Read Sidama_Qullaawa _Maxaafa MAATEWOOSI 5 Bible Online

MAATEWOOSI 5 - Sidama_Qullaawa _Maxaafa bible

MAATEWOOSI 5

¹Yesuusi hoodesi daanni nooha lowo manna afe, ilaalu iimira fule ofolli. Rosaanosino isiwa martu.

²Isino,

³«Ayyaanunni buxxinori ba'raadhinoreeti; gordu gashshooti insahona.

⁴Yaaddannori ba'raadhinoreeti; jawaante afidhannona.

⁵Jooguullu ba'raadhinoreeti; baattono ragidhannona.

⁶Keeraanchimmate daafira hudidhannorinna goodhannori ba'raadhinoreeti; kassino yitannona.

⁷Wolu sao agurtannori ba'raadhinoreeti; insa saono agurranninsana.

⁸Xalalu wodaniri ba'raadhinoreeti; Magano la'annona.

⁹Araarsitannori ba'raadhinoreeti; Maganu oosooti yinanninsana.

¹⁰Keeraanchimmate daafira xiiwantannori ba'raadhinoreeti; gordu gashshooti insahona.

¹¹Ane daafira mannu xoni'ne'ro, xiiwi'neronna kaphunni su'ma huni'nero tashshi yoo'ne.

¹²Gordu gashshootira lowo waaga afidhinanni daafira tashshi yoo'ne; hagiidhe. Ki'nera albiidi himanaanono hatto xiiwamanna qarra iillishshinonsa» yaanni rosiisa hanafi.

¹³Yesuusi qole, «Ki'ne tenne gobbara mannaho maxinete; maxine badduro galagalte hiitto ikkite coomma dandiitanno? Gobba fushshine tungeenna mannu kakkadannota agurranna mitturirano di"ikkitanno.

¹⁴«Ki'ne alamete caabbichooti; ilaalu iima noo katami go'la didandaanno.

¹⁵Caabbicho xawinse ka'ne mine wo'mankawa xawanno gede tuuqu aana usurranni ikkinnina aanaho gawate gombisannohu dino.

¹⁶Mannu dancha looso'ne lae gordu Anna'ne galatanno gede, caabbichi'ne mannu albaanni xawo» yii.

¹⁷Yesuusi lede, «Muse Seeranna himanaanote roso hunammora dayommoha lawoonke'ne. Ani wonshammora ikkinnina diigammora didayommo.

¹⁸Halaale kuleemmo'ne; gordunna baatto sa'a geeshsha seeru baalu wo'manno ikkinnina, Seeru giddonni shiima fidale woy bicamme diba'anno.

¹⁹Tenne hajajo giddonni mitte hooffayidita diigannohunna woleno hunanno gede rosiisannohu baalu, gordu Gashshootira hooffayidiha ikkanno. Hajajo baalanta wonshannohunna wolu mannino wonshanno gede rosiisannohu kayinni, gordu Gashshootira roore ikkanno.

²⁰Kunnira, keeraanchimma'ne Seeru rosiisaanonna Farisootu keeraanchimmawiinni roora hoogguro, gordu Gashshoote horonta e'inannikkita kuleemmo'ne.

²¹«Albi mannira, ‹Shitinoonte; manna shaannohura yoo yinanni› yinoonnita macciishshitinoonni.

²²Ani yeemmo'neti kayinni: rodiisira hanqanno baalira yoo yinanni. Qoleno rodoosi, ‹Tidhoottori nookkihu› yee xonannohu baalu songote albira shiqeenna aanasi yoo yinanni. ‹Mullu gowwi› yee xonannohano gaannaamete giira agartannosi.

²³Fushshaatekki Maganoho shiqishi'ratto yannara giwamoottoha rodookki qaagittoro,

²⁴fushshaatekki hakko worte agurte hadhe balaxxe giwamootto rodiikki ledo araarami. Hatto assittohu gedensaanni dagge fushshaatekki Maganoho shiqishi'ri.

²⁵«Giwamootto manchi yekkeereennahe isi ledo yoote minira ha'ratto woyite, doogote aana heedhe rakke araarami. Araarama hoogittoro kayinni, yekkeerinohehu yoo yaannohuwa masseennahe, yoo yaannohu qole usurannohura sayise eennahe usuru mine tugamatto.

²⁶Halaale kuleemmohena, yinoonnihere mitte saante nafa gattukkinni baaxxite gudittokkinni hakkiichinni difulatto» yii.

²⁷Yesuusi qole, «‹Foortinoonte› yinoonnita macciishshitinoonni.

²⁸Ani kayinni, ‹Meyata lae yorinoha baala wodanisinni ise ledo foorinohu gede assine kiirranni› yeemmo'ne.

²⁹Kunnira qiniiticho illekki cubboho massitannoheha ikkiro fushshite huni. Mannimmakki baala gaannaamete giirara tugantantenni mannimmakki giddonni mitte ille ba'uro woyyate.

³⁰Qiniiticho angakki cubboho eessitannoheha ikkiro murte huni. Mannimmakki baala gaannaamete giirara tugantantenni mannimmakki giddonni mitte anga hoogittoro woyyate» yiinsa.

³¹Yesuusi qole, «‹Galtesi mininni fushshe ha'risannohu ha'risate woraqata oose› yinoonni.

³²Ani kayinni, ‹Foorretenni kainohunni ikkiro ikkinnina, hakkuyi ka'a galtesi fushshe ha'risannohu baalu ise foortanno gede assanno. Galtese agurte hadhinota adhannohu baaluno foorinoho› yeemmo'ne» yii.

³³Yesuusi lede, «Albi mannira, ‹Kaphu xano xa'nitinoonte; ikkollana Mootichaho xa'nitinoonni xano tidhe› yinoonnita macciishshitinoonni.

³⁴Ani kayinni, ‹Horontanni xaartinoonte; Gordu Maganoho ayirrinyu barcima ikkino daafira, gordunnino xaartinoonte.

³⁵Baattono Maganu lekkasinni kaxxinotena baattotennino xaartinoonte. Yerusaalame jawu Moote katamaatina Yerusaalametennino xaartinoonte.

³⁶Umikki danancho mitto nafa waajjo woy kolishsho assa didandaattona umikkinni xaartooti.

³⁷Kunnira, coyidhinanniri addahoro «Ee», kaphohoro «Dee'ni» yiiyye. Hakkuyi ka'i coyi bushuwiinni daannoho› yeemmo'ne» yiinsa.

³⁸Yesuusi qole, «‹Ille huninohura illesi hunnona; hinko hiiqqinohura hinkosi hiiqqinona› yinoonnita macciishshitinoonni.

³⁹Ani kayinni, ‹Bunshe assanno'ne manchira bado qo'litinoonte. Qiniiticho baqqaalla qawaadannohehura guracho baqqaalla qolisi.

⁴⁰Mittu manchi shamisekki adhara yee yoote minira massihero, kootekkino adhona agurisi.

⁴¹Qoleno mittu manchi, «Kai ane ledo mito geeshsha ha'nona» yee qarrisihero, ati kayinni ero ledde ledosi ha'ri.

⁴²Huucci'rannohehura uyi; liqoo xa'mi'rannohehura liqiissi› yeemmo'ne» yii.

⁴³Yesuusi lede, «‹Jaalakki baxi; baarigaarakki giwi› yinoonnita macciishshitinoonni.

⁴⁴Ani kayinni, ‹Baarigaara'ne baxxe; xiibbanno'nerira Magano huuccensa.

⁴⁵Hatto assitiniro gordoho hee'ranno Anni'nera oososi ikkitinanni. Isi bushuullehonna danchuulleho arrishsho fushshanno; keeraanotenna cubbaataammaho xeena gananno.

⁴⁶Baxxanno'nere calla baxxine ma afidhinanni? Qaraxaasine nafa hatto diassitanno?

⁴⁷Roduuwa'ne calla keere haadhinanniha ikkiro ma roorsitiniyya? Daga nafa hatto diassitanno?

⁴⁸Kunnira, gordu Anni'ne guuta ikkinohura, ki'neno guuta manna ikke!› yeemmo'ne» yii.