Read Sidama_Qullaawa _Maxaafa MAATEWOOSI 2 Bible Online

MAATEWOOSI 2 - Sidama_Qullaawa _Maxaafa bible

MAATEWOOSI 2

¹Heeroodisi moohe noo yannara, Yesuusi Yihudu gobbara Beetelihemete Katamira ilami. Hatte yannara beeddahe la'anno ayyaanto soojjaatinni ka'e Yerusaalame dagge,

²«Soojjaato beeddakkosi anfe kumbuullammosira dangoommona, ilamihu Ayihudete moote hiikko no?» yite xa'mitu.

³Moote Heeroodisi konne duduwo macciishshe masi; Yerusaalamete manni baaluno isinte gede masi.

⁴Kunni daafira Heeroodisi qeesootu roorroota baalanna Seeru rosiisaano woshshe, Kiristoosi hiikko ilamannoro xa'mi.

⁵Insano, «Himanaanchu borreessinonte gede, Kiristoosi ilamannohu Yihudu gobbara Beetelihemete Katamiraati.

⁶‹Ati Yihudu gobbara noottati Beeteliheme, manna'ya Israeele gashshannohu ate giddonni fulannona, jajjabba Yihudu katammanni horonta diajatta› yinoonni» yitu.

⁷Hakkunni gedensaanni Heeroodisi ayyaanto badheenni qole woshshe beeddakko leeltu yanna xa'me buuxi.

⁸Qoleno, «Hadhine qaaqqu ikkitore seekkitine buuxxe. Affinanni heedhinenni, anino mare kumbuuleemmosina daggine kulle"e!» yee Beeteliheme hadhanno gede assi.

⁹Insano moote yiinore macciishshituhu gedensaanni fulte hadhu. Hatte yannara soojjaato leeltunsa beeddakko qaaqqu noowa iillite uurrita geeshsha albansaanni hadhanni no.

¹⁰Beeddakko affu yannara quwa sa'e lowo geeshsha hagiidhitu.

¹¹Minira e'e qaaqqo amasi Maariyaami ledo nooha affe, guluphite kumbuultusi. Hakkunni gedensaanni ogorransa fante culka, hixaananna kaarbe afansha assite uyitusi.

¹²Galagalte Heeroodisiwa martannokki gede Maganu haaqeete qorophisiiseennansa, wole doogo higge gobbansa hadhu.

¹³Beeddahe la'anno ayyaanto hadhuhu gedensaanni, Mootichu sokkaasinchi Yooseefiwa haaqeete daye, «Heeroodisi qaaqqo shaara hasi'ranni noona, ka'e amate ledo haadhe Gibitse xooqi! Kulammohe geeshsha hakko keeshshi!» yiisi.

¹⁴Yooseefino hashsha kae qaaqqonna ama haa're Gibitsete gobba ha'ri.

¹⁵Heeroodisi reya geeshsha hakko keeshshino. Kuni ikkinohu, Mootichu himanaanchu widoonni, «Beetto'ya Gibitsetenni woshshoommo» yee coyi'rino qaali wo'manno gedeeti.

¹⁶Heeroodisi soojjaatinni daggino ayyaanto dogginosita afe lowo geeshsha hanqi. Beetelihemetenna qooxeessisera noore labbaa qaaqquulle lamu dirirenna lamu diri kawire baala shiishiishe gudi. Hatto assinohu ayyaanto kultinosi yanna hedeeti.

¹⁷Kunni garinni himanaanchu Ermiyaasi,

¹⁸«Raama wi'lanna didatto macciishshini; Raheeli oososera wi'litu; oosose lubbotenni nookki daafira, sheshifata hooggu» yee himanino himani wo'mi.

¹⁹Heeroodisi reyihu gedensaanni, Mootichu sokkaasinchi Gibitsete gobbara noohuwa Yooseefiwa haaqeete mare,

²⁰«Qaaqqo shitara hassannori reyitinona ka'e, qaaqqonna amasi haadhe Israeelete gobba ha'ri!» yiisi.

²¹Yooseefino kae qaaqqo amate ledo haa're Israeelete gobba higi.

²²Ikkollana Heeroodisi reenna isi darga beettisi Arkeloosi Yihudu gobbara moohe noota macciishshe, hakkiira ha'ra waajji. Kunnira haaqeete biddishsha uyineennasi Galiilu gobba ha'ri.

²³Iso, «Naaziretichaho yinanni» yine himannoonni himani wo'manno gede mare Naaziretete Katamira hee'ri.