Read Sidama_Qullaawa _Maxaafa LUQAASI 1 Bible Online

LUQAASI 1 - Sidama_Qullaawa _Maxaafa bible

LUQAASI 1

¹Ayirradu Tewofiloosi: Ninkera mereero ikkino coye kultanno dhagge albaanni lowo manni borreessino.

²Tenne sokka ninkera sayissinori illetenni affinoreetinna qaalisira soqqantanni heedhinoreeti.

³Kunnira ani uminni kayise baalanka coye xiinxalle laummohu gedensaanni dhagge aante aantetenni borreessammohera hasi'roommo.

⁴Togo assoommohuno rosootto rosi halaalaancho ikkinota seekkite afatto gedeeti.

⁵Heeroodisi Yihudu gobbara moohe hee'reenna, Abiya qeesooti gaamo giddo, Zakkaariyaasi yinannihu mittu qeesichi no. Isira Aarooni sircho ikkitannoti Elsaabeexi yinanni galte noosi.

⁶Lamunku Maganu albaanni hajajosinna Seerasi minshanniri nookki garinni agadhitanni keeraanchimmatenni heedhino.

⁷Ikkollana, Elsaabeexi gaana ikkitinohura ooso dinonsa. Lamunku lowo geeshsha geedhitino.

⁸Hatte yannara Zakkaariyaasira qeesootu gaamo soqqanshora bado iilliteennasi, Maganu albaanni qeesimmate soqqansho soqqamanni no.

⁹Qeesootu assitanno rosi garinni Maganunnihu Qullaawu Minira e"e hixaana giirate hixu iillisi.

¹⁰Qullaawa Mine hixaana giirranni yannara mannu baalu gobbaanni uurre huucci'ranno.

¹¹Maganu sokkaasinchi hixaana giirranni dargira qiniiteenni uurre Zakkaariyaasira leelli.

¹²Zakkaariyaasi sokkaasincho afi yannara waajje huxi'ri.

¹³Sokkaasinchu kayinni, «Zakkaariyaasi, waajjitooti! Maganu huuccattokki macciishshino; galtekki Elsaabeexi labbaa beetto iltannohe. Su'mano Yohaannisi yite fushshattosi.

¹⁴Isi ilama atera hagiirrenna hisanyoote ikkitannohe. Isi ilamanni lowo manni hagiidhanno.

¹⁵Isi Mootichu albaanni jawa ikkanno. Woyinete xajjenna wole dimbisanno agono diaganno. Amasi godowi giddo hee'reennanni Qullaawu Ayyaani wo'mannosi.

¹⁶Isi Israeelete giddonni lowo manni Mootichu Maganinsawa higanno gede assanno.

¹⁷Himanaanchu Eeliyaasi gede Ayyaanunninna wolqatenni wo'me, annuwate wodana oosonsa widira, hajajamannokki manni wodana keeraanote afa widira soorranno; manna jawaachishe Maganoho qixxeessanno» yii.

¹⁸Zakkaariyaasi kayinni sokkaasinchoho, «Kuni coyi ikkannota mayinni afeemmo? Ani geedhoommo; galte'yano akkaltino» yii.

¹⁹Sokkaasinchuno, «Ani Maganu albaanni uurreemmohu Gebirieeliiti. Konne dancha duduwo kulammohera Maganuwiinni soqqame dayommo.

²⁰Ati kayinni yannasira wo'mannoha qaale'ya diammanootto. Kunnira, kuni kulummohe coyi baalu wo'ma geeshsha danqicha ikkatto; coyi'rano didandaatto» yiisi.

²¹Hakko mereero mannu Zakkaariyaasi agaranni no; Qullaawu Mininni fulikkinni keeshshasi kayinni dhagge ikkitinonsa.

²²Zakkaariyaasi Qullaawu Mininni fuli yannara mannu ledo coyi'ra didandiino. Kunnira insa Qullaawa Mine ajuuja leeltinosita affu. Isi afuunni coyi'ra hoogino daafira angatenni malaatisanni kulinsa. Hakko garinni danqicha ikke keeshshi.

²³Zakkaariyaasi Qullaawu Mini soqqansho gudihu gedensaanni minisira ha'ri.

²⁴Shiima yanna gedensaanni galtesi Elsaabeexi godobbu. Onte agana wo'ma geeshsha mine keeshshitino.

²⁵«Mootichu konne coye assinoe; mannu mereero noota mishama'ya hoolinoe» yitu.

²⁶Elsaabeexi godobbuhunni leelki aganira sokkaasinchu Gebirieeli Maganuwiinni soqqame Galiilu gobbara noo katama Naazirete mari.

²⁷Marinohu, Daawiti sircho ikkinohu Yooseefi huucci'rinotewa seemo Maariyaamiwaati.

²⁸Sokkaasinchu isewa daye, «Ati elto wo'mitinoheti, keeru ledokki hee'ro! Maganu ate ledo no. [Ati meentu mereero maassamoottate]» yiise.

²⁹Iseno sokkaasinchu coyi'rino coyi masiseennase, «Kuni hiittoo keereeti!» yitu.

³⁰Sokkaasinchu, «Maariyaami, Maganu albaanni ayirrinye afi'roottana waajjitooti!

³¹Kuneeti, godobbe labbaa beetto ilatta; su'mano Yesuusa yite fushshattasi.

³²Isi jawa ikkanno; Wo'munkura Aliidi Magani Beettootino yinannisi. Mootichu Maganu, annisi Daawitiha ayirrinyu barcima aannosi.

³³Yaiqoobi minirano hegerera moohanno. Gashshootisira gawalo dino» yiise.

³⁴Maariyaami sokkaasinchoho, «Ani seemotena, kuni coyi hiitto ikke ikkanno?» yitu.

³⁵Sokkaasinchu qole, «Qullaawu Ayyaani ate aana dirranno; Wo'munkura Aliidi Magani wolqa caalshiishshannohe. Kunnira ati ilatta qaaqqo Qullaawu Maganu Beetti yinanni.

³⁶Fiixikki Elsaabeexi nafa gaanate yinanna keeshshite, xa kune geedhimmate giddo labbaa beetto godobbeenna lee agana ikke noose.

³⁷Maganu dandaannokki coyi dino» yiise.

³⁸Hakkunni gedensaanni Maariyaami, «Kuneeti, ani Mootichu borojjichootina, ati yootto gede ikkoe» yitu. Hatte yannara sokkaasinchu isewiinni ha'ri.

³⁹Hatte yannara Maariyaami rakke ka'e ilaalaame Yihudu gobbara noo katama hadhu.

⁴⁰Zakkaariyaasi minira marte Elsaabeexi keere haadhu.

⁴¹Elsaabeexino Maariyaami keere macciishshituta, godowise giddo noo qaaqqi kukkubbi. Elsaabeexino Qullaawu Ayyaani wo'meennase,

⁴²qoonqose naggi assite, «Ati meentu baalu giddo maassamoottate. Ati ilattahuno maassaminoho.

⁴³Mootichi'ya ama ane keere haadhara daase, anera mageeshshi ayirrinyeeti!

⁴⁴Ati keere haa'rittaeta godowi'ya giddo noo qaaqqi hagiirrunni kukkubbino.

⁴⁵Mootichu coyi'rinohe coyi wo'mannota ammanoottati ati hiitto ba'raa'roottate!» yituse.

⁴⁶Maariyaami, «Wodani'ya Mooticha galatanno;

⁴⁷lubbo'ya Maganu Gatisaanchi'yanni hagiidhitanno.

⁴⁸Maganu ane hooffayidita borojjichosi towatinoena, xaanni kayisse ilama baala ba'raa'roottate yitannoe.

⁴⁹Wolqaataamu Magani anera jajjabba coye assinoe; su'misino qullaawaho.

⁵⁰Waajjannosi mannira, ilamatenni ilamate geeshsha maarosi halashshanno.

⁵¹Wolqasinni jawaata looso loosino; boonaleeyye wodaninsa hedonni kainohunni billaallisino.

⁵²Ayirradda gashshaano gashshootinsa aaninni dirrise, hooffayidire gotti assino.

⁵³Hudidhinore danchu coyinni duushshino; dureeyye kayinni mulla anganni shorrino.

⁵⁴Annuwankera uyino hexxo wonshate, Abirihaamiranna sirchisira hegerera leellishinota maarosi qaage, borojjichosi Israeeli kaa'lino» yitu.

⁵⁵

⁵⁶Maariyaami Elsaabeexi ledo sasu agani geeshsha keeshshite galagalte qaera higgu.

⁵⁷Yanna iillituta, Elsaabeexi labbaa beetto iltu.

⁵⁸Olliisenna fiixise tenne jawa elle Mootichu assinosetere macciishshe ledose hagiidhi.

⁵⁹Qaaqqu ilamihunni setti barra barcimshiishate wogarano kae dayi. Su'mano annu su'minni Zakkaariyaasi yee fushshate hedi.

⁶⁰Ama kayinni, «Hatto di"ikkanno; su'misi Yohaannisiiti» yitu.

⁶¹Insa qole, «Fiixikki giddo kunni su'minni woshshinannihu dino» yiise.

⁶²Hakkunni gedensaanni anna, «Qaaqqoho su'ma aye yine fushshinara hasi'ratto» yee malaatunni xa'misi.

⁶³Zakkaariyaasi borreessinannire uyinannisi gede xa'mi're, «Su'misi Yohaannisiiti» yee borreesseenna baalunku dhaggeeffati.

⁶⁴Zakkaariyaasi hakkawoyintenni arrawu tidhameennasi coyi'ri; Magano galaxxano hanafi.

⁶⁵Kunninni kainohunni ollaasi waajjillu amadinsa. Duduwuno ilaalaame Yihudu gobba baala iilli.

⁶⁶Konne coye macciishshituri baalu, «Kuni qaaqqi hiittooha ikkaraati ikka?» yite hasaabbu. Kuni ikkinohu Mootichu wolqa ledosi noo daafiraati.

⁶⁷Qaaqqu anni Zakkaariyaasi Qullaawu Ayyaani wo'meennasi,

⁶⁸«Mannasi wode fushshe wolassinona, Israeelete Magani Mootichu galatamo!

⁶⁹Borojjichisi Daawiti sirchinni wolqaataamo Gatisaancho kayisinonke.

⁷⁰Bi're alba qullaawa himanaano widoonni qole,

⁷¹diinnankenna gibbannonkeri anganni gatisannonketa coyi'rino.

⁷²Hatto yiinohu, annuwankera maarosi leellisharanna, coyi'rinoha qullaawa gondooro wonshara hedeeti.

⁷³Konne xaarinoha gondooru qaale, anninke Abirihaamira uyinohu,

⁷⁴diinnanke anganni gatise fushshankeranna, waajjinummokkinni soqqammeemmosi gedeeti.

⁷⁵Kunni garinni hee'noommo diri baalunkunni, Isi albaanni qullaambetenninna keeraanchimmatenni hee'neemmo.

⁷⁶Qolleno, ate beetto'ya, Wo'munkura Aliidi Magani himanaanchooti yinannihe. Atino doogosi seekkate, balaxxe Mootichu albaanni ha'ratto.

⁷⁷Mannisi cubbinsa agurameenna, gatannota kulattonsa.

⁷⁸Maganinke maarannohanna shaqqado ikkinohura, gatote caabbichi gordunni xawannonke gede assanno.

⁷⁹Kuni caabbichi, tunsotenna reyote caalira heedhanno baalira xawanno; lekkankeno keeru doogo widira qole ha'risanno» yee himani.

⁸⁰Qaaqquno lophe ayyaanunni jawaata ikki; Israeelete leella geeshsha halallitte gobbara hee'ri.