Read Sidama_Qullaawa _Maxaafa MAARQOOSI 12 Bible Online

MAARQOOSI 12 - Sidama_Qullaawa _Maxaafa bible

MAARQOOSI 12

¹Lede Yesuusi, «Mittu manchi woyinete kaashsho kaasi'ri; gaangeesse huxxa huxxe, woyine huuncinanni baleno ume qixxeessi; woyine agarrannita seeda shaeno kinchunni seekki. Hakkunni gedensaanni gatesi loossannorira guto ee, xeerto gobba ha'ri.

²Woyinete laalo iillituta, beehacho abbannosiha soqqamaanchosi gutanyootunniwa soyi.

³Gutanyootu kayinni soqqamaancho amadde gante ka'e, mulla anganni qolte sokku.

⁴Layinkimeeshshono kaashshu anni wole soqqamaancho insawa soyi. Gutanyootu hakkonneno gante umo darte, shollishshe sokku.

⁵Xaano lede soyinoha shitu. Hattono wole lowo manna soyenna, mito gantu; mito shitu.

⁶Xa, baxannoha mitticho beettosi fushshe soya calla gattino. Kunnira, ‹Beetto'ya ayirrissannoha ikkannona› yee hede, goofimarchoho mitto beettosi soyi.

⁷Gutanyootu kayinni insa insanaawa, ‹Kuni ragi'raanchohona, amme shinona; baatto ninketa ikkitannona› yite ma'litu.

⁸Kunnira beettosi amadde shite, woyinete kaashshi giddonni gobba qolte fushshite tuggu.

⁹«Kunnira, woyinete gati anni ma assa hasiissanno? Annu umisi daanno; gutanyoota shee gudanno; woyinete uullano wolu mannira aanno.

¹⁰Anfina, ‹Mine mintannori mishshino kinchi, mineho gumayicho ikki.

¹¹Konne coye assinohu Mootichaho; ninkeno illenkenni la'ne maala'linummo› yinoonni borro dinabbabbinoonni?» yaanni maammaashshunni rosiisa hanafi.

¹²Ayihudete roorrooti Yesuusi maammaahino maammaashshi kisannonsata affe, iso amaddara yorte manna waajjitino daafira agurte hadhu.

¹³Hakkunni gedensaanni, Yesuusa coyi'ranno coyinni woshshaada hasidhe, Farisootanna Heeroodisi widi manna sokku.

¹⁴Insano marte, «Rosiisaancho, ati halaalaancho ikkoottota egenninoommo; manna waajjitenna woleho golante assatto coyi dino. Maganu doogo halaalunni rosiisattoho. Maahoyyena, jawaho Roomu mootera Qeesaarira giwire baata seerahonso seerimalete? Uyinonso agurro?» yite xa'mitusi.

¹⁵Yesuusi xagarronsa afinohura, «Coyinni woshshaaddinaera mayira hasidhinanni? Hanni mitte saante haadhine anewa abbe!» yiinsa.

¹⁶Insano saante abbiteenna lae, «Tenne saante aana noo misile ayete? Aanaho borreessinoonni su'mino ayeho?» yee xa'minsa. Insa qolte, «Qeesaariho» yitu.

¹⁷Yesuusi qole, «Hakka woyiteetiro, Qeesaariha Qeesaarira, Maganunniha Maganoho uuyye!» yiinsa. Insano qolino dawarora lowo geeshsha maala'litu.

¹⁸Reyote gedensaanni ka"a noota ammantannokkiri Seduqootu Yesuusiwa dagge,

¹⁹«Rosiisaancho, Muse mitto seera borreesse uyinonke; hakkuno, ‹Mittu manchi galte adhe ooso ilikkinni reyiro, rodiisi galtesi ragi're sircho sayisosi› yaannoho.

²⁰Lamalu roduuwi noori giddonni bayiriidihu galte adhe, ooso kayinni ilikkinni reyi.

²¹Layinki rodiino hatte mancho ragi're, ooso ilikkinni reyi. Sayikkihuno hattonni ikkino.

²²Hakko garinni lamalunku sircho sa'ukkinni reyitu. Insa baalunku gedensaanni manchono reyitu.

²³Tenne mancho lamalunku roduuwi adhitinona, reyotenni ka'nanni waro, ise hiikkunni galte ikkitanno?» yite xa'mitusi.

²⁴Yesuusi, «Ki'ne sodhinoonnihu, Qullaawa Borro woy Maganu wolqa afa hooga'nenni di"ikkino?

²⁵Reyitinori ka'anno waro, gordu sokkaasine gede ikkitanno ikkinnina, diadhitanno; diadhantanno.

²⁶Reyotenni ka"ate daafira ikkiro kayinni, Maganu Musera citu giira giddo ma yee coyi'rinosiro Muse borro giddo dinabbabbinoonni? Hakkuno, ‹Ani Abirihaami Maganooti; Yisihaaqi Maganooti; Yaiqoobi Maganooti› yaannoho.

²⁷Maganu heedhannori Maganooti ikkinnina, reyitinori Magano di"ikkino. Ki'ne kayinni lowo geeshsha sodhinoonni» yee qolinsa.

²⁸Mittu hasaawansa macciishshanni noohu Muse Seeri rosiisaanchi, Yesuusi dancha dawaro qolinonsata afi. Isino Yesuusa, «Baalanta roortino hajajo hiittenneeti?» yee xa'mi.

²⁹Yesuusi, «Baalanta roortanno hajajo, ‹Israeele macciishshe! Maganinke Kaaliiqi mitto Kaaliiqaati.

³⁰Maganokki Kaaliiqa wo'mu wodanikkinni, wo'ma lubbokkinni, wo'ma hedokkinninna wo'ma wolqakkinni baxi!› yitannote.

³¹Layinkiti roore hajajo, ‹Manna baala umikki gede assite baxi!› yitannote. Tenne lamenta roortinoti wole hajajo dino» yee dawarisi.

³²Seeru rosiisaanchi qole Yesuusa, «Rosiisaancho, ‹Maganu mittoho. Isi ka'a wolu Magani dino› yite coyi'roottoti halaaleho.

³³Kunnira, mannu wo'mu wodanisinni, wo'ma hedosinninna wo'ma wolqasinni Magano baxa, hattonni wole mannano umisi gede asse baxa, shilqote kakkalonna wole kakkalono roortannote» yii.

³⁴Yesuusi Seeru rosiisaanchi wodaninni hede qolinosita afe, «Ati Maganu Gashshootiwiinni dixeerti'rootto» yiisi. Hakkunni gedensaanni Yesuusa ugge xa'minosihu dino.

³⁵Yesuusi Qullaawa Mine rosiisanni, «Muse Seeri rosiisaano, ‹Kiristoosi Daawiti Beettooti› yitannohu mayiraati?

³⁶Daawiti umisi Qullaawu Ayyaani kaa'lannasi, ‹Kaaliiqi Mootichi'yara, «Baarigaarakki lekkakkira woroonni qolammo geeshsha, qiniite'yaanni ofolli!» yiinosi› yii.

³⁷Daawiti umisi, ‹Mooticha› yee woshshannosi. Kiristoosi, hiitto ikke isi beetto ikkannoyya?» yee xa'mi. Lowo manni Yesuusi yaannore hagiirrunni macciishshi.

³⁸Yesuusi rosiisanni, «Seeda uddano uddidhe, ka'anna kawa ha'rantanni dikkote ayirrinyunni keere haa'nansara hasidhannore, Muse Seeri rosiisaano agadhe!

³⁹Insa, xaadu mine danchu barcimira ofoltaranna jilu mine ayirrinyu darga afidhara qolchantanno.

⁴⁰Gunnootu mine mulqitanno; mannaho leellantara yite, huuccatto seedissanno. Kunni daafira insara roore qoricha uyinanni» yii.

⁴¹Yesuusi mannu Maganu loosira woxe gamba assanno dhaawara albaanni ofolle hee'reenna, mannu woxe tuganna lai. Lowo dureeyye lowo woxe tuggu.

⁴²Mitticho buxicho gunnitte dagge, lame taamuna uyitu; hatto yaano mitte saante yaate.

⁴³Yesuusi rosaanosi woshshe, «Halaale yeemmo'nena, woxe tugi manni baalunkunni aleenni, tini buxicho gunnitte roorsite uyitino.

⁴⁴Wolu manni baalu, ikke gatinonsahu giddonni uyino. Ise kayinni buxxe heedhenni, mittoreno gatisidhukkinni noosere raabbe uyitino» yiinsa.