Read Sidama_Qullaawa _Maxaafa LUQAASI 6 Bible Online

LUQAASI 6 - Sidama_Qullaawa _Maxaafa bible

LUQAASI 6

¹Ayihudete Fooliishsho Barra Yesuusi laalino gidi giddoonni hige sa"anna, rosaanosi shoye tattayisse ittu.

²Farisootu giddonni mitu mitu rosaano, «Fooliishshote Barra hoolloonnire mayira assitinanni?» yitunsa.

³Yesuusi qole, «Daawiti mannisi ledo hee're hudi'ri yannara, assinore dinabbabbinoonni?

⁴Daawiti Maganu Minira e"e, qeesoota callaho fajjinoonniha qullaawa tima itino; ledosi noo mannirano uyino» yiinsa.

⁵Lede Yesuusi, «Manchi Beetti Fooliishshote Barrira Mootichaho» yiinsa.

⁶Wole Fooliishshote Barrano Yesuusi Ayihudootu xaadi minira e"e rosiisi. Hakkiicho mittu qiniiticho anga laanshaawino manchi no.

⁷Yesuusi aana yorto afidhinori seeru rosiisaanonna Farisootu, «Fooliishshote Barra hursannoro hanni anfeemmona» yite agartu.

⁸Yesuusi kayinni anga laanshaawa mancho, «Ka'e mannu mereero uurri!» yiisi. Isino hakkiicho kae uurri.

⁹Hatte yannara Yesuusi, «Seeru garinni Fooliishshote Barra danchanso busha loosate fajjinoonni? Lubbo gatisatenso hunate fajjinoonni?» yee xa'minsa.

¹⁰Yesuusi mulesi noo manna baala laihu gedensaanni mancho, «Angakki diriirsi!» yiisi. Manchu anga diriirsi'rita, angasi hurte fayyaaleette ikkitu.

¹¹Seeru rosiisaanonna Farisootu kayinni, lowo geeshsha hanqite Yesuusa hiitto assitannoro amaalantu.

¹²Mitto barra Yesuusi huucci'rara ilaala fuli. Hakkiicho hashsha wo'ma Magano huucci'ranni gali.

¹³Soodita rosaanosi isiwa woshshe, insa giddonni tonaa lame doore, «Soqqamaasine» yee su'ma fushshinsa.

¹⁴Tonaa lamunku dooranturi: Pheexiroosi yee su'ma fushshihu Simiooniiti, rodiisi Indiriyaasi, Yaiqoobinna Yohaannisi, Filiphoosinna Bertelemewoosi,

¹⁵Maatewoosinna Toomaasi, Ilfiyoosi beetti Yaiqoobinna, Laalaataanchu Simiooni,

¹⁶Yaiqoobi beetti Yihudinna Yesuusa sayise hirihu Asiqorootichu Yihudaati.

¹⁷Yesuusi soqqamaasinesi ledo ilaalunni dirre xawoho uurri. Hakkiicho rosaanosi, Yihudunni, Yerusaalametenni, baaru gami katamma Xiroositenninna Sidoonunnitenni dayinohu lowo manni no.

¹⁸Insa Isi coyi'rannore macciishshitaranna dhibbinsanni hurtara hasidhe daggino. Durriisu amadeenna qarrantanni heedhannorino dagge hurtu.

¹⁹Hursitanno wolqa isiwiinni fulte wo'manka hursitanni noo daafira, gamba yiino manni baalu iso kisara hasi'ri.

²⁰Yesuusi rosaanosi widira hige lae, «Maganu Gashshooti ki'neha ikkino daafira, ki'ne buxane ba'raadhinoonnireeti.

²¹Ki'ne xa hudidhinanniri, gedensaanni duubbinanni daafira ba'raadhinoonnireeti. Ki'ne xa wi'litinanniri, gedensaanni oso'litinanni daafira ba'raadhinoonnireeti.

²²«Ane Manchi Beettinni kainohunni mannu giwi'nero, giddonsanni fushshe huni'nero, mishi'neronna su'ma'ne bushatenni kayisiro ba'raadhinoonnireeti.

²³Gordoho lowo ba'raa'ra afidhinanni daafira tashshi yoo'ne; hagiidhe. Ki'nera albiidi himanaanorano hattoo bunshe iillishshinonsa.

²⁴«Ki'ne dureeyye kayinni, xa qawaaxxidhine heedhinoonni daafira, ki'nera aanne'e.

²⁵Xa duubbinoonniri, gedensaanni hudidhinanni daafira, ki'nera aanne'e. Xa oso'litinanniri, gedensaanni dadillitinanninna wi'litinanni daafira, ki'nera aanne'e.

²⁶«Mannu baalu jaji'nero, ki'nera aanne'e. Annuwansano kaphu himanaano hatto jajjino» yiinsa.

²⁷«Macciishshitinannirira kuleemmo'nena, baarigaarra'ne baxxe! Gibbanno'nerira danchare asse.

²⁸Runtanno'nere maassidhe; sao assitanno'nerira Magano huuccensa.

²⁹Mitto baqqaallakki qawaadannohura layinkihano qolisi. Kootekki adhannohu, shamisekkino adhona agurisi.

³⁰Xa'mi'rannohura uyisi. Atere adhinoha qolannohe gede xa'midhooti.

³¹Mannu ki'nera assa'nera hasidhinannire baala ki'neno insara assensa.

³²«Baxxanno'nere calla baxxiniro ma galati noo'ne? Cubbaataammu nafa baxxannonsare baxxanno.

³³Dancha assitanno'nerira calla dancha assitiniro ma galati noo'ne? Cubbaataammuno hatto assitanno.

³⁴Qolte uyitanno'nerira calla liqiissitiniro ma galati noo'ne? Qolte adhate cubbaataammuno cubbaataammaho liqiissitanno.

³⁵Ki'ne kayinni baarigaarra'ne baxxe; danchareno assensa; qollanninke yitine agadhitinikkinni liqiisse. Hatto assitiniro waagi'ne lowoho. Wo'munkura Aliidi Maganira oososi ikkitinanni. Isi galata afidhinokkiriranna bushuulleho nafa shaqqadoho.

³⁶Gordu Anni'ne maarannoha ikkinonte gede, ki'neno maartinannire ikke» yiinsa.

³⁷Yesuusi qole, «Ki'nera yoo yinanni'nekki gede, ki'neno woleho yoo yitinoonte. Ki'ne minshanni'nekki gede, ki'neno wole mishshinoonte. Ki'ne cubbo agurranni'ne gede, wolu cubbono agurre.

³⁸Maganu aanno'nena, ki'neno uuyye. Woleho safartine uyitinanni safaraanchinni safarranni'ne. Hakkiinni roorsine xiimbenna qanse, wo'me du'namanna safarre uyinanni'ne» yii.

³⁹Yesuusi masalsanni lede, «Illiweelu illiweelo massaga dandaannoni? Massagannoha ikkiro lamunku mimmito haadhe balete ubbanno.

⁴⁰Rosaanchu rosiisaancho dirooranno. Ikkollana rosannohu rososi seekke rosiro rosiisaanchu gedeeha ikkanno.

⁴¹«Ate illera noo heelliicho laittokkinni rodiikki illera noo ishincho mayira la"atto?

⁴²Qolteno ate illera noo heelliicho afittokkinni rodookkira, ‹Rodoo'ya, illekkira noo ishincho fushshoheni› hiitto yaatto? Ati lawisiisaanchu, hanni balaxxe illekkira noo heelliicho fushshi'ri. Hakkunni gedensaanni rodiikki illera noo ishincho fushshate illekki xunsite la'anno.

⁴³«Dancha haqqicho busha laalo dilaaltanno; busha haqqichono dancha laalo dilaaltanno.

⁴⁴Haqqa baala laalosinni egenninanni. Utu aaninni balasete laalo dixinqi'nanni. Utaamu citi giddonni woyinete laalo dixinqi'nanni.

⁴⁵Danchu manchi danchu wodanisi giddonni dancha coye fushshanno; bushu manchi bushu wodanisi giddonni busha coye fushshanno. Mannu wodanisira wo'me gatinore coyi'ranno.

⁴⁶«Ani kuleemmo'nere wonshitinikkinni, ‹Mooticha, Mooticha›, yitine mayira woshshitinannie?

⁴⁷Anewa daannohunna qaale'ya macciishshe guutannohu ma lawannoro kuleemmo'ne.

⁴⁸Isi mine kinchu aana mi'ninoha busule mancho lawanno. Lolahu daye hakkonne mine xiiwi. Ikkollana kinchu aana minnoonni daafira diuwino.

⁴⁹Qaale'ya macciishshe guutannokkihu kayinni, mine shaafu aana mi'ninoha gowwa mancho lawanno. Hakkonne mine lolahu daye xiiwi. Minuno hakkawoyintenni uwi; uwasino jaddonnite» yiinsa.