Read Sidama_Qullaawa _Maxaafa MAATEWOOSI 26 Bible Online

MAATEWOOSI 26 - Sidama_Qullaawa _Maxaafa bible

MAATEWOOSI 26

¹Yesuusi konne coye baala rosiisihu gedensaanni rosaanosira,

²«Lamu barri gedensaanni Agure Sa"ate Ayyaana ayyirrinsannita affinoonni. Manchi Beettono sutamate sayisse uyitanno» yiinsa.

³Qeesootu roorrootinna geerru Qeesootu Roorrichi Qeyaafa yinannihu nafara gamba yitu.

⁴Hakkiicho Yesuusa amadde shitanno doogo ma'litu.

⁵Ikkollana, «Mannu gibbo kayisanno» yite waajjitino daafira, «Ayyaanunni dikinseemmo» yitu.

⁶Yesuusi Biitaaniyaho taraawannoha gogu dhibba afi'rino manchi Simiooni mine sagalete ofolle hee'reenna,

⁷mitticho mancho lowo woxinni hirrannita naardoosi yinanni shitto, albasxiroosi yinanni kinchinni seekkinoonni gujuujjera haadhe dagge, Yesuusi umi aana duntu.

⁸Rosaanosi konne coye la'e hanqite, «Tenne shitto mulla mayira hunnanni?

⁹Woleteemmero, tenne shitto lowo woxira hirre, woxe buxanete uyinannihu baino!» yitu.

¹⁰Yesuusi yitino coye macciishshe, «Tenne mancho mayira qarrissinannise? Ise anera dancha coye assitino.

¹¹Buxane wo'manka woyite ki'ne ledo noona, ani kayinni wo'manka woyite ki'ne ledo dihee'reemmo.

¹²Ise tenne shitto umi'ya aana dunatenni, ane waammate qixxeessitanni nooe.

¹³Halaale yeemmo'nena, gobba baalate konne Dancha Duduwo dudumbanniwa baala, ise qaaggora kuni assitinori kullanna hee'ranno» yiinsa.

¹⁴Hatte yannara, tonaa lame rosaanosi giddonni mittu Asiqorootichu Yihudi, qeesootu roorrootiwa mare,

¹⁵«Yesuusa sayise uummo'nero ma uyitinannie?» yii. Insano sajjoo kinchu birra uyitusi.

¹⁶Isi hatte saatenni kayise Yesuusa sayise aate, injo hasi'ranni keeshshi.

¹⁷Timu Ayyaanira umi barra, rosaanosi Yesuusiwa shiqqi yite, «Agure Sa"ate Ayyaaniha hashshi hurbaate hiikkiicho qixxeessinummohero woyyate?» yite xa'mitusi.

¹⁸Isino, «Katama e'inanni yannara balaxxine affinanni manchi minira martine minu anna, ‹Rosiisaanchu yanna iillitinona rosaano'ya ledo Agure Sa"ate Ayyaaniha hashshi hurbaate iteemmo mini hiikkiichooti?› yiino yiiyye» yiinsa.

¹⁹Rosaanosi Yesuusi yiinonsante gede, Agure Sa"ate Ayyaaniha hashshi hurbaate hakkiicho qixxeessitu.

²⁰Yesuusi hawarrita tonaa lamunku rosaanosi ledo hurbaate itara ofolli.

²¹Hurbaate ittanni heedheenna Yesuusi, «Halaale kuleemmo'nena, ki'ne giddonni mittu ane sayise aannoe» yii.

²²Rosaanosi kunni coyira lowo geeshsha dadillite mittu mittunku Mooticha, «Aneeti ikka?» yitu.

²³Yesuusi qole, «Sayise aannoehu, ane ledo xilteho anga wore tima qasi'ranni nooho.

²⁴Manchi Beetti alba yine borreessinoonni garinni reyanno; Manchi Beetto sayise aannohura hakko manchira kayinni aanne'e! Hakku manchi ilama hoogoommero woyyannosihu baino» yii.

²⁵Sayise aannohu Yihudi, «Rosiisaancho'ya, aneetini?» yii. Yesuusino, «Atinni yootto» yiisi.

²⁶Ittanni heedheenna Yesuusi tima haa're, galatu huuccatto asse, hiiqqaqqe, rosaanosira, «Hii'e itte; kuni maala'yaatina» yee uyinsa.

²⁷Finiinchono haa're, galatu huuccatto asse kae, «Wo'munku kunni finiinchinni agge.

²⁸Tini lowo manni cubbo agursiisate du'nantannoti haaru gondoori mundee'yaati.

²⁹Halaale kuleemmo'nena, Anni'ya Gashshootira haaro agammo geeshsha, techonni kayise tenne woyine layinkimeeshsho diageemmo» yiinsa.

³⁰Hakkunni gedensaanni, galatu faarso faarsite ka'e Ejedhete Ilaala gooddidhu.

³¹Yesuusi lede rosaanosira, «‹Allaalaancho ganeemmo; ge'reewuno billaallanno› yine borreessinoonnina, techo hashsha ki'ne baalunku kaaddinannie.

³²Ikkollana reyotenni kaummohu gedensaanni, ki'ne balaxe Galiila saeemmo» yiinsa.

³³Hatte yannara Pheexiroosi, «Wolu baalu nafa kaadihero, ani diagudheemmohe» yee coyi'ri.

³⁴Yesuusi qole, «Halaale kuleemmohena, techo hashsha lukkichu gana geeshsha sase higge kaadattoe» yiisi.

³⁵Pheexiroosi kayinni, «Reyano hasiissannoha ikkiro, ate ledo reemmo ikkinnina horontanni dikaadeemmohe!» yee kaajjishe coyi'ri. Wole rosaano baalano hatto yitu.

³⁶Hakkunni gedensaanni, Yesuusi rosaanosi ledo Geetesemaane kae ha'ri. Hakkiira iillitu yannara Yesuusi rosaanosi, «Ani ko'o mare Magano huucci'rammo geeshsha, ki'ne konne ofolle» yiinsa.

³⁷Pheexiroosinna lamenka Zebidewoosi ooso haa're ha'ri. Hakkiicho yaaddonna dadillu amadisi.

³⁸Insara, «Lubbo'ya reyote geeshsha dadillitino. Ki'ne kayinni goxxinikkinni konniicho agarre!» yiinsa.

³⁹Insawiinni alba hige shiqqi yee, uulla uwe, «Anna'ya, dandaamannoha ikkiro, kuni qarri anewiinni saona! Kayinnilla, ate hedo gede ikko ikkinnina ane hedo gede ikkoonke» yii.

⁴⁰Hakkunni gedensaanni sasente rosaanosiwa higanno woyite, goxxe noore afi. Kunnira Pheexiroosira, «Ane ledo mitte saate nafa geleela didandiitinanni?

⁴¹Jifamate giddora e'inannikki gede jaattine huuccidhe! Ayyaanu qixxaawaho; maalu kayinni daafuraamoho» yii.

⁴²Galagale Yesuusi layinkimeeshsho xeerti're ha're, «Anna'ya, kuni qarru finiinchi anewiinni sa"annokkiha ikkiro, ate hedo gede ikkona» yaanni huucci'ri.

⁴³Layinkimeeshsho rosaanosiwa daanno woyite, goxxe noore afi.

⁴⁴Galagale insa agure ha're alba yee huucci'ri gede yaanni sayikkimeeshsho huucci'ri.

⁴⁵Hakkunni gedensaanni, rosaanosiwa galagale hige, «Xaano goxxinenna fooliishshidhinella heedhinoonni? Xaate ikkino; yanna iillitinona, Manchi Beetto cubbaataammu angara sayinse uyinanni saate iillitino.

⁴⁶Ka'e ha'nona; sayise aannoehu kuneeti dayinona» yiinsa.

⁴⁷Yesuusi coyi'ranni hee'reenna, tonaa lame rosaanosi ledohu Yihudi kae dayi. Isi ledo bisenna dulla anga adhinohu lowo manni dayi. Insano qeesootu roorrootiwiinninna geerruwiinni sonkeenna dagginoreeti.

⁴⁸Sayise aannohu Yihudi mannaho, «Hasidhinannihu ani sunqeemmohona iso amadde!» yee malaate uyinonsa.

⁴⁹Yihudi hakkawoyintenni Yesuusiwa daye, «Rosiisaancho'ya, keereho?» yee sunqisi.

⁵⁰Yesuusi qole, «Jaala'ya! Xaate dayotto haja guxxi!» yiisi. Hakkunni gedensaanni, mannu daye Yesuusa amadi.

⁵¹Yesuusi mule uurrite noori giddonni mittichu bise fushshe, qeesootu qari soqqamaanchira macca gane tayisi.

⁵²Yesuusi kayinni, «Bise fushshidhannori bisetenni reyitannona bisekki kou giddora qoli!.

⁵³Ani Anna'ya huucci'roommoro kumunni kiirranni sokkaasine soyaera dandaannokkiha lawihe?

⁵⁴Hatto ikkoommero, ‹Qarra adha hasiissannosi› yaannohu Qullaawu Maxaafi qaali hiitto ikke wo'manno?» yiisi.

⁵⁵Hatte yannara Yesuusi hakkiicho gamba yiino mannira, «Mulqi'rannoha amandannihu gede ane amadate bisenna dulla duqqitine daggini? Barra baala Qullaawu Mini giddo rosiisanni ledo'ne hee'rummo geeshsha diamaddinoonnie.

⁵⁶Kuni baalu ikkinohu kayinni alba himanaano himantinori wo'manno gedeeti» yii. Hatte yannara rosaanosi baala Yesuusa agurte xooqqu.

⁵⁷Hakkunni gedensaanni, Yesuusa amadduri haadhe Qeesootu Roorrichi Qeyaafawa massitusi. Hakkiicho Seeru rosiisaanonna geerru gamba yite no.

⁵⁸Pheexiroosi, Yesuusiwiinni xeerti're badheenni ha'ranni Qeesootu Roorrichi hoowe geeshsha mari. Ikkitote gara la"ara hoowe giddoonni e"e agaraasinete ledo ofolli.

⁵⁹Qeesootu roorrootinna Aliidi Yoo Mine ofolle noo manni baalu Yesuusa shinanni gede, kaphu taje hasi'ranni no.

⁶⁰Lowo manni kaphunni naqqasiro nafa, reyote yoora iillishanno coye diafidhino. Gedensaanni lamu manni naqaashshe ikke shiqe,

⁶¹«Kuni manchi, ‹Maganunniha Qullaawa Mine diige, sasu barri giddo qole mina dandeemmo› yaanna macciishshinoommo» yitu.

⁶²Qeesootu Roorrichi gotti yee Yesuusa, «Kuni manni ate aana coyi'ranni noo coyira qo'lattori dinoheni?» yee xa'mi.

⁶³Yesuusi kayinni mittoreno qolikkinni sammi yii. Qeesootu Roorrichi lede, «Heeshshote Magani su'minni xa'meemmohena Ati Maganu Beetto, Kiristoosa ikkoottoro kulie» yiisi.

⁶⁴Yesuusino, «Ati yiitto gedeeti. Ikkollana kunni ka'a Manchi Beetti Wo'manka Dandaanno Maganira qiniiteenni ofollinoha affinanni; hattono gordu gomichinni dukkisame daanna la'inanni» yiinsa.

⁶⁵Hatte yannara Qeesootu Roorrichi hanqe uddanosi dare, «Kuneeti, Magano xonino! Ki'neno xonino xono macciishshitinoonni! Kawiichinni sa'ino naqaashshe mayira hasi'neemmo?

⁶⁶Xa mayitinanni?» yii. Insano, «Reyona!» yitu.

⁶⁷Hatte yannara anja tuffanni, tuttugganni, qawaaddanni,

⁶⁸«Kiristoosi! Hanni ganihehu ayetiro himani?» yitusi.

⁶⁹Pheexiroosi, Qeesootu Roorrichi mine hoowete giddo ofolle hee'reenna, mitte borojjicho isiwa dagge, «Atino Naaziretete Yesuusi ledoho» yitusi.

⁷⁰Isi kayinni, «Ati yaattaha diafoommo» yee mannu baalu albaanni moromi.

⁷¹Gobbara fulanni hee'reenna mitte wole borojjicho affe, hakkiicho noo mannira, «Kuni manchi Naaziretete Yesuusi ledoho» yitu.

⁷²Pheexiroosi kayinni, «Konne ati yaattaha diegennoommo» yaanni layinkimeeshsho xaari.

⁷³Shiima yanna gedensaanni, hakkiicho uurre noo manni Pheexiroosiwa shiqqi yee, «Coyikki egensiisanno; addaho atino insa widiho» yitusi.

⁷⁴Hatte yannara Pheexiroosi, «Maganu afoe, ani konne yitinanni mancho diegennoommo!» yaanni xaari. Hakkawoyintenni lukkichu gani.

⁷⁵Pheexiroosino, « ‹Lukkichu ganikkinni sase higge diegennoommosi› yaattoe» yee Yesuusi coyi'rino coyi qulli yeennasi gobbara fule hururame wi'li.