Read Sidama_Qullaawa _Maxaafa MAARQOOSI 11 Bible Online

MAARQOOSI 11 - Sidama_Qullaawa _Maxaafa bible

MAARQOOSI 11

¹Yesuusinna rosaanosi Yerusaalame iilla rakkuta, Beetefaagenna Biitaaniyu widoonni higge, Ejedhete Ilaaliwa martu. Yesuusi rosaanosi giddonni lame,

²«Alba'neenni noo qacha marre! Hakka iillitinanni woyite, gulunfe egenninoonnikkita harrichote ilmatticho usurante noota affinannina tirtine abbe"e.

³‹Mayira assitinanni?› yee xa'manno'nehu hee'riro, ‹Mootichu hasi'ranno daafiraatina xaanni qole soyanno› yiiyye» yee soyi.

⁴Hakkiinni ka'e marte, ilmatticho nafara doogote gama usurroonnita affe tirtu.

⁵Hakkiicho uurre noo manni giddonni mitu mitu, «Ilmatticho mayira tirtinanni?» yite xa'mitunsa.

⁶Insano Yesuusi yiinota kulteennansa agurtunsa.

⁷Rosaanosi ilmatticho Yesuusiwa haadhe abbite, uddannansa aanaho worteenna gulufi.

⁸Lowo manni uddannansa doogote kari. Gamu manni qole daraame sinna loosu giddonni hiiqqaqqe haa're kari.

⁹Albasiinninna badhesiinni ha'ranni noo manni, «Hosaina[9] Maganu su'minni daannohu maassaminoho!

¹⁰Daanni noohu, anninke Daawiti Gashshooti maassamo; iima gordoho hee'rannohura hosaina!» yaanni faarsi.

¹¹Yesuusi Yerusaalame iilli woyite, Qullaawu Minira e"e baalankare gaangaawe lai. Yanna hawarritino daafira, tonaa lamunku rosaanosi ledo fule Biitaaniya ha'ri.

¹²Yesuusi layinki barra Biitaaniyunni higanni hee're hudi'ri.

¹³Xeertote hee're, balasete haqqicho latte seekkinota afe, «Laalo afidha ikka?» yee mari. Shiqqi yee la"anno woyite, balase laaltanno yanna ikkitinokkihura, darote ka'a aanaho mitturino dinose.

¹⁴Kunnira Yesuusi balase, «Xaanni kayise hegere geeshsha laalokki ayino itoonke!» yii. Hatto yii woyite, rosaanosi macciishshitanni no.

¹⁵Yerusaalame iillitu yannara, Yesuusi Qullaawu Minira e"e hidhitanninna hirtanni noore fushshe shorri. Woxe soorritannori xarapheeyyenna lemboola hirtannori barcimma galchi.

¹⁶Ayino uduunne duqqe Qullaawu Mini hoowe giddoonni hige sa"annokki gede hooli.

¹⁷Hakkunni gedensaanni, «Mini'ya mannu baalu, ‹Magano huucci'ranno mineeti› yinanni yine diborreessinoonni? Ki'ne kayinni mulqidhannori maaxantanno goda assitinoonni» yee rosiisinsa.

¹⁸Qeesootu roorrootinna Muse Seeri rosiisaano hatto yee coyi'ranna macciishshitu. Mannu baalu isi rosiisino coye dhaggeeffatanni noo daafira, waajjitusi. Kunnira shitannosi doogo hassu.

¹⁹Yesuusinna rosaanosi hawarro hawarro Yerusaalamete gobbaanni fultanno.

²⁰Layinki soodo guto hattenne doogo higge sa'anni, balase rumushsho iillite mooltinota affu.

²¹Pheexiroosi be'ro coye qaage Yesuusa, «Rosiisaancho, kune rumitto balase mooltino» yii.

²²Yesuusi qole, «Magano amma'ne!

²³Halaale kuleemmo'nena, ayino wodanisinni huluullamikkinni, hasi'ranno coyi wo'mannosi gede amma'ne konne ilaala, ‹Kawiinni ka'e baaru giddo uwi!› yiirono ikkannosi.

²⁴Kunnira ani kuleemmo'neti: Huuccidhinoonnire baala adhitinoonnihu gede assitine kiirre; ikkanno'nena.

²⁵Gordoho noohu Anni'ne cubbo'ne aguranno'ne gede, Magano huuccidhinara ka'inanni woyite, mannaho amaddinoonni koma agurre.

²⁶Ki'ne wolu sao agura hoogginiro kayinni, gordoho noohu Anni'ne ki'ne cubbono diaguranno'ne» yee qolinsa.[10]

²⁷Insano galagalte Yerusaalame daggu. Yesuusi Qullaawu Mini giddo ha'ramanni hee'reenna qeesootu roorrooti, Muse Seeri rosiisaanonna geerru isiwa dagge,

²⁸«Konne coye assattohu mayi roorreenniiti? Woy kayinni togoo coye assate roorre uyinohehu ayeti?» yite xa'mitusi.

²⁹Yesuusi, «Anino mitto coye xa'meemmo'ne; xa'meemmo'nere qoltiniehu gedensaanni, konne coye aye roorrenni asseemmoro kuleemmo'ne» yiinsa.

³⁰«Yohaannisi cuua Maganunnitenso mannunnite? Hanni qolle"e!» yee xa'minsa.

³¹Insa, «Xa ma yino?» yite insa insanaawa xa'mantu. «‹Maganunnite› yinummoro, ‹Ammana mayira hoogginiyya?› yaannonkena,

³²‹Mannunnite› yino ikka?» yitu. (Ikkollana mannu baalu Yohaannisi himanaanchoho yee noo daafira waajjitu.)

³³Kunnira, «Ninke dianfoommo» yite dawartusi. Yesuusi qole, «Hattootiro, ani konne coye aye roorrenni asseemmoro dikuleemmo'ne» yiinsa.