Read Sidama_Qullaawa _Maxaafa LUQAASI 14 Bible Online

LUQAASI 14 - Sidama_Qullaawa _Maxaafa bible

LUQAASI 14

¹Yesuusi Fooliishshote Barra mittu Farisootu roorrichi mine sagale itara ei. Farisootu Yesuusi assannore galaalchitanni no.

²Hatte yannara, mittu biso darshino manchi Yesuusi albaanni no.

³Yesuusi Seeru rosiisaanonna Farisoota, «Fooliishshote Barra hursinannita Seeru aannonso hoolanno?» yee xa'minsa.

⁴Insa kayinni mittoreno didawartino. Yesuusi mancho amade hurse ha'risisi.

⁵Hakkiinni aanche, «Ki'ne giddo harrichu woy handu Fooliishshote Barra balete uweenna, rahe fushshannokkihu nooni?» yiinsa.

⁶Kunni coyirano mittore dawara didandiitino.

⁷Yesuusi jilaho woshshinoonni manni ayirradu dargira beellantanna lae, kunninni aane noo maammaashsha kulinsa:

⁸Mittu manchi adhamate jilira woshshihero, ayirrado darga ofoltooti. Miteekke, atenni roore ayirradu woshshame nooha ikkanno.

⁹Ki'ne lamenka jilaho woshshino manchi daye, «Konne darga isira uyi!» yiihero, ati galagalte lowo saalinni woffi yiino darga marte ofollatto.

¹⁰Jilaho woshshineennahe marte woffi yiino darga ofolte heedheenna woshshinohe manchi daye, «Jaala'ya, kawiinni ka'e amo naggi yiino darga ofolli» yiihero, woshshinoonni wosini baalu giddo ayirrinye ikkannohe.

¹¹Isonoo gotti assannohu, heeshshi yaanno; isonoo heeshshi assannohu, gotti yaanno.

¹²Yesuusi jilu annano, «Barri woy hashshi hurbaatira manna woshshatto woyite, badote jilte woshshitannohere jaallakki, roduuwakki, fiixakkinna dureeyye olliikki manna woshshitooti.

¹³Jila jilatto woyite, buxane, laanshaabbinore, naafootanna illiweeloota woshshi.

¹⁴Hatto assittoro, insa qola dandiitannokki daafira maassamatto. Keeraano ka'anno barrano Maganu bado qolannohe» yiisi.

¹⁵Ledosi sagalete ofolte noori giddonni mittichu Yesuusi coyi'rinore macciishshe, «Maganu Gashshootira jilaho ofollannohu hiitto ba'raa'rinoho» yii.

¹⁶Yesuusi qole, «Mittu manchi jawa jila jile, lowo manna woshshino.

¹⁷Jilu yanna iillituta, ‹Wo'munkuri qixxaawinona jilaho amme› yee kulanno gede jilu anni soqqamaanchosi jilaho woshshinoonni manniwa soyi.

¹⁸Ikkollana, woshshinoonniri jilaho mara gibbara yite, umu umunkunni gajaajji'ra hanaffu. Mittu, ‹Baatto hidhoommona, mare la"a hasiissannoe daafira, daa didandeemmona agurie› yii.

¹⁹Woluno, ‹Onte waaxa handa hidhoommohura, insa leenjishi'rammoraati. Kunnira, daa didandeemmona agurie› yii.

²⁰Wolu qole, ‹Seenne adhoommo daafira daa didandeemmo› yii.

²¹«Soqqamaanchuno galagale hige konne coye baala mootichisira kuli. Minu annino hanqe, soqqamaanchosi, ‹Rakke ka'e katammate doogganna qarruwa marte buxane, laanshaabbinore, illiweelootanna naafoota woshshite abbi!›

²²Soqqamaanchuno hakkawoyintenni hige, ‹Mooticha'ya, hajajoottore baala wonshoommo; ikkollana xaano dargu gate no› yii.

²³Mootichisi qole soqqamaancho, ‹Mannu mine'ya wo'manno gede, katamaho gobbaanni noo doogganna qarruwa marte, wole mannano daanno gede assi.

²⁴Halaale kuleemmo'nena, hakkuri woshshummori giddonni mittu nafa jila'ya hinkotenni diqasanno› yiino» yii.

²⁵Lowo manni Yesuusi ledo ha'ranni hee'reenna Yesuusi alba insawa hige,

²⁶«Anewa daannohu annasi, amasi, galtesi, oososi, meyaanna labbaa roduuwasinna heeshshosi anenni roorse baxannoha ikkiro, rosaancho'ya ikka didandaanno.

²⁷Masiqalasi duqqe hoode'ya daannokkihu, ane rosaancho ikka didandaanno.

²⁸«Ki'ne giddonni mittu mine mi'nara kairo, mageeshshi woxi hasiisannosiro, ikkanno geeshshi woxi noosironna hoongosiro ofolle dimalanno?

²⁹Gaata dadhe kae mi'ne guda hoogeenna minu doogo uurre gatannoha ikkiro, sa"annohu baalu qacifatannosi.

³⁰‹La'e kuni manchi mine hanafi're kae guxxa hoogino› yaanni qacifatannosi.

³¹«Tonnu kumi olanto noosi moote lemuu kumi olanto noosihu ledo olama hasi'riro, dandaannotanna hoogannota ofolle dima'lanno?

³²Dandaannokkiha ikkiro kayinni balaxe xeertote hee're, manna soqqe araara amadanno.

³³Hattonni ki'ne giddo ayino afi'rinore baala ane daafira yee agura hoogiro, ane rosaancho ikka didandaanno» yii.

³⁴Yesuusi qole, «Maxine danchate; maxinimmase muude hoogguro kayinni mayinni coommitanno?

³⁵Baattote woy ha'rishshate ikkitannokki daafira, fushshine hunnanni. Macca noohu macciishsho!» yii.