Read Sidama_Qullaawa _Maxaafa LUQAASI 22 Bible Online

LUQAASI 22 - Sidama_Qullaawa _Maxaafa bible

LUQAASI 22

¹Agure Sa"ate Ayyaanaati yinanniha Timu Ayyaana ayirrinsanni yanna iillite no.

²Qeesootu roorrootinna Seeru rosiisaano manna waajjitino daafira Yesuusa amadde shitanno doogo hasidhanni no.

³Hatte yannara tonaa lamente rosaanosi giddonni mittu Asiqorootichu Yihudira Sheexaanu ei.

⁴Kunnira Yihudi qeesootu roorrootiwanna Qullaawu Mini agaraasine hajajjannoriwa mare Yesuusa hiitto asse sayise aannonsaro insa ledo amaalami.

⁵Insano konne coye macciishshite, lowo geeshsha hagiidhite, woxe uyitasira sumuu yitu.

⁶Isino sumuu yiihu gedensaanni sayise aate, injo hasi'ranni agari.

⁷Hakkunni gedensaanni Agure Sa"ate Ayyaani ge'recho gorri'nannihu Timu Ayyaani iilli.

⁸Yesuusi, «Agure Sa"ate Ayyaaniha hashshi hurbaate inteemmowa hadhine biddi assenke» yee Pheexiroosinna Yohaannisi soyi.

⁹Insano, «Mamiicho biddi assinammora hasi'ratto?» yite xa'mitusi.

¹⁰Isino, «Katama e'inanni woyite, wayi gambayicho duhe noo mancho affinannina isi faana hadhine, eanno minira marre.

¹¹Minu annano, ‹Rosiisaanchinke, «Rosaano'ya ledo Agure Sa"ate Ayyaaniha hashshi hurbaate iteemmo mini hiikkonneeti?» yiino› yiiyye.

¹²Isino minu aana minnoonnihura layinki minira karre qixxeessinoonniha hala'lado darga leellishanno'nena, hakko biddi assenke» yee soyi.

¹³Lamunku rosaanosi marte, baalunku coyi Yesuusi yiinonsa gede ikke nooha affu. Agure Sa"ate Ayyaani hurbaateno hakko qixxeessitu.

¹⁴Intanni yanna iillituta Yesuusi soqqamaasinesi ledo sagalete ofolli.

¹⁵Soqqamaasinesirano, «Qarru iillaera albaanni ki'ne ledo konne Agure Sa"ate Ayyaani hurbaate itammora halchoommo.

¹⁶Kuleemmo'nena, Maganu Gashshooti giddo xawo fula geeshsha, kunni ka'a konne Agure Sa"ate Ayyaani hurbaate horontanni di"iteemmo» yiinsa.

¹⁷Hakkunni gedensaanni Yesuusi finiinchono haa're, galatu huuccatto asse kaihu gedensaanni, «Hii'e, konne beeqqe!

¹⁸Halaale kuleemmo'nena, xaanni kayise Maganu Gashshooti daa geeshsha konne woyinete laalonni qixxeessinoonni agatto diageemmo» yiinsa.

¹⁹Yesuusi timano haa're, galatu huuccatto asse, hiiqqaqqe, «Hii'e, kuni ki'nera aamaminohu maala'yaati; konne ane qaaggora assidhe!» yiinsa.

²⁰Hurbaatu gedensaanni finiinchono kayise, «Kuni finiinchi ki'ne daafira du'nantanno mundee'yahu haaro gondoorooti.

²¹«Ikkollana, kuneeti sayise aannoe manchi ane ledo sagalete ofolle no.

²²Manchi Beetti alba hirqinoonni garinni reyanno; ikkollana Manchi Beetto sayise aannohura hakko manchira kayinni aanne'e!» yii.

²³Insano, «Ninke giddonni konne coye assannohu ayeti?» yitanni mimmito xa'mitu.

²⁴Qolteno, «Baalunkunni roorannohu ayeti?» yitanni insa insanaawa yekkeerantu.

²⁵Yesuusi kayinni, «Tenne gobba moottoolla mannu aana roorre afidhino. Gashshaanono mannaho danchare assitannoreeti yinanninsa.

²⁶Ki'ne kayinni insa gede ikka dihasiissanno'ne. Ki'ne giddo jawa ikkara hasi'rannohu, shiimiidiha ikko. Roorre afi'rinohu soqqamaanchu gede ikko.

²⁷Ofolle itannohunna uurre soqqamannohu woyite jawu hiikkonneeti? Jawaho yinannihu ofolle itannoha di"ikkino? Ani kayinni ki'ne mereero soqqamaanchu gedeeti.

²⁸Ki'ne qarri'ya yannara ane ledo kaajjitine uurritinoonni.

²⁹Kunnira anni'ya ane shoominte gede, anino ki'ne shoomeemmo'ne.

³⁰Gashshooti'ya giddo ane ledo ofoltine ittinanninna agginanni; ayirradu barcimira ofoltine tonaa lamente Israeelete ga'rera yoo yitinanni» yiinsa.

³¹Yesuusi qole, «Simiooni! Simiooni! Kuneeti, qamade sorrannihu gede Sheexaanu ki'ne sorara hasi'rino.

³²Ikkollana ammanakki ba'annokki gede ate daafira huucceemmo. Galagalte daatto woyite roduuwakki kaajjishi!» yii.

³³Pheexiroosi, «Mooticha'ya! Usuramateno ikko reyateno ledokki ha'rammora qixxaawaho» yii.

³⁴Yesuusi kayinni, «Pheexiroosi! Halaale kuleemmohena, techo hashsha lukkichu ganikkinni sase higge, ‹Iso diegennoommo› yaattoe» yiisi.

³⁵Hakkunni gedensaanni Yesuusi rosaanosi, «Womaashsha qoraho, ogoro, koatteno adhitinikkinni soyummo'ne yannara xei'neri nooni?» yiinsa. Insano, «Xeinonkeri mitturino dino» yite qoltu.

³⁶Yesuusi, «Xa kayinni noosihu womaashsha qoraho, ogorono amado; bise afi'rinokkihu uddanosi hire bise hidho!

³⁷Kuleemmo'nena, ‹Bunshe assitannori ledo kiirroonnisi› yine Qullaawu Maxaafi giddo borreessinoonnihu wo'ma hasiissannohura ane daafira borreessinoonniri baalu wo'manno» yiinsa.

³⁸Rosaanosi qolte, «Mooticha! Kuneeti, kawiicho lame bise no!» yitu. Isino, «Ikkitanno!» yiinsa.

³⁹Yesuusi katamunni fule rosisi gede Ejedhete Ilaala kae ha'ri. Rosaanosino ledosi hadhu.

⁴⁰Hakkiira iillituta Yesuusi rosaanosira, «Jifamate giddora e'inannikki gede huuccidhe!» yiinsa.

⁴¹Hakkunni gedensaanni kincho olleenna iillanno geeshshiwa insawiinni fafe ha're guluphe,

⁴²«Anna'ya! Ati baxittoro konne qarru finiincho anewiinni hoolie; kayinnilla, ati baxoottori ikkinnina, ani baxoommori ikkoonke» yii.

⁴³Hattenne yannara jawaachishanno sokkaasinchi gordunni dirre leellisi.

⁴⁴Wodana lowo geeshsha yaadino daafira duu're huucci'ranni no. Hunkuuno mundeete gede ikke uullate aana coccoi.

⁴⁵Huuccattotewiinni kae rosaanosiwa dayi. Yaaddote batinyinni kainohunni goxxe noore afe,

⁴⁶«Mayira goxxinoonni? Jifamate giddora e'inannikki gede ka'ine huuccidhe» yiinsa.

⁴⁷Yesuusi konne coye coyi'ranni hee'reenna lowo manni kae dayi. Tonaa lame rosaano giddohu Yihudi albaanni ha'ranni no. Isino Yesuusa sunqara shiqqi yii.

⁴⁸Yesuusi kayinni, «Yihuda! Manchi Beetto sunqite sayisse aatto?» yiisi.

⁴⁹Yesuusi ledo noo rosaano ikkitote gara la'e, «Mooticha, bisetenni gannoni?» yitu.

⁵⁰Insa giddonni mittu qeesootu qari soqqamaanchira bisetenni qiniiticho macca gane tayisi.

⁵¹Yesuusi kayinni, «Aguri! Togoo coye layinkimeeshsho assitooti!» yii. Manchu maccano amammade hursi.

⁵²Hakkunni gedensaanni Yesuusi amaddasira daggurira qeesootu roorrootira, Qullaawa Mine agartanno hajajaanoranna gobbate geerrira, «Mulqi'rannoha amandannihu gede ane amadate bisenna dulla adhitine daggini?

⁵³Barru baala Qullaawa Mine rosiisanni ki'ne ledo hee'rummo geeshsha diamaddinoonnie. Xa kayinni tini ki'ne yannaatinna tunsichu gashshaanchi yannaati» yiinsa.

⁵⁴Hakkunni gedensaanni mannu Yesuusa amade qeesootu roorrooti minira haa're massi. Pheexiroosi xeerti're ha'runsanni no.

⁵⁵Mannu hoowete giddo giira giire mitteenni ofolle no. Pheexiroosino daye insa ledo ofolli.

⁵⁶Pheexiroosi giirate mule ofolle hee'reenna mitte borojjicho giira xabbeenna iso ikkinota affe qasse la'e, «Kunino Yesuusi ledoho» yitu.

⁵⁷Pheexiroosi kayinni, «Tee mancho! Ani ati yaattaha diegennoommo!» yee kaadi.

⁵⁸Shiima yanna gedensaanni wolu manchino Pheexiroosi lae, «Atino insa ledoho» yii. Pheexiroosi qole, «Ko mancho! Ani isi ledoha di"ikkoommo!» yii.

⁵⁹Mitte saate ikkitanno yanna gedensaanni mittu manchi Pheexiroosi, «Kuni manchi Galiilunniho; addanko isi ledo nooho» yee duu're coyi'ri.

⁶⁰Pheexiroosi kayinni, «Koo mancho! Ati yaattore diafoommo!» yii. Hatto yee coyi'ranni hee'reenna lukkichu gani.

⁶¹Hatte yannara Mootichu caaqqi yee Pheexiroosi lai. Pheexiroosira, « ‹Techo lukkichu ganikkinni sase higge diegennoommosi› yaattoe» yee Yesuusi coyi'rino coyi qulli yiisi.

⁶²Gobbara fule hururame wi'li.

⁶³Hatte yannara Yesuusa amaddinosiri qacifattanninna gantanni noosi.

⁶⁴Alba guggushshite, «Ganihehu ayeti? Hanni himani!» yitusi.

⁶⁵Isi aana lowo coye coyidhanni xontusi.

⁶⁶Soodita dagate geerri, qeesootu roorrootinna Seeru rosiisaano mitteenni gamba yitu. Yesuusano songonsawa abbite,

⁶⁷«Hanni ati Kiristoosaatiro kulinke!» yitusi. Isi kayinni, «Kulummo'nero diammantinannie.

⁶⁸Xa'mummo'nerono diqoltinannie.

⁶⁹Xaanni kayise kayinni Manchi Beetti wolqaataamu Magani qiniiteenni ofollanno» yiinsa.

⁷⁰Baalunku mitteenni, «Anfina ati Maganu Beettootiyya?» yite xa'mitusi. Isi qole, «Ee, ki'ne yitini gedeeti» yiinsa.

⁷¹Insano, «Kunni ka'a mayi naqaashshe hasiissannonke? Kuneeti, afiisinni fulino qaale ninke uminke macciishshinoommo!» yitu.