Read Sidama_Qullaawa _Maxaafa MAARQOOSI 4 Bible Online

MAARQOOSI 4 - Sidama_Qullaawa _Maxaafa bible

MAARQOOSI 4

¹Yesuusi galagale baaru mule rosiisi. Lowo manni isiwa daye gamba yiita, isino baaru giddo noo yowolora ofolli. Mannu baaluno hakkiicho baaru gama ofolle no.

²Isino masalsanni lowo coye rosiisinsa.

³Rosiisinsa yannarano, «Hanni macciishshe, mittu manchi wixa wixi'rara fuli.

⁴Wixa wixi'ranni hee'reenna, mitu mitu gumi doogote gama uwi; ceano dagge xinqite ittu.

⁵Wolu gumi bushshu qawaaxxisinokkiwa carete aana uwi. Lowo bushshi nookki daafira, mulenni mu'ri.

⁶Arrishsho iibbituta kayinni qoori; rumushsho afi'rinokki daafira mooli.

⁷Wolu qole utu giddo uwi. Mu'rihu gedensaanni utu fuge amadeenna gumiweele gati.

⁸Wolu gumi dancha shaqqado baattora uwe mu'ri. Lophe dancha gumano laali; mittu 30, mittu 60, mittu 100 laali» yii.

⁹Yesuusi xaano lede, «Macca noohu macciishsho!» yiinsa.

¹⁰Yesuusi callisi hee'reenna, rosaanosinna wolu manni coyi'rino masalo tiro maatiro xa'mitusi.

¹¹Yesuusi daware, «Ki'nera go'linoha Maganu gashshooti coye afate hayyo uyinoonni'ne. Gobbaanni noorira kayinni masalsatenni kullanninsa.

¹²Hatto ikkannohuno, « ‹Insa Maganunniwa higgeenna, cubbo agurransara, la'anni heedhenni dibuuxxannoreeti; macciishshitanni heedhenni diwodanchitannoreeti› yinoonni garinniiti» yiinsa.

¹³Yesuusi, «Kuni lawishshi dileellino'ne? Konne afa hoogginiro, wole masalubba hiitto assitine affinanniyya?

¹⁴Wixannohu Maganu qaale wixanno.

¹⁵Mitu mitu manni, doogote gama uwi wixi lawishshaati; qaale macciishshitanni heedheennanni Sheexaanu daye wodaninsa giddonni macciishshitino qaale xinqe adhanno.

¹⁶Carete aana uwino wixi masalo, qaale macciishshite hakkawoyintenni hagiidhite adhitannore kulannoho.

¹⁷Rumushshu noonsakki daafira shiima yannalla keeshshitanno. Maganu qaali daafira qarrunna xiiwama iillitunsaro mulenni gufidhe ubbanno.

¹⁸Utu mereero uwino wixi masalo, Maganu qaale macciishshitu gedensaanni,

¹⁹tenne gobba hedo, jirote baxillinna wole yorto wodaninsa giddora e'e, macciishshitino qaale beeshshiteenna gumiweelte gattannore kulanno.

²⁰Shaqqado baattora uwino wixi masalo kayinni, qaale macciishshite wodanchitannore kulanno. Kunni garinni mittu 30, mittu 60, mittu 100 guma laaltanno» yiinsa.

²¹Qoleno Yesuusi, «Xawanni noo caabbicho googidete giddo woy daallasaho woroonni worrannini? Worrannihu dixawe leellanno dargaati?

²²Hattono maanxoonnihu leellikkinni digatanno. Go'linohu xawo fulikkinni dihee'ranno.

²³Xa kayinni macca noohu macciishsho» yiinsa.

²⁴Xaano lede, «Macciishshitinanni coye wodana asse! Woleho safartine uyitinanni safaraanchinni safarranni'ne; hakkiinnino sayinse uyinanni'ne.

²⁵Noohura lendannisi; noosikkihuwiinni kayinni hakkonnenni haa'ne hoollanni» yii.

²⁶Yesuusi lede, «Maganu Gashshooti mittu manchi baattote aana wixa wixanno manchi lawishshaati.

²⁷Manchu wixa wixi're goxe gale soodo kae la"anno. Wixino wixi hiitto ikkeetiro afikkinni mu're lophanno.

²⁸Baatto umise wixa mu'risseenna, agashsho kalaqi're, agashshote aana guma laalanno.

²⁹Gidu laale iillanni hee'reennanni, manchu haanto haa're midanno» yii.

³⁰Yesuusi lede coyi'ranni, «Maganu Gashshoote mayinni lawinseemmo? Woy mayinni masalsine kulleemmo?

³¹Maganu gashshooti shiima guma lawanno. Hakku gumi winxanni yannara baattote aana noo gumi baalunkunni ajinoho.

³²Winxihu gedensaanni kayinni lophe, wole haqqe rooranno. Cea minna mini'te heedhanno geeshshita jajjabba sinna fushshanno» yii.

³³Yesuusi mannu wodancha dandaanno deerrinni, lowotenni kunni gari masalsanni qaale kulinsa.

³⁴Masalsikkinni mittoreno dirosiisinonsa. Rosaanosi calluwu noo woyite kayinni masalote tiro kulannonsa.

³⁵Hatte hawarro Yesuusi rosaanosi, «Amme baara widoonni fullona!» yiinsa.

³⁶Manna hakkiicho agurte ofolle noo yowolora hee'reennanni Yesuusa haadhe hadhu. Wole yowollano ledo no.

³⁷Baaru aana hadhanni heedheenna lowo bubbe ka'e dambala kayisseenna, yowolote wayi wo'mi.

³⁸Hatte yannara Yesuusi yowolote badhiidi kifilera barko barki're goxe nooha rosaanosi baqqi assite, «Rosiisaancho, wayi itannanke sammi yaatto?» yitu.

³⁹Isino kae bubbe ufe, «Uurri! Gabbi yii» yee rufita, bubbe uurriteenna lowo geeshsha ga'labbi yii.

⁴⁰Yesuusi rosaanosi, «Togo mayira waajjitinanni? Xaa geeshsha amma'na dino'ne?» yiinsa.

⁴¹Insano lowo geeshsha waajjite mimmitoho, «Kuni bubbenna dambalu hajajamannosihu isi ayiti?» yitu.