Read Sidama_Qullaawa _Maxaafa MAARQOOSI 3 Bible Online

MAARQOOSI 3 - Sidama_Qullaawa _Maxaafa bible

MAARQOOSI 3

¹Wole yannara Yesuusi Ayihudootu xaadi minira galagale ei. Hakkiicho mittu anga laanshaawino manchi no.

²Yesuusi aana yorto afidhinori, «Fooliishshote Barra hursannoro hanni anfeemmona» yite agartu.

³Yesuusi anga laanshaawa mancho, «Ka'e mannu albaanni uurri!» yiisi.

⁴Hakkiinnino aanche, «Seeru garinni Fooliishshote Barra danchanso busha loosate fajjinoonni? Lubbo gatisatenso hunate fajjinoonni?» yee xa'minsa. Insa kayinni tenne te'enne diyitino.

⁵Yesuusi wodaninsa dillaawara dadille, hakko noo manna hanqu illenni lae mancho, «Angakki diriirsi!» yiisi. Yiino gede assita, manchoho anga hurtusi.

⁶Hakkawoyintenni Farisootu Yesuusa huntanno gara Heeroodisi manni ledo amaalantu.

⁷Yesuusi rosaanosi ledo Galiilu Baariwa ha'ranna, Galiilunninna Yihudunni dayinohu lowo manni hoodesi dayi.

⁸Loosino dhagge macciishshite, Yihudunni, Yerusaalametenni, Edoomi gobbanninna Yordaanoosi Wayira soojjaatoonni noo gobbanni, Xiroosinninna Sidoonunni kiiro batinyu manni isiwa dayi.

⁹Mannu bati'rino daafira cifame tuttugannosikki gede rosaanosi, «Yowolo shiqqi asse"e!» yiinsa.

¹⁰Lowo manni dhibba hurino daafira dhibbu qarrisino manni baalu iso kisara yee mimmito tuttugi.

¹¹Busha ayyaanna iso affanno woyite albasiinni ubbanni, «Ati Maganu Beettooti» yitanni lowo geeshsha raartu.

¹²Isi kayinni ewelummasi mannaho hasaabbannokki gede duu're kulinsa.

¹³Yesuusi ilaala fuli yannara, hasi'rinonsare isiwa woshshinsa. Insano isiwa daggu.

¹⁴Isi ledo heedharanna qaalesi kultara hasi're tonaa lamenka doori. Su'mano, «Soqqamaasine» yee fushshinsa.

¹⁵Durriisa fushshitanno roorreno uyinsa.

¹⁶Tonaa lamunku dooranturi: Pheexiroosi yee su'ma fushshihu Simiooniiti,

¹⁷Boanargeesi woy banqote oosooti yee su'ma fushshiri Zebidewoosi ooso Yaiqoobiitinna Yohaannisiiti,

¹⁸Indiriyaasiiti, Filiphoosiiti, Bertelemewoosiiti, Maatewoosiiti, Toomaasiiti, Ilfiyoosi beetti Yaiqoobiiti, Taadewoosiiti, gobbasira laalaataanchu Simiooniiti,

¹⁹Yesuusa sayise hirihu Asiqorootichu Yihudaati.

²⁰Yesuusi rosaanosi ledo minira eita, xaano lowo manni hoodensa noo daafira sagale ita nafa didandiitino.

²¹Yesuusa, «Wodana difayyino» yinanni duduwo macciishshe, fiixisi iso amade haa're ha'rara dayi.

²²Yerusaalametenni dagginori Muse Seeri rosiisaano, «Giddosi Bielizebuuli[3] no. Durriisa fushshannohu durriisu roorrichi wolqanniiti» yite hasaabbu.

²³Yesuusi isiwa woshshe masalsanni, «Sheexaanu Sheexaane hiitto asse fushshanno?

²⁴Isi isiniiwa giwamanno gashshooti kaajje hee're diafanno.

²⁵Mittu mini mannino mimmitu ledo giwamannoha ikkiro, billaallannota ikkinnina kaajje dihee'ranno.

²⁶Sheexaanuno isi isiniiwa giwamiro ba"annota ikkinnina hee're diafanno.

²⁷«Hakkiinnino sairo, mittu wolqaataamu manchi mine e'ne, balanxe minu anna usurrikkinni jajjasi adha didandiinanni. Usurrihu gedensaanni kayinni dandiinanni.

²⁸«Halaale yeemmo'nena, mannaho loosanno cubbonna xonanno xono agurranni.

²⁹Qullaawa Ayyaana xoninohura baalaho kayinni hegere asale ikkannosi ikkinnina horontanni saosi diagurantannosi» yiinsa.

³⁰Yesuusi hatto yee coyi'rinohu, «Giddosira bushu ayyaani eino» yitino daafiraati.

³¹Yesuusi amanna roduuwisi isiwa marte gobbaanni heedhe, «Ninkewa amo!» yite manna sokke woshshiishshu.

³²Mulesi ofolle noo manni, «Kuneeti amakkinna roduuwikki ate hasidhe gobbaanni uurrite no» yite kultusi.

³³Isi qole, «Ama'ya ayiti? Roduuwi'ya ayeooti?» yiinsa.

³⁴Mulesi ofolte noori widira hige la"anni, «Ama'yanna roduuwi'ya kuriuuti.

³⁵Maganu hedinore wonshannohu baalu anera labbaa rodoo'yaati, meyaa rodoo'yaatinna ama'yaati» yiinsa.