Read Sidama_Qullaawa _Maxaafa MAATEWOOSI 23 Bible Online

MAATEWOOSI 23 - Sidama_Qullaawa _Maxaafa bible

MAATEWOOSI 23

¹Hakkunni gedensaanni Yesuusi mannahonna rosaanosira,

²«Seeru rosiisaanonna Farisootu rosiissara Muse darga ofoltino.

³Kunni daafira, insa yitanno'nere baala asse; agadhe. Coyidhannore diwonshitannoreetina, insa assitannore kayinni assitinoonte.

⁴Mannaho qarrisannohanna lowo duha usurte duhisiissanno. Insa kayinni qubbichinsanni nafa kisa dihasidhanno.

⁵Assitannore baala mannu la"ansara yite assitanno. Quraama gowisiisidhanno; huuccattote uddanonsa handaara seedisidhanno.

⁶Jilu mine ayirrinyu darga, xaadu mine umi barcimira ofolla baxxanno.

⁷Gudumaaleho mannu baalu keere haa'ransaranna, ‹Rosiisaancho› yee woshshansara hasidhanno.

⁸Ki'ne kayinni rosiisaanchi'ne mitto calla ikkinohuranna ki'neno roduuwa ikkitinoonni daafira, ‹Rosiisaancho› yine woshshinoonke'ne.

⁹Gordoho mittu Anni callu noo'ne daafira baattote aana mittono, ‹Annanke› yitine woshshitinoonte.

¹⁰Rosiisaanchi'ne Kiristoosa calla ikkino daafira, ‹Rosiisaancho› yine woshshinoonke'ne.

¹¹Ki'ne giddo rooriidiha ikka hasi'rannohu, soqqamaancho'ne ikko.

¹²Umosi gotti assannohu shollanno; umosi heeshshi assannohu kayinni ayirranno» yiinsa.

¹³Qoleno, «Mannu Gordu Gashshoote eannokki gede waalcho cuffinanniri lawisiisaano, Seeru rosiisaanonna Farisootu, ki'nera aanne'e! Ki'ne die'inanni; ea hasidhannoreno e'annokki gede assitinanni.

¹⁴[«Mannu la"a'nera yitine huuccatto seedissinanni gunnootu mine mulqitinanni; ki'ne lawisiisaano, Seeru rosiisaanonna Farisootu, ki'nera aanne'e! Kunni daafira ki'nera busha yoo yinanni'ne.][10].

¹⁵«Ki'ne lawisiisaano, Seeru rosiisaanonna Farisootu, ki'nera aanne'e! Mitto mancho ki'ne amma'no widira qo'late baarunna baattote aana doyitinanni. Qo'litinihu gedensaanni, ki'nenni roore erote erotera gaannaamete giirara qixxaawinoha assitinanni.

¹⁶«Ki'ne illiweeltinoonni massagaano, ki'nera aanne'e! ‹Mannu Qullaawu Mininni xaariro ikkannori dino› yitinanni. ‹Qullaawa Mine noo culkinni xaariro kayinni, xaarino xaaro amaddannosi› yitinanni.

¹⁷Ki'ne illiweeltinoonni hawanyooti, ‹Culkunna culka qullaawa assanno Mini Qullaawu woyite rooru hiikkoonneeti?›

¹⁸Qoleno, ‹Mannu kakkallanni darginni xaariro ikkannori dino. Kakkalote darga noo fushshaatinni xaariro xaaro amaddannosi› yitinanni.

¹⁹Ki'ne illiweeloota, fushshaatunna fushshaate qullaawa assannohu kakkalote dargi woyite rooru hiikkoonneeti?

²⁰Kunnira, kakkalote darginni xaarinohu, kakkalote darginninna kakkalote worroonniri baalunni xaaranno.

²¹Qullaawu Mininni xaarinohu, Qullaawu Mininninna Qullaawu Mini giddo noori baalunni xaaranno.

²²Gordunni xaarannohu, Maganunnihu ayirrinyu barciminninna isi aana ofolle noohunni xaaranno.

²³«Ki'ne lawisiisaano, Seeru rosiisaanonna Farisootu, ki'nera aanne'e! Afuduudunniha, sunkurtunnihanna qimamenniha tonnunni mitto uyitinanni. Seeru giddo nooha qara qara coye kayinni facci assitine agurtinanni. Hattino taashshate, maarotenna ammanamate. Hakkoreno agurtinikkinni koreno wonsha hasiissanno'nehu gatino.

²⁴Ki'ne illiweeltinoonni massagaano, bookkicho ximbiiphitine, gaala egemmitinanni.

²⁵«Kine lawisiisaano, Seeru rosiisaanonna Farisootu, ki'nera aanne'e! Finiinchonna xilte iimiido seekkitine biifissinanni; giddo'ne kayinni xagarronna ufunimma wo'mitino.

²⁶Ati illiweelu Farisichi, balaxxe finiinchonna xilte giddoyido biifisi. Hatto assittoro gobbayidino biifinoha ikkanno.

²⁷«Kine lawisiisaano, Seeru rosiisaanonna Farisootu, ki'nera aanne'e! Giddo reyino manni miqqanna bowanye wo'mite heedheenna, gobbayido kayinni sorsa buurre biifinsoonni moogga labbinanni.

²⁸Hattonni gobbayido'ne mannaho keeraano labbinanni. Giddo'ne kayinni awaawurshunna bunshe wo'mitino.

²⁹«Ki'ne lawisiisaano, Seeru rosiisaanonna Farisootu, ki'nera aanne'e! Himanaanote moogga seekkitinanni; keeraanote moogga aaniido borreessitine biifissinanni.

³⁰‹Alba annuwanke yannara hee'noommoro, himanaanote mundee dunate insa ledo dikarsammeemmo› yitinanni.

³¹Himanaano shituri ooso ikka'ne ki'ne umi'ne farcidhinoonni.

³²Kunnira, annuwa'ne hanaffinoha ki'ne wonshe!

³³Ki'ne hamasu! Buutete ooso gaannaamete qorichiwiinni hiitto ikkitine gattina ikka?

³⁴Kuneeti ani himanaano, egennaammanna rosiisaano ki'newa soyemmo. Insa giddonni mito mito shitinanni; mito suttinanni; mito xaadu mini giddo gantinanni katamunni katama shorritinanni.

³⁵Kunninni kainohunni, baattote aana du'nantinoti keeraanchu Aabeeli mundeenni kayisse Qullaawu Mininna kakkalote dargi mereero shitinoonnihu Barakiyi beetti Zakkaariyaasite geeshsha duntiniti keeraanote mundee yitanno'ne.

³⁶Halaale kuleemmo'nena, kuni qorichi baalu tenne ilama aana daanno» yiinsa.

³⁷Yesuusi qole, «Yerusaalame, Yerusaalame! Ati himanaano shaattati! Atewa sonkoonnire kinnatenni awwaalattati! Lukkicho caacurrese qoolise giddo gamba assidhannonte gede, anino oosokki mitteenni gamba assammora me"e hige hede hoogummo! Ki'ne kayinni dihasidhinoonni.

³⁸Xa kuneeti, mini'ne ona ikke gatanno.

³⁹Kuleemmo'nena, ‹Mootichu su'minni daannohu maassaminoho› yitina geeshsha, kunni ka'a diaffinannie» yiinsa.