Read Sidama_Qullaawa _Maxaafa MAARQOOSI 2 Bible Online

MAARQOOSI 2 - Sidama_Qullaawa _Maxaafa bible

MAARQOOSI 2

¹Shiimu barri gedensaanni Yesuusi galagale Qifirinahoomi Katama dayi. Mannuno Yesuusi hakkiicho mitto mine noota macciishshi.

²Hakkiicho mannu mine wo'meenna nafaru nafa ruukki. Isino mannaho qaale kuli.

³Hatte yannara, shoolu manchi mitto laanshaawa mancho dukke Yesuusiwa abbitu.

⁴Mannu bati'rino daafira Yesuusiwa shiqqi yitanno doogo hoogge isi noo taalo la'e mine qalcho murte, mancho rerentenni dirrissu.

⁵Yesuusi amma'nansa afe laanshaawa mancho, «Beetto'ya, cubbikki aguraminohe» yiisi.

⁶Hakko ofolte noori mitu mitu muse Seeri rosiisaano wodaninsanni,

⁷«Kuni manchi Magano xonanni no; Magano agurranna mannu cubbo agura dandaannohu wolu nooni?» yite heddu.

⁸Hakkawoyintenni Yesuusi giddonsata afe, «Wodani'nenni konne coye mayira heddinanni?

⁹‹Cubbikki aguraminohe› yaatenna, ‹Ka'e rerekki duqqite hari!› yaate woyite shonte hiitti roortanno?

¹⁰Manchi Beettira uullate aana cubbo agurate roorre noosita egentinanni gedeeti» yii.

¹¹Manchono, «Ka'e rerekki duqqite minikkira ha'ri» yiisi.

¹²Laanshaawu manchi hakkawoyintenni kae reresi duqqe, mannu baalu la"anna fuli. Kunnira mannu baalu dhagge assi're, «Togoo coye anfe diegenninoommo» yaanni Magano galati.

¹³Yesuusi galagale baaru mulira marita, mannu baalu isiwa shiqqi yeenna rosiisinsa.

¹⁴Hakkaanni hige sae ha'ranni hee're, Ilfiyoosi beetto Leewi qaranxanni daasira ofolle nooha afe, «Hoode'ya amo» yiisi. Isino kae hoodesi ha'ri.

¹⁵Hakkunni gedensaanni Yesuusi Leewi minira mare, sagalete ofolli. Lowo mannino hoodesi ha'ranni no. Hakko manni giddonni lowo qaraxaasinenna cubbaataammu Yesuusinna rosaanosi ledo sagalete ofoltu.

¹⁶Muse Seeri rosiisaano Farisootu, Yesuusi qaraxaanotenna cubbaataammu ledo sagale itanna la'e, «Isi qaraxaasinetenna cubbaataammu ledo itannohunna agannohu mayiraati?» yite rosaanosi xa'mitu.

¹⁷Yesuusi konne coye macciishshe, «Dhiwantinorira ikkinnina fayyaaleeyyete xagisannohu dihasiisannonsa. Ani cubbaataamma ikkinnina, keeraano woshshammora didayommo» yiinsa.

¹⁸Yohaannisi rosaanonna Farisootu Maganittete qatuma qatuntanno. Shiimu manni Yesuusiwa daye, «Yohaannisi rosaanonna Farisootu Maganittete qatuma qatuntanna, ate rosaano qatuma gibbannohu mayiraati?» yee xa'misi.

¹⁹Yesuusino daware, «Seenne adhannohu ledonsa hee'reenna albisootu qatuntannoni? Dee'ni, diqatuntanno. Seenne adhannohu insa ledo hee'reenna qatuma dihasiissannonsa.

²⁰Ikkollana seenne adhannoha insawiinni haa'ne hoollanni yanna dagganno. Hatte yannara qatuntanno.

²¹«Akkala uddanora haaro qaafficho digannanni. Hatto assiniro, haaru qaaffichi akkala uddano daranno. Dadhamaseno albinni roore ikkitanno.

²²Haaro woyinete xajje akkalu ogorira diworranni; worriha ikkiro kayinni, ogoru dhoohanno; woyinete xajjeno du'nantanno; ogoruno kaa'lannori nookkiha ikkanno. Kunnira, haaro woyinete xajje haaru ogorira worranni» yiinsa.

²³Yesuusi Ayihudete Fooliishsho Barra laalino gidi giddoonni sa"anna, ledosi noo rosaano hadhanni heedhe shoye tattayisse ittu.

²⁴Farisootu kayinni, «Rosaanokki Fooliishshote Barra hoolloonnire mayira assitanno?» yite xa'mitu.

²⁵Yesuusino qole, «Daawiti mannisi ledo hee're hudi'ri yannara, assinore diaffinoonni?

²⁶Abiyataari Maganu mini qeesootira roorricha ikke noo yannara, Daawiti Maganu Minira e"e, qeesoota callaho fajjinoonniha qullaawa tima itino; ledosi noo mannirano uyino» yiinsa.

²⁷Qoleno, «Fooliishshote Barri mannaho kalaqaminota ikkinnina, mannu Fooliishshote Barrira dikalaqamino.

²⁸Kunnira, Manchi Beetti Fooliishshote Barrira nafa Mootichaho» yiinsa.