Read Sidama_Qullaawa _Maxaafa MAARQOOSI 14 Bible Online

MAARQOOSI 14 - Sidama_Qullaawa _Maxaafa bible

MAARQOOSI 14

¹Yihudaho Agure Sa"ate Ayyaananna Timu Ayyaana ayirrinsara, lamu barri gate hee'reenna, qeesootu roorrootinna Seeru rosiisaano Yesuusa amadde shitanno doogo hasidhanni no.

²Ikkollana, «Mannu gibbo kayisanno» yite waajjitino daafira, «Ayyaanu barra dikinseemmo» yitu.

³Yesuusi Biitaaniyaho taraawannoha gogu dhibba afi'rino manchi Simiooni mine sagalete ofolle hee'reenna, mitticho mancho lowo woxinni hirrannita naardoosi yinanni shitto, albasxiroosi yinanni kinchinni seekkinoonni gujuujjera haadhe daggu. Gujuujjete afoo hiiqqite, shitto Yesuusi umira duntu.

⁴Hakko noo manni giddonni mitu mitu hanqite, «Tenne shitto mulla mayira hunnanni?

⁵Woleteemmero, tenne shitto 300 roorannohura kinchu birrira hirre, woxe buxanete uyinannihu baino» yite mancho lowo geeshsha arrassituse.

⁶Yesuusi kayinni, «Agurrese! Mayira qarrissinannise? Ise anera dancha coye assitino.

⁷Buxane wo'manka woyite ki'ne ledo noona, baxxini woyite kaa'litinanninsa. Ane kayinni wo'ma woyite diaffinannie.

⁸Tini mancho wolqase uyitu geeshsha assitino; bisi'yara waammate albaanni balaxxe shitto buurtinoe.

⁹Halaale yeemmo'ne: Dagate konne Dancha Duduwo dudumbanniwa baala, ise qaaggora kuni assitinori kullanna hee'ranno» yiinsa.

¹⁰Tonaalame rosaanosi giddonni mittu, Asiqorootichu Yihudi, Yesuusi sayise aara qeesootu roorrootiwa ha'ri.

¹¹Insano konne coye macciishshite, lowo geeshsha hagiidhite, woxeno uyitannosi gede coyidhu. Isino Yesuusa sayise aate, injo hasi'ranni keeshshi.

¹²Agure Sa"ate Ayyaani ge'recho gorri'nannihura Timu Ayyaanira umi barra, rosaanosi Yesuusiwa shiqqi yite, «Agure Sa"ate Ayyaaniha hashshi hurbaate hiikkiicho qixxeessinummohero woyyate?» yite xa'mitusi.

¹³Isino rosaanosi giddonni lame, «Katama hadhine, hakko wayi gambayicho duhe noo mancho affinannina, isi faana hadhe.

¹⁴Isi eanno minira martine minu anna, ‹Rosiisaanchinke, «Rosaano'ya ledo Agure Sa"ate Ayyaaniha hashshi hurbaate iteemmo mini hiikkiichooti yiino» yiiyye.

¹⁵Isino minu aana minnoonnihura layinki minira karre qixxeessinoonniha hala'lado darga leellishanno'nena, hakko qixxeessenke› » yee soyi.

¹⁶Lamunku rosaano katama marte, Yesuusi yiinonsa gede ikke nooha affu. Agure Sa"ate Ayyaani hurbaateno hakko qixxeessitu.

¹⁷Yesuusi hawarrita tonaa lamunku rosaanosi ledo dayi.

¹⁸Hurbaate ittanni heedheenna Yesuusi, «Halaale kuleemmo'ne: Ki'ne giddonni mittu, xa ledo'ya hurbaate itanni noohu, ane sayise aannoe» yii.

¹⁹Insa kunni coyira dadillite mittu mittunku, «Aneeti ikka?» yitu.

²⁰Yesuusi qole, «Xa kune ki'ne tonaa lamunku giddonni mittu, ane ledo gawatetenni tima qasi'ranni no.

²¹Manchi Beetti alba yine borreessinoonni garinni reyanno; Manchi Beetto sayise aannohura hakko manchira kayinni aanne'e! Hakku manchi ilama hoogoommero woyyate» yii.

²²Ittanni heedheenna Yesuusi tima haa're, galatu huuccatto asse, hiiqqaqqe, rosaanosira, «Hii'e, kuni maala'yaati» yee uyinsa.

²³Finiinchono haa're, galatu huuccatto asse kae eennansa, wo'munku finiinchunni aggu.

²⁴Yesuusi, «Lowo manni daafira du'nantannoti tini, gondooru mundee'yaati.

²⁵Halaale yeemmo'ne: Hakko barra Maganu Gashshootira haaro agammo geeshsha, tenne woyinete haqqicho laalonni qixxeessinoonniha layinkimeeshsho diageemmo» yiinsa.

²⁶Hakkunni gedensaanni, galatu faarso faarsite ka'e, Ejedhete Ilaala gooddidhu.

²⁷Yesuusi rosaanosira, «‹Allaalaancho ganeemmo; ge'reewuno billaallanno› yine borreessinoonnina, ki'ne baalunku badhe wodhitinannie.

²⁸Reyotenni kaummohu gedensaanni kayinni, ki'ne balaxe Galiila saeemmo» yiinsa.

²⁹Pheexiroosi, «Wolu baalu nafa badhe wodhihero, ani diagudheemmohe» yee coyi'ri.

³⁰Yesuusi qole, «Halaale yeemmohe: Techo hashsha lukkichu lame hige ganikkinni, ati sase higge, ‹Iso diegennoommo› yaattoe» yiisi.

³¹Pheexiroosi kayinni, «Reyano hasiissannoha ikkiro, ate ledo reemmo ikkinnina, horontanni badhe diwodheemmohe!» yee kaajjishe coyi'ri. Wole rosaano baalano hatto yitu.

³²Hakkunni gedensaanni, Geetesemaane yinanniwa ka'e hadhu. Yesuusi rosaanosi, «Ani Magano huucci'rammo geeshsha, ki'ne konne ofolle» yiinsa.

³³Pheexiroosi, Yaiqoobinna Yohaannisi ledosi haa're ha'rinsa. Hakkiicho hee'reenna lowo yaaddonna dadillu amadisi.

³⁴«Lubbo'ya reyote geeshsha dadillitino. Ki'ne kayinni goxxinikkinni konniicho agarre!» yiinsa.

³⁵Insawiinni alba hige shiqqi yee, uulla uwe, dandaamannoha ikkiro, hatti qarru saate isiwiinni sa'anno gede huucci'ri.

³⁶«Anna, annaanna'ya, ati baalankare dandaatto. Konne qarru finiincho anewiinni hoolie. Kayinnilla, ate hedo gede ikko ikkinnina, ane hedo gede ikkoonke» yii.

³⁷Sasente rosaanosiwa higanno woyite, goxxe noore afi. Kunnira Pheexiroosi, «Simiooni, goxoottoni? Mitte saate nafa geleela didandaatto?

³⁸Jifamate giddora e'inannikki gede jaattine huuccidhe! Ayyaanu qixxaawaho; maalu kayinni daafuraamoho» yii.

³⁹Galagale ha're alba yaanni huucci'ri garinni huucci'ri.

⁴⁰Layinkimeeshsho rosaanosiwa daanno woyite, goxano amaddeennansa mugganni noore afi; insano isira haadhe dawartannore hooggu.

⁴¹Sayikkimeeshshono galagale hige, «Xaano goxxinenna fooliishshidhinella heedhinoonni? Xaate ikkino; yanna iillitinona, Manchi Beetto cubbaataammu angara sayinse uyinanni.

⁴²Ka'e ha'nona, sayise aannoehu kuneeti dayinona» yiinsa.

⁴³Hakkawoyintenni Yesuusi tenne coyi'ranni hee'reenna, tonaa lame rosaanosi giddohu mittu Yihudi kae dayi. Isi ledo bisenna dulla anga adhinohu lowo manni no. Kuni manni qeesootu roorrooti, Muse Seeri rosiisaanonna geerru sokkeenna dagginoreeti.

⁴⁴Sayise aannohu Yihudi, «Ani keere haa're sunqeemmohu isootina amadde. Seekkitine amaddine haadhine hadhe!» yee malaate uyinsa.

⁴⁵Yihudi Yesuusiwa daanni hee'renni, «Rosiisaancho'ya» yee sunqisi.

⁴⁶Hatte yannara Yesuusa amadde usurtusi.

⁴⁷Yesuusi mule uurrite noori giddonni mittichu bise fushshe, qeesootu qari soqqamaanchira macca gane tayisi.

⁴⁸Yesuusi qole, «Mulqi'rannoha amandannihu gede ane amadate bisenna dulla duqqitine daggini?

⁴⁹Barra baala Qullaawa Mine rosiisanni hee'rummo geeshsha, diamaddinoonnie. Kuni ikkinohu kayinni, Qullaawa Borro yitinohu wo'manno gedeeti» yii.

⁵⁰Hatte yannara rosaanosi baala Yesuusa agurte xooqqu.

⁵¹Darbata calla uddi'rinohu mittu wedellichi Yesuusi hoode ha'ri. Amaddasira hasidhuta,

⁵²darbata hune mullichu xooqi.

⁵³Hakkunni gedensaanni, Yesuusa qeesootu qari minira haadhe massitusi. Hakkiicho qeesootu roorrooti baalu, gobbate geerrinna Muse Seeri rosiisaano gamba yite no.

⁵⁴Pheexiroosi qeesootu qari hoowe geeshsha Yesuusiwiinni xeerti're badheenni ha'ranni mari. Hakkiicho agaraasinete ledo ofolle giira giwaa'ranni no.

⁵⁵Qeesootu roorrootinna Aliidi Yoo Mine ofolle noo manni baalu Yesuusa shinanni gede, taje ikkanno coye hasidhu; ikkollana diafidhino.

⁵⁶Lowo manni kaphunni naqqasino; coyinsa kayinni dixaadino.

⁵⁷Mitu mitu kaphunni ka'e,

⁵⁸«‹Ani konne mannu mininoha Maganu mine diige, sasu barri giddo wole angatenni minnoonnikkiha mineemmo› yaanna macciishshinoommo» yitu.

⁵⁹Hatto yiteennano coyinsa horontanni dixaadino.

⁶⁰Qeesootu Roorrichi gotti yee mereeronsa uurre, «Qolattori dinoheni? Kuni manni ate aana coyi'ranni noo coyi maati?» yee Yesuusa xa'mi.

⁶¹Yesuusi kayinni mittoreno qolikkinni sammi yii. Qeesootu Roorrichi lede, «Maassamino Magani Beetti, Kiristoosi ateetini?» yee xa'misi.

⁶²Yesuusino, «Ee, aneeti. Manchi Beetti Wo'manka Dandaanno Maganira qiniiteenni ofollannanna, gordu gomichinni daanna la'inanni» yii.

⁶³Qeesootu Roorrichi hanqunni uddanosi dare, «Wole naqaashshe mayira hasi'neemmo?

⁶⁴Kuneeti, Magano xonanna macciishshitinoonni; xa ma lawanno'ne?» yii. Duuchunku, «Reyona!» yitu.

⁶⁵Mitu anja tuffanni, alba guggushshite gantanni, «Hanni masaali! Ganihehu ayeti?» yitusi. Agaraasineno qawaaddanni haadhe hadhusi.

⁶⁶Pheexiroosi Qeesootu Roorrichi minira eelaanni hoowete giddo hee'reenna, mitte Qeesootu Roorrichi borojjicho ka'e daggu.

⁶⁷Ise Pheexiroosi giira giwaa'ranna xunsite la'e, «Atino Naaziretete Yesuusi ledoho» yitusi.

⁶⁸Isi kayinni, «Ani diegennoommo; ati yaattare diafoommo» yee moromi. Hatto yiihu gedensaanni nafarira fuli; hakka woyite lukkichu gani.

⁶⁹Beetto Pheexiroosi la'e, hakko uurritinorira, «Kunino insa widooti» yite ledde coyidhu.

⁷⁰Isi kayinni lede moromi. Shiima yanna gedensaanni, hakko uurre noo manni Pheexiroosi, «Galiilu mancho ikkootto daafira, addaho atino insa widiho» yitusi.

⁷¹Isi kayinni, umosi xo'nanni, «Konne yitinanni mancho ani diegennoommo!» yee xaari.

⁷²Hakkawoyintenni lukkichu layinkimeeshsho gani. Pheexiroosi, «Lukkichu layinkimeeshsho ganikkinni sase higge ‹diegennoommosi› yaattoe» yee Yesuusi coyi'rino qaali qulli yeennasi heqqifate wi'li.