Read Sidama_Qullaawa _Maxaafa LUQAASI 4 Bible Online

LUQAASI 4 - Sidama_Qullaawa _Maxaafa bible

LUQAASI 4

¹Yesuusi Qullaawu Ayyaani wo'meennasi Yordaanoosi wayi eelinni higi. Hakkunni gedensaanni Qullaawu Ayyaani halalla qole haa're ha'risi.

²Hakkiicho shoyilloo barra Sheexaanu jifisi. Kunni shoyillawu barri giddo mittoreno itinokki daafira goofimarchoho hudi'ri.

³Hatte yannara Sheexaanu Yesuusiwa daye, «Hanni ati Maganu Beettootiro, kuni kinchi tima ikkanno gede hajaji!» yiisi.

⁴Yesuusi daware, «‹Mannu sagale callatenni dihee'ranno› yine borreessinoonni» yiisi.

⁵Hakkunni gedensaanni, Sheexaanu Yesuusa gotti yiino darga masse gobbate gashshoote baala shiima yanna giddo leellishisi.

⁶Qoleno, «Konne gashshootenna ayirrinye baala atera eemmohe. Kuni baalu anera uyinoonnieha ikkino daafira, ani hasi'roommohura aa dandeemmo.

⁷Anera kumbuulittoero konne baala eemmohe» yiisi.

⁸Yesuusino, «‹Mootichu Maganikkira calla kumbuuli! Iso calla magansi'ri› yine borreessinoonni» yiisi.

⁹Hakkunni gedensaanni, Sheexaanu Yesuusa Yerusaalame masse, Qullaawu Mini guuto iimira fushshe, «Hanni ati Maganu Beetto ikkoottoro kawiichinni umokki eela qolte tugi;

¹⁰‹Agartannohe gede Maganu sokkaasinesi hajajanno.

¹¹Lekkakki kinchu gane gawajjannohekki gede angansa woroonni worte kayissannohe› yine borreessinoonni» yiisi.

¹²Yesuusi, «‹Mooticha Maganokki jiffooti!› yine borreessinoonni» yee qolisi.

¹³Sheexaanu Yesuusa jifannore gudihu gedensaanni yannate geeshsha agure ha'ri.

¹⁴Yesuusi Qullaawu Ayyaani wolqa wo'miteennasi Galiila higi. Isi duduwo qooxeessaho noo gobba baala macciishshitu.

¹⁵Xaadu minnara rosiisanna mannu baalu galatisi.

¹⁶Hakkunni gedensaanni Yesuusi lophino gobba Naazirete ha'ri. Hakkiichono albinte gede Ayihudete Fooliishsho Barra xaadu minira e"e, nabbawara kai.

¹⁷Himanaanchu Isayaasi Maxaafa uyinisi. Maxaafa fanita,

¹⁸«Mootichu Ayyaani ane aana no; buxanete Dancha Duduwo duduwate shoominoe; usurantinori tidhantannota kulate, illiweelootu la'annota lallawatenna, kadantinore kadotenni fushshate soyinoe.

¹⁹Qoleno Mootichu mannasi gatisannoha eltote diro egensiiseemmo gede soyinoe» yine borreessinoonni dargi leellisi.

²⁰Yesuusi maxaafa xaaxe soqqamaanchoho ee ofolli. Xaadu mine noo manni baalu iso la"anni no.

²¹Isino, «Kuneeti, xa nabbawanna macciishshitinihu Qullaawu Maxaafi qaali techo wo'mino» yiinsa.

²²Baalunku Isire dhaggeeffattanninna ashilaamu hasaawisire dudubbanni, «Isi Yooseefi beetto di"ikkino?» yitu.

²³Yesuusino, «‹Ati Xagisaanchu, hanni umokki hursi!› yitine maammaakkinannieta afoommo. Qoltineno, ‹Qifirinahoomi assoottore baala macciishshinoommo; kawiicho gobbakkirano hatto assi› yitinannie.

²⁴Halaale kuleemmo'nena, himanaanchu umisi gobbara diayirranno.

²⁵Kuleemmo'nena macciishshe; himanaanchu Eeliyaasi yannara, sase dironna lee agana xeena gana hooginohura Israeelete gobbara lowo hude ubbino. Hatte yannara hakkiicho lowo gunnooti no.

²⁶Ikkollana, Eeliyaasi Sidoonu gobbara Seraphitu qachira noo gunnitewa ikkinnina wolootunniwa disonkoonnisi.

²⁷Himanaanchu Eelsai yannarano, Israeelete gobbara lowo dhiigaammi no; ikkollana Sooriyu mancho Ni"imaani agurranna keeraa'minohu wolu dino» yiinsa.

²⁸Xaadu mine noori baalu konne coye macciishshite lowo geeshsha hanqitu.

²⁹Yesuusa kataminsa minamino gaari aanira fushshite xiibbe boonoho tuggara hedde katamu gobbaanni fushshitusi.

³⁰Isi kayinni mereeronsaanni hige fule ha'ri.

³¹Hakkunni gedensaanni Yesuusi kae Galiilu gobba, Qifirinahoomi Katama ha'ri. Hakkiichono manna rosiisa hanafi.

³²Gashshaanchu gede ikke rosiisanni noo daafira, baalunku rosiisino gara dhaggeeffattu.

³³Xaadu mine bushu ayyaani amadino manchi no; isino qoonqosi naggi asse,

³⁴«Naaziretete Yesuusa! Ninke ledo atera mayi noohe? Hunattonkera dayitto? Ati ayetiro egennoommohe. Ati Maganu Qullaawaati» yee raari.

³⁵Yesuusi, «Busha ayyaana, sammi yite manchuwiinni fuli» yee rufi. Bushu ayyaanino mancho mannu albaanni tuge, gawajjisikkinni fule ha'ri.

³⁶Hakko noo manni baalu dhagge assi're, «Kuni hiittoo rosooti? Busha ayyaanna roorretenninna wolqatenni hajajanno; insano hajajante fultanni no» yitanni insa insanaawa hasaabbu.

³⁷Yesuusi duduwi qamatte baala tuqi.

³⁸Yesuusi xaadu mininni fulanni hee'renni, Simiooni minira ha'ri. Maranno woyite, Simiooni ballo iibbabbite goxxe no. Hursannose gedeno Yesuusira kultu.

³⁹Yesuusi isewa shiqqi yee mulese uurre, iibbabbo agurtannose gede hajaji. Iibbabbo agurteennase ka'e soqqantunsa.

⁴⁰Arrishsho e'uta, mannu addi addi dhibbi amadinore baala haa're Yesuusiwa abbi. Isino mitto mittonka angasi aanaho wore hursinsa.

⁴¹Durriissano, «Ati Maganu Beettooti» yite raartanni lowo manni giddonni agurte fultu. Durriissa Yesuusi Kiristoosa ikkinota egentino daafira coyidhannokki gede hajajinsa.

⁴²Soodita Yesuusi hakkiinni fule, kashshi yaannori nookkiwa ha'ri. Mannuno iso hasara fuli. Affusihu gedensaanni, insawiinni baxxannokki gede huuccidhu.

⁴³Isi kayinni, «Ani Dancha Duduwo kulate soqqame dayommo daafira, wole katammano ha're Maganu gashshootire kula hasiissannoe» yiinsa.

⁴⁴Kunnira, Yihudu gobbara noota xaadu minna ha're kuli.