Read Sidama_Qullaawa _Maxaafa MAATEWOOSI 6 Bible Online

MAATEWOOSI 6 - Sidama_Qullaawa _Maxaafa bible

MAATEWOOSI 6

¹Yesuusi lede coyi'ranni, «‹Mannu laonke› yitine dancha looso mannu albaanni assa qorophe! Hatto assitiniro Gordu Anni'newiinni mittoreno diafidhinanni.

²«Kunnira qarrantinorira uyitinanni woyite mannu la"ansara yite xaadu minenna dooggate uyitanno lawisiisaano gede leellamate yitine assitinoonte. Halaale kuleemmo'nena, hatto assitannori loosinsa guma adhite ka'ino.

³Ati kayinni qarrantinorira aatto woyite, qiniiticho anganni uyitanna guracho angakki affoonke.

⁴Kunni daafira aattore maaxxe uyi; maanxe assinoonniha la"annohu Annikki loosikki guma aannohe» yii.

⁵Yesuusi lede, «Huuccidhinanni woyite, leellamate yite huuccidhannori gede ikkitinoonte. Insa mannu la"ansara yite xaadu minenna dooggate maddera uurrite huucci'ra baxxanno. Halaale kuleemmo'nena, insa balaxxe loosinsa guma adhite ka'ino.

⁶Ati kayinni huucci'ratto woyite minikkira e'e, cufanakki cufidhe go'le nooha Annakki huucci'ri. Maanxe loonsoonniha la"annohu Annikki loosikki guma aannohe.

⁷«Ki'ne huuccidhinanni woyite dagate gede yitinoonnita yitinanni huuccatto seedissinoonte. Insara huuccatto seedisatenni macciishshinanniha lawannonsa.

⁸Ki'nera kayinni Anni'ne hasiisanno'nere huuccidhinikkinni balaxe afino daafira insa gede ikkitinoonte.

⁹Kunnira ki'ne, ‹Annanke Gordoho hee'rattohu, su'mikki qullaawa ikko.

¹⁰Gashshootikki dayo, hedoottori gordoho ikkinonte gede, baattote aanano ikko.

¹¹Techo barrita sagalenke uyinke.

¹²Wolootu sao agurreemmonte gede, ninke saono agurinke.

¹³Bushu coyiwiinni gatisinke ikkinnina, jifammeemmo gede assitootinke. [Gashshootu, wolqanna ayirrinyu hegerera atehona. Hamii'ni!›] yitine huuccidhe.[2]

¹⁴Mannu sao agurtiniro, gordu Anni'ne ki'ne saono aguranno'ne.

¹⁵Mannu sao agura hoogginiro kayinni, Anni'ne ki'ne saono diaguranno'ne» yii.

¹⁶Yesuusi, «Qatuntine huuccidhinanni woyite, qatunte huucci'ransa mannu afansara yite bullitanno lawisiisaano gede alba bullitinoonte. Halaale kuleemmo'nena, insa loosinsa guma adhite ka'ino.

¹⁷Ati kayinni qatunte huucci'ratto woyite, alba hayishshi'ri; umo buudhi.

¹⁸Kunni garinni, qatumakki go'le noohu Annikki afanno ikkinnina mannu diafanno. Go'line loonsoonnire afannohu Annikki loosikki guma aannohe» yii.

¹⁹Yesuusi, «Daanillu qasannotera, bile ittannoteranna mooraanchu ume adhannotera tenne baattora jiro duu'nitinoonte.

²⁰Jiro'ne daanillunna bile kissannokkiwa, mooraanono unte e'e moora dandiitannokkiwa gordoho duu'ne.

²¹Jiro'ne noowa wodani'neno hakkiicho hee'ranno» yii.

²²Yesuusi qole, «Mannimmate caabbichi illete; kunnira ille'ne keere ikkituro, mannimma'ne baala xawaabba ikkitanno.

²³Ille'ne fayya hoogguro kayinni, mannimma'ne baala tunsitanno. Kunnira, giddokki noo caabbichi tunsiro, hiikke albinni roore tunsa hooganno» yii.

²⁴«Mittu manchi lamu Mootichira soqqama didandaanno. Woy mitto giwe mitto baxanno; woy mitto ayirrise mitto mishanno. Hattonni mittu manchi Maganohonna woxeho borojjicho ikka didandaanno.

²⁵«Kunnira, ‹Ma inteemmo? Ma angeemmo? Ma uddi'neemmo?› yitine heeshsho'nera yaaddinoonte yeemmo'ne. Sagale lubbo, uddano mannimma diroortanno?

²⁶Hanni iima buubbanno cea la'e; insa diwixidhanno; dimixxitanno; gootaraho diwodhitanno. Ikkollana gordu Anni'ne itisannonsa. Ki'ne cea lowo geeshsha diroortinanni?

²⁷Ki'ne giddo yaade hojjasi aana[3] mitte cigile lexxa dandaannohu nooni?

²⁸«Uddanoteno mayira yaaddinanni? Dubbu daraaro ikkite lophitanno gara la'e. Insa loossanni didaafurtanno; disuqqitanno.

²⁹Ani yeemmo'neti kayinni, Selemooni nafa kunni baalu ayirrinyisinni daraarote giddonni mittu daraarchi gede diuddi'rino.

³⁰Ki'ne amma'na xe'ino'neri, Maganu techo leelte ga'a giirate tugantanno hayissora togo asse uddisiisannoha ikkiro, ki'ne hiitto roorse diuddisiisanno'ne?

³¹Kunnira, ‹Ma inteemmo? Ma angeemmo? Ma uddi'neemmo?› yitine yaaddinoonte.

³²Konne afi'rate qarrantannori dagate. Ki'nera kuni baalu hasiisannota gordu Anni'ne egennino.

³³Ki'ne kayinni balaxxine Maganu Gashshootenna keeraanchimmasi hasidhe; hakkuyi ka'ire baala lendanni'nena.

³⁴Ga'a umisira yaadannona, ga'ara yaaddinoonte. Mittu mittunku barrira umisi qarri ikkannosi» yii.