Read Sidama_Qullaawa _Maxaafa MAATEWOOSI 24 Bible Online

MAATEWOOSI 24 - Sidama_Qullaawa _Maxaafa bible

MAATEWOOSI 24

¹Yesuusi Qullaawu Mininni fule ha'ranni hee'reenna rosaanosi Qullaawu Mini gara kultasira isiwa shiqqu.

²Isi kayinni, «Konne baala la'inanni? Halaale kuleemmo'nena, kinchu kinchu aana duunamino gedeenni diigamikkinni digatanno» yiinsa.

³Yesuusi Ejedhete Ilaali aana ofolle hee'reenna rosaanosi calluwinsa isiwa shiqqi yite, «Kuni coyi ikkannohu mamarooti? Ate daaranna diru goofimarchira malaatu maati?» yite xa'mitusi.

⁴Yesuusi qole, «Ayino so'risiisanno'nekki gede qorophe!

⁵Lowo manni, ‹Ani Kiristoosaati› yaanni su'mi'yanni daanno. Lowo mannano so'risiisanno.

⁶Olu luulonna olu duduwo macciishshitinanni; kuni ikkikkinni gatannokkihona massinoonte. Goofimarchu kayinni albillittete.

⁷Gosa gosate aana, gashshootu gashshootu aana ola kayisanno. Addi addi darga hudenna baattote huxano ikkanno.

⁸Kuni coyi ilate game gede qarraho hanafo ikkanno.

⁹«Hatte yannara qarraho sayisse uyitanno'ne; shitanno'ne; su'mi'ya daafira yitineenna mannu baalu giwanno'ne.

¹⁰Hatte yannara lowo manni ammana agure gufi'ranno. Ku'u ko'onne sayise aanno; mannu isi isiniiwa giwamanno.

¹¹Batinye kaphu himanaano ka'anno; lowo mannano so'risiissanno.

¹²Bunshete batinyinni kainohunni lowo manni baxilli qiidanno.

¹³Goofimarchu geeshsha cince kaajjannohu kayinni gatanno.

¹⁴Gosa baalate naqaashshe ikkanno gede kuni Maganu Gashshootihu Danchu Duduwi gobba baalate kulamanno; hatte yannara goofimarchu daanno» yee qolinsa.

¹⁵Yesuusi lede, «Himanaanchu Daanieeli coyi'rinonte gede, baote batte qullaawa darga uurrite noota affinanni woyite, nabbawannohu wodancho.

¹⁶Hatte yannara Yihudu gobbara noori ilaallate widira higge xooqqo.

¹⁷Minu iima noohu minisi giddonni mitore adhara dirroonke.

¹⁸Gate loosu giddo noohu uddanosi adhara wirri yee badhera higoonke.

¹⁹Hatte yannara godowinni nooriranna qansanni noorira aanne'e!

²⁰Kuni darti hawado woy Fooliishshote Barra ikkanno'nekki gede huuccidhe!

²¹Hatte yannara kalaqamunni kayise xaa geeshsha ikke egenninokkihu gedensaannino ikkannokkihu lowo qarri daanno.

²²Hatte barruwa hara'ma hooggeemmero, mittu manchino gata didandaanno. Dooramino manni daafira yineenna hatte barruwa hara'mitanno.

²³«Hatte yannara aye manchino, ‹Kuneeti, Kiristoosi konne no› woy kayinni, ‹Kuu"uneeti, koo"o no› yeenna'ne ammantinoonte.

²⁴Kaphaano kiristoosootinna kaphaano himanaano dagganno. Insa dandiitoommero Maganoho doorantinore nafa so'risiissara lowo dhaggenna maalale leellishshanno.

²⁵Kune konne coye umo asse kuloommo'ne.

²⁶Kunnira, ‹Kuneeti, halalla no!› yineenna'ne fultinoonte. ‹Kuneeti, holge no!› yineenna'ne ammantinoonte.

²⁷Banqo gordu iima beleqqanno woyite soojjaatinni galchimi geeshsha xawissannonte gede, Manchi Beetti daano hattoota ikkitanno.

²⁸Reeshshu noowa doowiru gamba yaanno» yiinsa.

²⁹Yesuusi lede, «Hattenne qarru barrubba gedensaanni hakkawoyintenni, arrishsho tunsitanno; aganuno dixawanno. Beeddahe gordunni giggiltanno; gordu wolqubbano shafantanno.

³⁰«Hakkunni gedensaanni Manchi Beettihu daasi malaati gordoho leellanno. Hatte yannara gobbate aana noo manni baalu wi'lanno. Manchi Beettino wolqatenninna lowo ayirrinyinni gomichu aana daanna la"anno.

³¹Xurumba lowo geeshsha luushshitanno sokkaasine soyanno; insano shoolenka raga hadhe, gordunna gobbate qaccenni Maganu doodhinore gamba assitanno» yii.

³²Yesuusi, «Konne coye balasetenni rosse. Sinnase ciirtannonna darose lattanno woyite, badheessu rahinota affinanni.

³³Ki'neno konne coye baala la'inanni woyite, Manchi Beetti daanno yanna gamba yitinota affe.

³⁴Halaale kuleemmo'nena, kuni baalu ikka geeshsha tini ilama disa'anno.

³⁵Gordunna baatto sa'anno; qaali'ya kayinni disa"anno» yii.

³⁶Yesuusi lede, «Hakkonne barranna hattenne saate Maganu Annu ka'a, gordu sokkaasineno ikkito, Beettono ikko, afinohu dino.

³⁷Nohi yannara ikkinte gede, Manchi Beetti daanno yannano hattoota ikkitanno.

³⁸Hakka waro baote wayi daara albaanni Nohi markaawe ei barri geeshsha, mannu itanninna aganni, adhanninna adhamanni no.

³⁹Baote wayi daye baalanka fee haa're ha'ra geeshsha diaffino. Manchi Beetti daanno yannano hattoota ikkitanno.

⁴⁰Hatte yannara lamu manni mitteenni gate looso loosidhanno. Mitto haa'neenna mittu hakko gatanno.

⁴¹Lamu meenti mitteenni daammaho daaqqanno; mitte haa'neenna mitte hakko gattanno.

⁴²Kunnira, Mootichu ma barra daannoro affinoonnikki daafira, feeffattine agadhe.

⁴³Konne coye kayinni wodana asse; minu anni mooraanchu hashsha daanno yanna bade afoommero, baqqi yee agadhanno. Minisi umamarano wore diaguranno.

⁴⁴Manchi Beettino heddinoonnikki saatera daanno daafira qixxaabbine heedhe» yiinsa.

⁴⁵Yesuusi lede, «Minisi mannira sagale yannatenni aannohu, Mootichu minisira doodhinohu ammanaminohunna egennaamu soqqamaanchi ayeti?

⁴⁶Mootichisi daanno yannara, hatto assanni hee'reenna afannosi soqqamaanchi ba'raa'rinoho.

⁴⁷Halaale kuleemmo'nena, hakkonne soqqamaancho Mootichu jajjisi baalu aana shoomannosi.

⁴⁸Hakku bushu soqqamaanchi kayinni, ‹Mootichi'ya xa didaanno; keeshshanno› yee hedironna,

⁴⁹ledosi soqqamaano gana hanafiro, dimbaasinete ledo itironna agiro,

⁵⁰hakko soqqamaanchi Mootichi hedinokki barranna agadhinokki saatera daannosi.

⁵¹Hakkonne busha soqqamaancho Mootichisi qorichishannosi; gawalosino lawisiisaanote ledota ikkitanno gede assanno. Hakkiicho wi'lanna suume ita agartannosi» yiinsa.