkunni, mitte angaha woy mitte lekkaha ikkite hegere heeshshowa ea woyyitannohe.

⁹Illekki cubboho eessitannoheha ikkiro fushshite huni! Lame ille heedheennahe gaannaamete giirara tugamattonkunni, mitte illeha ikkite hegere Gashshootiwa ea woyyitannohe.

¹⁰«Gordoho nooti sokkaasinensa wo'manka woyite Gordoho hee'rannohunniha Anni'ya alba la'anno daafira, kuri shiimmaaddu giddonni mittono mishshinannikki gede qorophe!

¹¹[Manchi Beetti dayinohu bainoha gatisaraati» yii.] [8]

¹²Yesuusi lede, «Hanni ma heddinanni? Mittu manchira xibbu ge'reewi noosi; hakkuri giddonni mitte ba'uro, honsayina honse hakko ilaalu iima agure ba'inota mitticho hasi'rara diha'ranno?

¹³Halaale kuleemmo'nena, afi'ranno yannara bainokkiri honsayina honsentenni roore ba'e leeltino ge'recho daafira hagiidhanno.

¹⁴Gordoho hee'rannohu Anni'neno kuri shiimmaaddu giddonni mittuno ba"ara dihasi'ranno.

¹⁵«Rodiikki sao assihero atinna isi callu heedhinoonniwa saosi kulisi. Macciishshihero galagale rodookki ikkanno gede assattosi.

¹⁶Macciishsha giwihero kayinni, lamu woy sasu manni naqaashshe ikka hasiissanno daafira, lame woy sase manna haadhe isiwa mari.

¹⁷Insa yitinotano macciishsha giwiro, beetekiristaanete kuli. Beetekiristaanennitano macciishshannokkiha ikkiro, ammaninokkihunna qaraxaasinchu gede assite aguri.

¹⁸«Halaale kuleemmo'nena, uulla usurtinannihu gordohono usuraminoha ikkanno. Uulla tirtinannihu gordohono tidhaminoha ikkanno.

¹⁹Qoleno kuleemmo'nehu, ki'ne giddonni lamu uullate aana ayereno sumuu yitine huuccidhiniro, gordoho hee'rannohu Anni'ya wonshanno'ne.

²⁰Lame woy sase ikkitine su'mi'yanni xaaddinanniwa ani ledo'ne hee'reemmo» yiinsa.

²¹Hatte yannara Pheexiroosi Yesuusiwa shiqe, «Mooticha, rodii'ya ane aana sao assiro me"e hige agurosi? Lamala hige agurosini?» yee xa'mi.

²²Yesuusi qole, «Lamala higge lamalaawo ikkinnina lamala higge calla aguri diyeemmohe» yiisi.

²³Kunnira, «Gordu Gashshooti borojjisiwa noo woxe towaxxa hasi'rino moote lawanno.

²⁴Moote woxe towaxxa hanafanno yannara, lowo kume ikkanno birra[9] xeisinoha mitto borojjicho amande abbini.

²⁵Kuni borojjichi asale baaxxa hooginohura isono, galtesino, oososinna noosire baala hirre asalesi baantanni gede mootichisi hajaji.

²⁶Borojjichu kayinni mootete lekkara uwe, ‹Mooticha, baaxxeemmona shiima yanna uue› yee huucci'ri.

²⁷Mooteno marare asalesino agure, ha'ranno gede assisi.

²⁸«Hakku borojjichi kayinni hakkiinni fule ha'ranni hee're, xibbe birra liqiissinoha mitto jaalasi afe qalxe amade, ‹liqiissummohe birra qolie› yii.

²⁹Jaalisino lekkasira uwe, ‹Baaxxeemmona shiima yanna uue› yee huucci'ri.

³⁰Isi kayinni giwe, amade haa're birrasi baata geeshsha usurame keeshshanno gede assi.

³¹Wolootu konne coye macciishshite lowo geeshsha dadillite, baalanka coye marte mootete kultu.

³²Mooteno hakkonne borojjicho woshshe, ‹Ati bushu borojjichi, huucci'roottoe daafira hakkonne baala asale agurummohe.

³³Ani ate asale agurummohente gede atino jaalikkira asale agura dihasiissannohe?› yii.

³⁴Kunnira Moote hanqe asalesi baala baaxxe guda geeshsha, usuru mini roorrootira sayise uyinosi.

³⁵«Ki'neno, mitti mitti'ne rodii'nera wodani'nenni sao agura hoogginiro, gordoho hee'rannohu Anni'ya ki'ne saono diaguranno'ne» yii.