Read Sidama_Qullaawa _Maxaafa LUQAASI 23 Bible Online

LUQAASI 23 - Sidama_Qullaawa _Maxaafa bible

LUQAASI 23

¹Hakkiicho gamba yee noo manni baalu Yesuusa haa're Philaaxoosiwa masse,

²«Kuni manchi mannanke so'risiisanna anfoommo; Roomu Moote Qeesaarirano giwire baantannikki gede hoolanni no. Qoleno, ‹Ani moote Kiristoosaati› yee coyi'rino» yite bushiishshusi.

³Philaaxoosino Yesuusa «Ati Ayihudete Mooteetini?» yee xa'mi. Yesuusino, «Atinni yootto» yiisi.

⁴Hatte yannara Philaaxoosi qeesootu roorrootiranna mannaho, «Kunni manchi aana mitte saono diafoommo» yii.

⁵Insa kayinni, «Kuni manchi Galiilunni kayise Yihudu gobba baalate rosiisanni manna giwanshiishanno» yitanni kaajjishshe bushiishshusi.

⁶Philaaxoosi Galiila yaanno qaale macciishshe, «Kuni Galiilu manchootini?» yee xa'mi.

⁷Yesuusi Heeroodisi gashshooti giddonni dayinota afe, Yesuusa Heeroodisiwa soyi. Hatte yannara Heeroodisi Yerusaalamete no.

⁸Heeroodisi Yesuusa afi woyite lowo geeshsha hagiidhi. Kunni albaanni Yesuusire macciishshe, Iso la"ara halchanni keeshshino.

⁹Kunnira Heeroodisi Yesuusa batinye xa'mo xa'mi. Yesuusi kayinni mittoreno diqolinosi.

¹⁰Qeesootu roorrootinna Seeru rosiisaano hakkiicho uurrite Iso duudhe bushiishshanni no.

¹¹Heeroodisino olantosi ledo mishe qacifatisi. Biifado uddano uddisiise Philaaxoosiwa qole soyisi.

¹²Hakko barrinni kayisse Philaaxoosinna Heeroodisi mimmitoho ilantu; hakkunnira albaanni kayinni komatenni heedhannoreeti.

¹³Hakkunni gedensaanni Philaaxoosi qeesootu roorroota, gobbate geerranna manna mitteenni woshshe,

¹⁴«Konne mancho, ‹Manna giwanshiishanno› yitine anewa abbitinoonni. Kune alba'neenni xa'me bushiishshinisi coyi giddonni kunni manchi aana mitte saono diafoommo» yiinsa.

¹⁵Heeroodisino mitte bunshe aanasi afinokki daafira qole ninkewa soyino. «Kuni manchi reyote iillishannore mittoreno diassino.

¹⁶Kunnira lichetenni gansiise kae agureemmo» yiinsa.

¹⁷[Agure Sa"ate Ayyaani daanno kiiro Philaaxoosi mannaho mitto usuranya tira rosoho.]

¹⁸Kunnira mannu baalu, «Konne mancho huni! Barbaani kayinni tirinke!» yaanni mitteenni canci.

¹⁹Barbaani katamu giddo gibbo kalaqatenninna manna shaatenni kainohunni usuramino manchooti.

²⁰Philaaxoosi Yesuusa tire agura hasi're mannaho lede coyi'ri.

²¹Mannu kayinni, «Suti! Suti!» yaanni canci.

²²Philaaxoosi sayikkimeeshsho, «Kuni manchi assino bunshe maati? Ani reyote iillishannore aanasi mittoreno diafoommo. Kunnira lichetenni gansiise agureemmo» yiinsa.

²³Insa kayinni qoonqonsa naggi assite, «Suti!» yitanni cancitu. Mannunna qeesootu roorrooti canci bati'ri.

²⁴Kunninni kainohunni Philaaxoosi xa'midhinori wo'mannonsa gede assi.

²⁵Gibbo kalaqeennanna manna sheenna usurroonniha Barbaani xa'midhino garinni tirinsa. Yesuusa kayinni hasidhino garinni sayise uyinsa.

²⁶Hakkunni gedensaanni Yesuusa haadhe hadhanni heedheenna Qereenu gobba manchi Simiooni, katamu gobbayidinni daanna affe, Yesuusi masiqala duhisiisse hoodesi ha'ranno gede assitu.

²⁷Lowo manni Yesuusi hoode ha'ranni no. Hakko manni giddo gagaso ga'nanni wi'lanno meenti no.

²⁸Yesuusi kayinni insa widira caaqqi yee lae, «Ki'ne Yerusaalamete meento, umi'neranna ooso'nera wi'le ikkinnina anera wi'litinoonte!

²⁹‹Gaana meento, iltinokki otoottuwanna qannoonnikki unuunna hiitto ba'raa'rinoreeti!› yinanni barri daanno.

³⁰Hattenne yannara mannu ilaalla, ‹Aananke ubbe!› Gaarrano, ‹Maaxxenke!› yaanno.

³¹Kuni baalu coyi shamu haqqi aana togo ikkannoha ikkiro moolu haqqi aana hiitto ikka ikka?» yii.

³²Wole lame addifulootano Yesuusi ledo shitara haadhe hadhu.

³³Golgoota woy Umu Qooncho yinanni darga iillite Yesuusa hakkiicho suttu. Lamenka addifulootano Yesuusira guraanninna qiniiteenni suttu.

³⁴Hakkunni gedensaanni Yesuusi, «Anna'ya! Diaffe assitanni noona saonsa aguri» yii. Uddanosino hixa tuqqite beeqqitu.

³⁵Lowo manni uurre la"anni no. Yihudu roorrooti, «Wole gatisino; isi Maganu doorinoha Kiristoosa ikkinoro hanni umosi gatisossiyya» yitanni masifattusi.

³⁶Olantono qacifattanni shiqqi yite shiisha uyitusi.

³⁷Qolteno, «Ati Ayihudete Moote ikkoottoro hanni umokki gatisi» yitusi.

³⁸«Kuni Ayihudete mooteeti» yitanno borro borreessite Yesuusira umoonni qolte masiqalu aana gantu.

³⁹Yesuusi ledo sutantinori giddonni mittu addifuli Yesuusa, «Ati Kiristoosa di"ikkootto? Hanni umokkinna ninke gatisi» yaanni xonisi.

⁴⁰Layinkihu kayinni, «Ati umikkira togoo yoo agarte heedheennahe Magano diwaajjatto?

⁴¹Ninke assinoommo saora malinonke qoricha adhinoommo; kuni manchi kayinni mitte saono diassino» yee rufi.

⁴²Qoleno Yesuusa, «Mooticha'ya! Gashshootikkinni daatto woyite qaagie» yii.

⁴³Yesuusino, «Halaale kuleemmohena, techonni ane ledo Gannate eatto» yiisi.

⁴⁴Kuni ikkinohu barrunni lee saate ikkanno hedoraati; hatte yannanni kayisse honse saate geeshsha baatto baala tunsitu.

⁴⁵Arrishsho xo'u; Qullaawu Mini dukko alinni eeli geeshsha dadhante lamewa fultu.

⁴⁶Yesuusi qoonqosi naggi asse, «Anna! Kuneeti, lubbo'ya Atera eeggo uyi'roommo!» yii. Hatto yiihu gedensaanni foolu fuli.

⁴⁷Hakkiicho noohu xibbe olanto roorrichi tenne ikkito lae, «Kuni manchi halaalintanni keeraanchoho» yee Magano ayirrisi.

⁴⁸Ikkannore la"ara hakkiicho gamba yiino manni baalu ikkino coye lae dadille gagaso ga'nanni mine minesi higi.

⁴⁹Yesuusa egennino manni baalunna Galiilunni kayise Isi hoode ha'ranni noo meenti fafowa uurre konne coye la"anni no.

⁵⁰Ayihudete katamira Armaatiyaho hee'rannohu mittu Yooseefi yinanni manchi no. Isi keeraanchohonna dancha manchooti. Ayihudete songorano miilaho.

⁵¹Ikkollana Ayihudootu amaaleranna ganonsara dikarsamino. Isi Maganu gashshoote hexxotenni agadhanni noo manchooti.

⁵²Kuni manchi Philaaxoosiwa shiqe, Yesuusi reeshsha aannosi gede xa'mi'ri.

⁵³Reeshshano dirrise, shaalado haarrete uddanonni kafane, ayeno madaarroonnikkiwa kincho kurkurre seekkinoonni waamma giddo madaari.

⁵⁴Konne assinohu Ayihudete Fooliishsho Barrira qixxaambanni hee'noonni yannaraati.

⁵⁵Galiilunni Yesuusi hoode dayino meenti Yooseefi ledo mare waamma lai. Reeshsha assine waammoonni garano lai.

⁵⁶Mininsara hige reeshshaho buurranni shitto qixxeessi. Seeru garinni Fooliishshote Barra fooliishshi're hosi.