Read Sidama_Qullaawa _Maxaafa MAARQOOSI 8 Bible Online

MAARQOOSI 8 - Sidama_Qullaawa _Maxaafa bible

MAARQOOSI 8

¹Hatte yannara wolu lowo manni daye gamba yii; itannore kayinni diafi'rino. Hakka woyite Yesuusi rosaanosi woshshe,

²«Kuni manni ane ledo sase barra keeshshino; ittanno sagaleno nookki daafira mararoommonsa.

³Ittukkinni ha'risummonsaro, doogo shaqqite ubbanno; insa giddonni mitu mitu xeertotenni dagginoreeti» yii.

⁴Rosaanosi kayinni, «Hatto ikkiro, tenne halallitte gobbara kageeshshi mannira ikkitanno sagale maminni abbinanni?» yitu.

⁵Yesuusi qole, «Meu timi noo'ne?» yiinsa. Insano, «Lamalu timi noonke» yitu.

⁶Yesuusi mannu uulla ofollanno gede hajaje, lamalanka tima haa're, galatu huuccatto assi. Timmano hiiqqaqqe, mannaho iillishshanno gede rosaanosira uyi; insano mannaho iillishshu.

⁷Rosaanosira boodu shiimmaaddu qulxu'mino noonsa; Yesuusino lede galatu huuccatto asse, mannaho iillishshanno gede rosaanosira kuli.

⁸Mannu sagale ite duuweenna, gatino giggilo gamba assine, lamala soro kayinsi.

⁹Itino manni shoolu kumi geeshsha ikkanno. Manna ha'rise kae,

¹⁰Yesuusi hakkawoyintenni rosaanosi ledo yowolote ofolle, Dalmanuuta yinanni gobba ha'ri.

¹¹Farisootu Yesuusiwa dagge xa'mo shiqishshusi. Jiffe la'asira yite gordunni malaate leellishansara hasidhu.

¹²Yesuusi hakka woyite giddo qole ure, «Tini ilama mayira malaate hasidhanno? Halaale kuleemmo'nena, tenne ilamara horonta mitto malaateno dileellinshanninsa» yii.

¹³Hatto yee, insa agure galagale yowolote ofolle baara widoonni fule ha'ri.

¹⁴Rosaanosi sinqe adhitukkinni habbe hadhino daafira, yowolote giddo mittu timi callu noonsa.

¹⁵Yesuusi insara, «Farisootunna Heeroodisi gamaancho seekkitine qorophe!» yiinsa.

¹⁶Insa insanaawa, «Togo yaannonkehu anga sinqe adha hoongoommohuraati» yite hasaabbu.

¹⁷Yesuusi hedonsa afe, «‹Sinqe anga hoongoommohuraati› yitine mayira heddinanni? Xaa geeshsha mittorenni diaffinoonni; diinobuuxxinoonni? Wodani'ne xaano dillaawella no?

¹⁸Ille heedheenna'nenni dila'inanni? Macca heedheenna'nenni dimacciishshitinanni? Qulli diyaanno'ne?

¹⁹Onte tima ontu kumira hiiqqaqqe iillishummo woyite, me"e soro wo'ma kayissini?» Insa qolte, «Tonaa lame» yite qoltu.

²⁰«Lamala tima shoolu kumi mannira iillishummo woyite, me"e soro wo'ma kayissini?» yee xa'minsa. Insa qolte, «Lamala» yite dawartu.

²¹«Xaano dibuuxxinoonni?» yiinsa.

²²Beetesayida yinanni qacha iillituta, mannu mitto illiweelo mancho Yesuusiwa haa're abbi. Angano aanaho worannosi gede Yesuusa huucci.

²³Hakka woyite Yesuusi illiweelo mancho anga amade, massage qachu gobbaanni fushshi. Illesira anja tufe, angasi aanaho wore, «Mitiri leellannoheri no?» yee xa'misi.

²⁴Illiweeluno haxo gotti yee lae, «Mannu leellanni nooe; ikkollana ha'rantanni noo haqqe lawannoe» yii.

²⁵Xaano Yesuusi angasi manchu ille aana wori. Manchuno ille hure, baalankare lae buuxi.

²⁶Hakkunni gedensaanni Yesuusi, «Galagalte qacha martooti!» yee minisira ha'ranno gede kulisi.

²⁷Yesuusi rosaanosi ledo, Filiphoosi Qiisaariyu Katami mule noo qacha dayi. Hadhanni heedheenna Yesuusi rosaanosi, «Mannu ane ayeti yaanno?» yee xa'minsa.

²⁸Insa qolte, «Mitu, ‹Cuuaancho Yohaannisiiti› yaannohe; wolu kayinni, ‹Eeliyaasiiti› yaannohe; wolu qole, ‹Himanaanote giddonni mittichoho› yaannohe» yite dawartu.

²⁹«Ki'ne ayeti yitinannieyya?» yee xa'minsa. Pheexiroosi qole, «Ati Kiristoosiiti» yiisi.

³⁰Yesuusi hakka woyite mannaho kultannokki gede hajajinsa.

³¹Yesuusi rosaanosira, «Manchi Beetti qarra baala adhanna geerru, qeesootu roorrootinna Seeru rosiisaano alba mishama hasiissinosi. Hakkunni gedensaanni insa shitannosi; ikkollana sayikki barra ka"anno» yee rosiisinsa.

³²Konne coye xawise coyi'ri. Pheexiroosi kayinni Yesuusa bade qacce fushshe hayi yaasira wo'naali.

³³Yesuusi kayinni caaqqi yee rosaanosi lae, «Pheexiroosi, ati Sheexaanu albi'yanni ho'li! Ati mannunnita ikkinnina Maganunnita dihedatto» yee rufisi.

³⁴Hakkunni gedensaanni Yesuusi lowo manni ledo rosaanosi woshshe, «Hoode'ya ha'ra hasi'rannohu, umisire agure, masiqalasi duqqe hoode'ya dayo!

³⁵Lubbosi gatisi'ra hasi'rannohu baalu hu'nanno; lubbosi aneranna Danchu Duduwira yee hunannohu baalu kayinni gatisi'ranno.

³⁶Manchu gobba baalate jiro afi're lubbosi hu'niro, ma lexxanno?

³⁷Woy kayinni lubbosi gatisi'rate maricho aanno?

³⁸Tenne fooranna cubbaataame ilama giddo, anenna qaale'ya fokkannoha baala, Manchi Beetti annisi ayirrinyinni qullaawa sokkaasine ledo daanno waro fokkannosi» yiinsa.