Read Sidama_Qullaawa _Maxaafa MAATEWOOSI 21 Bible Online

MAATEWOOSI 21 - Sidama_Qullaawa _Maxaafa bible

MAATEWOOSI 21

¹Yesuusinna rosaanosi Yerusaalame iilla rakke, Beetefaagenna Biitaaniyu widoonni higge Ejedhete Ilaaliwa martuta, Yesuusi rosaanosi giddonni lame,

²«Alba'neenni noo qacha marre! Hakkiicho mitte harricho ilmattichote ledo usurante noota affinannina tirtine abbe"e.

³Coyishshiishanno'nehu hee'riro, ‹Mootichu hasi'ranno daafiraati› yiiyye. Harreno hakkawoyintenni agurannona» yiinsa.

⁴Kuni ikkannohu himanaanchu,

⁵«Tsiyooni Katamira, ‹Kuneeti Mootekki jooge, harrichonna ilmatticho gulufe, atewa daanno› yitine kullese!» yee borreessino himani wo'manno gedeeti.

⁶Rosaanosino hadhe Yesuusi hajajinonsa gede assitu.

⁷Harrichono ilmattichonte ledo haadhe abbitusi; uddannansano harrete badhe aana worteenna Yesuusi gulufi.

⁸Lowo manni uddannansa doogote kari. Gamu kayinni daraame sinna hiiqqaqqe kari.

⁹Albasiinninna badhesiinni ha'ranni noo manni, «Hosaina! Daawiti Beettira galata ikko; Mootichu su'minni daannohu maassaminoho! Hosaina! Galatu Gordoho hee'rannohura Maganoho ikko!» yaanni qeexaa'li.

¹⁰Yesuusi Yerusaalame ei yannara katamu manni baalu, «Kuni ayeti?» yee shoondari.

¹¹Mannuno, «Kuni Galiilu gobbanni Naaziretete Kataminni dayino himanaancho Yesuusaati» yii.

¹²Hakkunni gedensaanni Yesuusi Qullaawu Minira e"e, hakkiicho hirtanninna hidhitanni noore fushshe shorri. Woxe soorridhannori xarapheeyyenna lemboola hirtannori barcimma galchi.

¹³«‹Mine'ya huuccattote mineeti yinanni› yine borreessinoonni. Ki'ne kayinni mulqidhannori maaxantanno goda assitinoonni» yiinsa.

¹⁴Yesuusi Qullaawa Mine hee're illiweelootunna naafootu isiwa daggeenna hursinsa.

¹⁵Qeesootu roorrootinna Seeru rosiisaano kayinni, Yesuusi assino dhagge la'inohuranna qaaqquulluno Qullaawa Mine, «Hosaina, Daawiti Beettira galatu ikko!» yite godo'litanna macciishshitino daafira hanqitu.

¹⁶Yesuusa, «Kuni qaaqquullu yaannore macciishshatto?» yitu. Isi qole, «Ee, ‹Oosotenna danquullu afiira galata qixxeessootto› yaannoha horontanni dinabbabbinoonni?» yiinsa.

¹⁷Insa agure katamunni fule Biitaaniya ha're hakko gali.

¹⁸Yesuusi soodo guto galagale katama higanni hee're hudi'ri.

¹⁹Mitte balasete haqqicho doogote gama afe shiqqi yee mari; ikkollana darote ka'a aanase mittoreno diafino. Kunnira, «Kunni ka'a ate aana gumu hee'roonke!» yii. Haqqichono hakkawoyintenni mooltu.

²⁰Rosaanosi konne coye la'e, «Tini balase hiikkite anga aana mooltu?» yite maala'litu.

²¹Yesuusi, «Halaale kuleemmo'nena, amma'na heedhu'neronna huluullama hoogginiro balase ikkitu gede assa calla ikkikkinni konne ilaala, ‹Kawiinni ka'e marte baaru giddo uwi!› yitiniro nafa ikkanno'ne.

²²Amma'nitine huuccidhinannire baala afidhinanni» yee qolinsa.

²³Yesuusi Qullaawu Minira e"e rosiisanni hee'reenna qeesootu roorrootinna gobbate geerri isiwa shiqqe, «Konne coye assattohu mayi roorreenniiti? Woy kayinni togoo coye assate roorre uyinohehu ayeti?» yite xa'mitusi.

²⁴Yesuusi, «Anino mitto coye xa'meemmo'ne; xa'meemmo'nere qoltiniehu gedensaanni konne coye mayi roorrenni asseemmoro kuleemmo'ne.

²⁵Yohaannisi cuua hiikkiinniiti? Maganunnitenso mannunnite?» yiinsa. Insa insanaawa, « ‹Maganunnite› yinummoro, ‹Ammana mayira hoogginiyya?› yaannonke.

²⁶‹Mannunnite› yinummoro, mannu baalu Yohaannisi himanaanchoho yee noo daafira waajjineemmo» yitu.

²⁷Kunnira, «Ninke dianfoommo» yite dawartusi. Isino, «Hattootiro, anino konne coye mayi roorrenni asseemmoro dikuleemmo'ne» yiinsa.

²⁸Yesuusi lede, «Hanni ma heddinanni? Mittu manchira lame ooso noosi. Mitticho woshshe, ‹Beetto'ya, techo woyinete kaashshi'ya darga marte loosi!› yiisi.

²⁹Beettuno, ‹Giwummo diha'reemmo› yii. Gedensaanni kayinni gaabbe ha're loosino.

³⁰Annu layinki beettisiwano mare loosanno gede hajaji. Beettuno, ‹Maahoyye, anna'ya ha'reemmo› yii. Ikkollana loosoho ha'rikkinni gatino.

³¹«Lamunku giddo annu hedo wonshinohu hiikkonneeti?» yiinsa. Insano, «Balaxe soyiho» yitu. Yesuusino, «Halaale kuleemmo'nena, qaraxaasinenna foortannori Gordu Gashshoote ea balaxxanno'ne.

³²Cuuaanchu Yohaannisi keeraanchimmate doogo leellisha'nera dayinota diammantinoonni. Qaraxaasinenna foortannori kayinni ammantinosi. Konne la'ine nafa aagintaabbine higgine diammantinoonnisi» yiinsa.

³³Yesuusi lede, «Wole lawishshano macciishshe; woyinete kaashsho kaasi'rinohu mittu manchi no. Woyinete kaashshono gaangeesse huxxi. Woyine huuncinanni baleno ume qixxeessi; woyine agarrannita seeda shaeno kinchunni seekki. Hakkunni gedensaanni gatesi loossannorira guto ee, wole gobba ha'ri.

³⁴Laalo gamba assinanni yanna iillituta, beehachosi abbitannosi gede soqqamaanosi gutanyootunniwa soyi.

³⁵Gutanyootu kayinni soqqamaanosi amadde mitto gantu; mitto shitu; wole qolte kinnatenni awwaaltu.

³⁶Woyinete kaashshi anni xaano kiiro albirinni roore soqqamaano soyi. Gutanyootu insano albire assitunte gede assitu.

³⁷Goofimarchoho woyinete kaashshi anni, ‹Beetto'ya ayirrissanno› yee fushshe gutanyootunniwa soyi.

³⁸Gutanyootu kayinni beetto affu yannara, ‹Kuni ragi'rannohona, amme shinona; iqqasino ninke ragi'neemmo› yitu.

³⁹Beettono amadde woyinete kaashshi giddonni fushshite gobbaanni shitu.

⁴⁰«Maahoyyena, woyinete kaashshi anni daanno yannara kore gutanyoota ma assannoha lawanno'ne?» yiinsa.

⁴¹Insano, «Kuri bushuullunnita geedonsa hunanno. Woyinete Kaashshi dargano loossinoha yanna yannantenni uyitanno gutanyootira gutisanno» yitu.

⁴²Yesuusi aanche, «Qullaawa Maxaaffara, ‹Mine mintannori mishshe agurtino kinchi, wo'munkura umo ikki. Konne coye assinohu Mootichaho; ninke illerano maalalete› yine borreessinoonniha horonta dinabbabbinoonni?

⁴³«Ani kuleemmo'nena, Maganu Gashshoote ki'newiinni haa'ne guma laalanno mannira uyinanni.

⁴⁴Kunni kinchi aana uwannohu hiiqqamanno; kinchu aanaho uwannosi manchi kayinni cancanamanno» yiinsa.

⁴⁵Qeesootu roorrootinna Farisootu tenne masalo macciishshite, Yesuusi insa daafira coyi'ranni noota huwattu.

⁴⁶Kunnira iso amada hasidhe, kayinnilla mannu himanaanchu gede asse la"annosi daafira waajjitu.