Read Sidama_Qullaawa _Maxaafa MAATEWOOSI 22 Bible Online

MAATEWOOSI 22 - Sidama_Qullaawa _Maxaafa bible

MAATEWOOSI 22

¹Yesuusi lede masalsanni,

²«Gordu Gashshooti beettisira seenne haa'rara jila jilino moote lawanno.

³Moote woshshinoonni manni jilaho daanno gede qaagiissitara soqqamaanosi insawa soyi. Mannu kayinni jilasi daa dihasi'rino.

⁴«Moote xaano wole soqqamaano, ‹Woshshini manniwa martine, kuneeti oosote seenne haa'ranni jila ji'loommo. Handanna hardino lalo gorroommo; baalunkuri qixxaawino; kunnira jilaho amme!› yiino yitine kulle.

⁵Woshshini manni kayinni yinoonnire lashshi asse, mitu gatesi loosi'rara, mitu daddalisira ha'ri.

⁶Wolootu qolte soqqamaano gante shollishshe shitu.

⁷Hatte yannara moote hanqe olantosi soyenna, hakkore shiture shite katamansano giirtu.

⁸Hakkunni gedensaanni soqqamaanosira, ‹Kuneeti jilu qixxaawino; woshshinoonniri kayinni jilu dimalinonsareeti.

⁹Kunnira, doogga martine affini manna baala jilaho woshshe› yiinsa.

¹⁰Soqqamaanono doogga marte affu manna baala danchano bushano gamba assitu. Kunni garinni mannu jilu hara wo'mi.

¹¹«Moote jilaho dayino manna la"ara haru giddora eanno woyite kayinni, jilu uddano uddi'rinokkiha mitto mancho afe,

¹²‹Jaala'ya, jilu uddano uddi'rittokkinni kawiira hiitto ikkite eitto?› yii. Manchu kayinni mittoreno didawarino.

¹³Moote soqqamaanosira, ‹Anganna lekka usurtine gobba tunsichoho fushshitine tugge; hakkiicho wi'lanna suume ita agartannosi› yiino» yii.

¹⁴Yesuusi lede, «Kunnira, woshshantinori batinyeho; dooraminohu kayinni shiima mannaati» yii.

¹⁵Hakkunni gedensaanni, Farisootu hadhe Yesuusa coyinni woshshaaddanno gara ma'litu.

¹⁶Rosaanonsa Heeroodisi manni ledo Yesuusiwa sokke, «Rosiisaancho, ati halaalaancho ikkoottotanna Maganu doogo halaalunni rosiisattota egenninoommo. Manna waajjite assatto coyi dino; mannahono godowa dihosatto» yituhu gedensaanni,

¹⁷«Hanni kulinke; jawu Roomu Mootera Qeesaarira giwire aa seerahonso seerimalete?» yite xa'mitusi.

¹⁸Yesuusi kayinni bunshensa afe, «Ki'ne lawisiisaano, mayira fonqoltinannie?

¹⁹Hanni giwireho uyinanni woxe leellishshe"e!» yiinsa. Insano mitte saante abbite leellishshusi.

²⁰Isi qole, «Tenne saante aana noo misile ayete? Aanaho borreessinoonni su'mino ayeho?» yee xa'minsa.

²¹Insano, «Jawu Roomu Mooteho!» yitu. Yesuusi qole, «Hakkawoyiteetiro, Qeesaariha Qeesaarira, Maganunniha Maganoho uuyye!» yiinsa.

²²Insano macciishshituhu gedensaanni, coyi'rinore maala'lite iso agurte hadhu.

²³Hakko barranni, «Reyotenni ka"a dino» yitannori Seduqootu Yesuusiwa dagge,

²⁴«Rosiisaancho! Muse, ‹Mittu manchi galte adhe ooso ilikkinni reyiro, rodiisi galtesi ragi're sircho sayisosi› yiino.

²⁵Ninkewa lamalu roduuwi no. Wo'munkura bayiru galte adhe ooso ilikkinni reyino. Kunnira maa'nu rodiisi galtesi ragi'rino.

²⁶Layinkihuno, sayikkihuno, lamalkihu geeshsha aante aantetenni adhite sircho sa'ukkinni reyitino.

²⁷Insa baalunku gedensaanni manchono reyitino.

²⁸Lamalunku adhitinose daafira, reyitinori ka'anno waro, ise hiikkunni galte ikkitanno?» yite xa'mitu.

²⁹Yesuusi qole, «Ki'ne Qullaawa Borronna Maganu wolqa afa hoogginoonnihura sodhinanni.

³⁰Reyitinori ka'anno waro, mannu gordoho sokkaasinete gedeeha ikkanno ikkinnina diadhanno; diadhamanno.

³¹Maganu kulino'nere reyotenni ka"annire dinabbabbinoonni?

³²Isi, ‹Ani Abirihaami Maganooti; Yisihaaqi Maganooti; Yaiqoobi Maganooti› yiino. Kunnira Maganu, heedhannori Maganooti ikkinnina reyitinori Magano di"ikkino» yee qolinsa.

³³Mannuno konne coye macciishshe rosiishshisinni lowo geeshsha dhaggeeffati.

³⁴Yesuusi, Seduqoota sammi assinota macciishshite Farisootu mittowa gamba yitu.

³⁵Insa giddonni mittu Muse Seeri rosiisaanchi Yesuusa jife la"ara hasi're,

³⁶«Rosiisaancho! Baalanta roortino hajajo hiittenneeti?» yee xa'mi.

³⁷Yesuusino, «‹Mooticha Maganokki wo'mu wodanikkinni, wo'ma lubbokkinni, wo'ma hedokkinni baxi!› yitannote.

³⁸Baalanta roortannotinna umi hajajo tenneeti.

³⁹Tenne labbannoti layinki hajajo, ‹Olliichokki umikki gede assite baxi!› yitannote.

⁴⁰Seerunna himanaanote rosiishshi baalu xintaminohu tenne lamente hajajo aanaati» yiisi.

⁴¹Farisootu gamba yite heedheenna Yesuusi,

⁴²«Kiristoosire ma yitinanni? Isi aye beetto lawanno'ne?» yee xa'minsa. Insano, «Daawiti Beettooti» yite qoltusi.

⁴³Yesuusi qole, «Hatto ikkiro Daawiti Qullaawu Ayyaani kulannasi coyi'ri yannara hiitto ikke, ‹Mooticha› yee woshshisiyya?

⁴⁴Daawiti, ‹Kaaliiqi Mootichi'yara, baarigaarrakki lekkakkira woroonni qolammo geeshsha, qiniite'yaanni ofolli!› yiinona.

⁴⁵Daawiti umisi, ‹Mooticha› yee woshshina, Kiristoosi hiitto ikke isi beetto ikkannoyya?» yee xa'mi.

⁴⁶Isira mittoreno dawara dandiinohu dino. Hakko barrinni kayise iso ugge xa'mo xa'minosihu dino.