Read Sidama_Qullaawa _Maxaafa MAARQOOSI 13 Bible Online

MAARQOOSI 13 - Sidama_Qullaawa _Maxaafa bible

MAARQOOSI 13

¹Yesuusi Qullaawu Mininni fulita, rosaanosi giddonni mittu, «Rosiisaancho'ya, lai! Tini kinnanna kinchunni minnoonni minna hiitto biiffino!» yii.

²Yesuusi qole, «Tenne jajjabba kinnatenni minnoonni minna la"atto? Tini kinna baala diigantanno; kinchu kinchu aana duunamino gedeenni dihee'ranno» yii.

³Yesuusi Qullaawu Minira albaanni Ejedhete Ilaali aana ofolle hee'reenna Pheexiroosi, Yaiqoobi, Yohaannisinna Indiriyaasi calluwu isiwa shiqqi yite,

⁴«Kuni coyi ikkannohu mamarooti? Kuni baalunku coyi ikkara malaatu maatiro kulinke» yite xa'mitusi.

⁵Yesuusi qole, «Ayino so'risiisanno'nekki gede qorophe!

⁶Lowo manni, ‹Ani Kiristoosiiti› yaanni su'mi'yanni daanno. Lowo mannano so'risiisanno.

⁷Mule'ne ikko xeertote olu duduwo macciishshitinanni woyite massinoonte. Kuni gatannokki coyeti. Goofimarchu kayinni albillitteteeti.

⁸Gosa gosate aana, gashshootu gashshootu aana ola kayissanno. Addi addi darga baatto huxidhanno; hudeno ubbanno. Kuni coyi ilate game gede qarraho hanafo ikkanno.

⁹«Ki'ne kayinni umi'nera qorophe! Roorrootaho sayisse uyitanno'ne. Xaadu mini giddo lichetenni gantanno'ne. Ammana'nere farci'rate, ane daafira yitine gashshaanotenna mootoollate albaanni uurritinanni.

¹⁰Kuni baalu ikkara albaanni Danchu Duduwi gosa baalate kulama hasiissanno.

¹¹Amande yoote shiqinshi'nero, ‹Ma coyi'neemmo› yitine balaxxine yaaddinoonte. Hakka woyite uyinanni'ne qaale coyidhe. Hakkuno Qullaawu Ayyaaninniiti ikkinnina, ki'ne coyidhinanniha di"ikkino.

¹²Roduu rodoosi, annu beettosi reyote sayise aanno. Ooso iltinonsarira diina ikkite reyote sayisse uyitannonsa.

¹³Ane daafira yitineenna, mannu baalu giwanno'nere ikkitinanni; goofimarchu geeshsha cince kaajjannohu kayinni gatanno.

¹⁴«Baote batte hee'ra hasiissannokki darga noota affinanni woyite, nabbawannohu wodancho. Hakka woyite Yihudu gobbara noohu ilaallate widira hige xooqo.

¹⁵Minu aana noohu minisi giddonni mitore adhara dirre minira eoonke.

¹⁶Gate loosu giddo noohu uddanosi adhara wirri yee badhera higoonke.

¹⁷Hatte yannara godowinni nooriranna qansi'rannorira mageeshshi shettooti!

¹⁸Kuni coyi hawadu giddo ikkannokki gede Magano huuccidhe.

¹⁹Hatte yannara kalaqamunni kayise, xaa geeshsha ikke egenninokki qarri daanno. Hakkunni gedensaannino hattoo qarri di"iillanno.

²⁰Mootichu hakko barra haransa hoogoommero, ayino digatanno. Maganu doodhino manni daafira yee hakkonne barra haransanno.

²¹«Ayino, ‹Kiristoosi kuneeti, konne no› yii'nero, woy kayinni, ‹Kuu"uneeti, koo"o no› yii'nerono ammantinoonte.

²²Kaphaano Kiristoosootinna kaphaano himanaano dagganno. Insa dandiitoommero, doorantinore nafa so'risiissara dhaggenna maalale leellishshanno.

²³Baalanka coye umo asse kuloommo'nena, xaate jaattine agadhe.

²⁴«Hatte yannara hakko qarri gedensaanni, arrishsho tunsitanno; aganuno dixawanno.

²⁵Beeddahe gordunni giggiltanno; gordu wolqano daaqqanno.

²⁶Hakkunni gedensaanni, mannu Manchi Beetti gomichu giddo hee're, lowo wolqanninna ayirrinyunni daanna la"anno.

²⁷Hatte yannara sokkaasine soyanno; insano shoolenka raga hadhe, gordunna gobba qasidhino geeshshinni Maganu doodhinore gamba assitanno.

²⁸«Balasete masalonni rosse. Sinnase ciirtannonna darose lattanno woyite, badheessu rahinota affinanni.

²⁹Konne coye baala affinanni woyite, yanna shiqqi yite, waalchoho noota affinanni.

³⁰Halaale kuleemmo'ne; kuni baalu ikka geeshsha, tini ilama disa'anno.

³¹Gordunna baatto sa'anno; qaali'ya kayinni disa"anno» yii.

³²Yesuusi lede, «Hakkonne barranna hattenne saate Maganu Annu ka'a, gordu sokkaasineno ikkito, Beettono ikko, ayino afinohu dino.

³³Yanna mamooteetiro diaffinoonnina feeffattine agadhe.

³⁴Kuni coyi, minesi loossannorira loosunnita addi addi annimma ee xeerto gobba ha'rino mancho lawanno. Kuni manchi ha'ri woyite, assitannore kule, qae agarannohuno jaate agaranno gede hajajino.

³⁵Kunnira, minu anni daanno yanna diaffinoonnina, miteekke waarete, woy hashshu mereero, woy baqqinateho, woy lukkichu gananna daannoha ikkannona, jaattine agadhe.

³⁶Hedeweelcho daye, goxxine ba'ine heedhineenna afoonke'ne.

³⁷Ki'ne yeemmonte gede, wole baalanka, ‹Jaatte!› yeemmo» yiinsa.