Read Sidama_Qullaawa _Maxaafa LUQAASI 10 Bible Online

LUQAASI 10 - Sidama_Qullaawa _Maxaafa bible

LUQAASI 10

¹Hakkunni gedensaanni Yesuusi wole lamalayina lame rosaano doore, isi ha'rara hedino katammanna darga baala alba ikkite hadhanno gede lame lame asse soyi.

²«Gamba assinanni gidi lowoho; gamba assanno manni kayinni shiimaho. Gide gamba assannoha lowo manna soyanno gede, gidu anna huuccidhe!» yee kulinsa.

³Ge'reewu gede hiyyeeyyete giddora soyemmo'nena hadhe.

⁴Hadhinanni woyite woxe gurdi'nannire, ogoro woy koatte anga adhitinoonte. Manna keere haadhinanni doogote yanna huntinoonte.

⁵E'inanni mine baala balaxxine, «Keeru kunni minira ikko» yiiyye.

⁶Hakko mine keere baxanno manchi hee'riro, keeri'ne ledosi hee'ranno. Hakkuyi ka'a kayinni keeri'ne galagale ki'nera higanno.

⁷Loosinohura daafurisi gumi hasiisannosina, uyinoonni'nere ittinanninna agginanni e'inoonni mine keeshshe. Minunni mine sa'inoonte.

⁸Mitto katama martineenna haa'ni'nehu gedensaanni, uyini'nere itte.

⁹Hakko katami giddo noo dhiwamaasine hurse; mannahono, «Maganu gashshooti ki'newa gamba yiino» yitine kulle.

¹⁰Martinoonni katami manni hagiidhe haa'ra giwi'nero, katamu gudumaale fultine,

¹¹«Katami'neta lekkanke buko ganga'ninoommo. Maganu Gashshooti ki'newa gamba yiinota kayinni affe» yiiyyensa.

¹²Halaale kuleemmo'nena, yoote barra hakku katami Soddoomu qorichishamihunni roore qorichishamanno.

¹³«Koraaziini atera aanne'e! Beetesayida atera aanne'e! Ki'ne giddo assinoonni maalale Xiroosinna Sidoona assinoonniha ikkoommero, hakko hee'ranno manni xiddu imaana uddi're, umoho buluulo giggishshi're bi're bi'renni aagintaawe higannohu baino.

¹⁴Yoote barra, qorichu ki'nenni roore Xiroosiranna Sidoonaha shotannonsa.

¹⁵Ati Qifirinahoomino, ufuufante gordo iillootto; ikkollana dirrite gaannaame eatto» yii.

¹⁶Yesuusi rosaanosira, «Ki'nere macciishshannohu anere macciishshannoho; ki'ne giwannohu ane giwinoho; ane giwannohu soyinoeha giwannoho» yiinsa.

¹⁷Lamalayina lamunku rosaano sonkoonniwiinni hagiirrunni higge, «Mooticha, su'mikkinni durriisu nafa hajajaminonke» yitu.

¹⁸Yesuusi qole, «Sheexaanu banqote gede gordunni dirranna afoommo.

¹⁹Hamashshonna idda kaddinanni gede diina qeeltinanni wolqa oommo'ne. Gawajjanno'neri mitturino dino.

²⁰Su'mi'ne gordu taje giddo borreessamino daafira ikkinnina, durriisu hajajamino'nehura hagiidhitinoonte!» yiinsa.

²¹Hatte yannara Yesuusi Qullaawu Ayyaaninni hagiidhe, «Gordunna baattote Mooticha Anna'ya, konne coye egennaammahonna hayyoolete maaxxe affinokkirira leellishootto daafira galaxxeemmohe. Ee, Anna'ya, kuni ati ikkara halchootto coyeti» yii.

²²«Wo'manka coye Anni'ya uyinoe. Beettu ayetiro Anna agurranna afinohu mittuno dino. Beetto agurranna woy Beettu xawise kulinosiha agurranna Anna afannohu mittuno dino» yii.

²³Yesuusi alba rosaanosiwa hige insa calluwaho, «Ki'ne la'inannire la'annori hiitto ba'raadhinoreeti!.

²⁴Lowo himanaanonna mootoolla ki'ne la'inannire la"ate halchite hooggino. Ki'ne macciishshitinannireno macciishshate halchite hooggino» yii.

²⁵Mittu Muse Seeri rosiisaanchi Yesuusa jife la"ara hasi're, «Rosiisaancho, hegere heeshsho afi'rate ma asso?» yee xa'misi.

²⁶Yesuusi qole, «Seeru giddo mayine borreessinoonni? Atino konne Seera ma garinni buuxi'ritto?» yii.

²⁷Manchu daware, «‹Mooticha Maganokki wo'mu wodanikkinni, wo'ma lubbokkinni, wo'ma wolqakkinni wo'ma hedokkinni baxisi. Elokki umikki gede assite baxi› yaanno» yii.

²⁸Yesuusi, «Dawarokki garahona, atino hadhe hatto assi; heeshsho afi'rattona» yiisi.

²⁹Seeru rosiisaanchi isonoo seekki'ranni, «Eli'ya ayeti?» yii.

³⁰Yesuusi qole, «Mittu manchi Yerusaalametenni kae Iyyaarko ha'ranni hee'reenna addifulootu amadde uddi'rinore mulqidhe, ganatenni gawajjite foolu callu giddo nooha agurte hadhino.

³¹Hedeweelcho mittu qeesichi hakkaanni hige sa"anni hee're, konne ganne tungoonni mancho lae shawwu yee sae ha'rino.

³²Mittu Lewaawichino hakkaanni hige dayino. Isino konne mancho lae, shawwu yee sae ha'rino.

³³Mittu Samaarichi kayinni hatte doogo hige ha'ranni kunni manchiwa dayino. Manchono lae mararinosi.

³⁴Manchunniwa shiqqi yee madasira zayitenna woyine buure hoccunni usurinosi. Hakkunni gedensaanni harrichisira wore wosinu fooliishshi'ranno minira masse seekke towatinosi.

³⁵Layinki barra lame kinchu birra fushshe wosinu mini annira ee, ‹Konne mancho towatisi. Galagale kawaanni hige dayemmo woyite isira fushshoottore baala qoleemmohe› yee kulinosi» yii.

³⁶Yesuusi lede, «Kuri sasunku giddo addifulootu gante tuggu manchira elo ikkinosihu hiikkonneeti?» yee xa'misi.

³⁷Seeru rosiisaanchino, «Hakkonne mararisi manchooti» yee qoli. Yesuusi, «Atino hadhe hatto assi!» yiisi.

³⁸Yesuusinna rosaanosi doogo hadhanni heedheenna, Yesuusi Maarta yinanni mancho heedhanno qacha mari. Iseno haadhe minisera eessitusi.

³⁹Isera Maariyaami yinanni rodoo noose. Maariyaami Mootichu lekka mule ofolte rosiisannore macciishshitanni no.

⁴⁰Maarta loossanno loosi bati'reennase daafurtu. Kunnira Yesuusiwa dagge, «Mooticha, rodoo'ya wo'manka looso ane calla'yara worte agurteenna sammi yite la"atto? Dagge kaa'litannoe gede kulise» yitu.

⁴¹Mootichuno, «Maarta, Maarta, ati lowo coyira yaaddanni qarramatta.

⁴²Hasiisannohu mitto coye callaho. Maariyaami dancha coye doodhitino; konne coye isewiinni diadhinannise» yee qolise.