Read Sidama_Qullaawa _Maxaafa LUQAASI 8 Bible Online

LUQAASI 8 - Sidama_Qullaawa _Maxaafa bible

LUQAASI 8

¹Hakkunni gedensaanni Yesuusi katammatenna qachuwate, Maganu Gashshootirenna Danchu Duduwire kulanni ha'ri. Tonaa lamunku rosaanosino ledosi no.

²Bushu ayyaani fulinonsarinna dhibbunni hurino meentino hoode ha'ranni no. Insa giddo lamalu durriisi fulinoseti Megidelitte Maariyaamino no.

³Heeroodisi mini roorrichiti Kuuza galte Yohaana, Soosinanna wolu lowo meenti no. Kuni meenti, Yesuusanna rosaanosi woxinsanni kaa'lanni keeshshino.

⁴Lowo manni katamunni daye gamba yiita Yesuusi,

⁵«Mittu manchi wixa wixi'rara fuli. Wixa wixi'ranni hee'reenna, mitu mitu doogote gama uwe lekkatenni kakkadami; ceano dagge xinqite ittu.

⁶Wolu gumi bushshu qawaaxxisinokkiwa carete aana uwi. Mu'ranno woyite qufichu nookki daafira mooli.

⁷Wolu qole utu giddo uwi. Mu'rihu gedensaanni utu fuge amadeenna gumiweele gati.

⁸Wolu gumi dancha shaqqado baatto aana uwe mu'ri. Lophe xibbe ero laalino» yee lawishsha kulinsa. Yesuusi lede, «Macca noohu macciishsho!» yiinsa.

⁹Rosaanosi Yesuusa, «Kunni lawishshi tiro maati?» yite xa'mitusi.

¹⁰Yesuusi daware, «Ki'nera go'linoha Maganu gashshooti coye afate hayyo uyinoonni'ne. Gobbaanni noorira kayinni la'anni heedhe buuxxannokki gede, macciishshitanni heedhe wodanchitannokki gede masalsatenni kullanninsa» yiinsa.

¹¹Lawishshu tirono, «Wixu Maganu qaaleeti;

¹²doogote gama uwi wixi masalo, qaale yannate geeshsha calla macciishshitannoreeti. Ammante gattannokki gede Sheexaanu daye wodaninsa giddonni qaale xinqe adhanno.

¹³Carete aana uwino wixi masalo, qaale macciishshite hakkawoyintenni hagiidhite adhitannore kulanno. Insa kayinni yannate geeshsha ammantanno; rumushshu noonsakki daafira qarru daanno woyite mulenni gufidhe ubbanno.

¹⁴Utu mereero uwino wixi masalo, Maganu qaale macciishshituhu gedensaanni, tenne gobba hedo, jirote baxillinna wole yorto wodaninsa giddora e'e macciishshitino qaale beeshshiteenna gumiweelte gattannore kulanno.

¹⁵Shaqqado baattora uwino wixi masalo kayinni, danchu wodaninni qaale macciishshite agadhitinoreeti; insa qaalunni kaajjite guma laaltannoreeti» yii.

¹⁶Yesuusi lede, «Caabbicho xawise kae xawannokki gede aanaho gawate gombisannohu woy daallasaho woroonni worannohu dino. Roorenka minira eanno mannira baalaho xawanno gede assine worranni.

¹⁷«Maanxoonnihu leellikkinni digatanno. Go'linohu xawo fulikkinni dihee'ranno.

¹⁸«Kunnira qaale ma garinni macciishshitinanniro seekkitine wodanche; noosihura lendanni; noosikkihu aaninni kayinni noosinkanni haa'ne hoollanni» yii.

¹⁹Yesuusi amanna roduuwisi isi noowa ka'e daggu. Ikkollana mannu bati'rino daafira iso afa didandiitino.

²⁰Kunnira mannu Yesuusira, «Kuneeti amakkinna roduuwikki ate hasidhe gobbaanni uurrite no» yite kultusi.

²¹Yesuusi qole, «Maganu qaale macciishshe wonshannohu baalu anere labbaa rodoo'yaati; meyaa rodoo'yaatinna ama'yaati» yiinsa.

²²Mitto barra Yesuusi rosaanosi ledo yowolote giddora e"e, «Baaru widiidi qacce fulle!» yiinsa. Insano hadhara ka'u.

²³Baaru aana hadhanni heedheenna Yesuusi goxi. Hatte yannara baaru aana lowo bubbe ka'e dambala kayisseenna wayi yowolote giddora ea hanafita qarru iillanni noonsata affu.

²⁴Yesuusi goxe noowa marte, «Rosiisaancho, goonfammoraati!» yite baqqi assitusi. Isino kae bubbenna dambala ufi; bubbenna dambaluno hakkawoyintenni gabbi yii. Insa baalunkuno sammi yitu.

²⁵Hakkunni gedensaanni Yesuusi rosaanosi, «Ammana'ne hiikkitu?» yee xa'minsa. Insa kayinni lowo geeshsha waajjitinohuranna massinohura mimmitinsara, «Bubbenna dambala hajajeenna hajajantanni noosina, isi ayeti ikka» yitu.

²⁶Baara tayisse fulte Galiilaho widoonni Gergesenooni gobba iillitu.

²⁷Yesuusi yowolote giddonni fulita, durriisu amadino manchi katamunni fule, Yesuusinni xaadi. Kuni manchi uddano uddi'ra agurinkunni lowo yanna ikkino. Mine agure mooggate giddo galanno.

²⁸Yesuusa afi yannara raari; albasiinni kumbuule lowo qoonqonni, «Ati Wo'munkura Aliidi Magani Beetto Yesuusa, atera ane ledo mayi noohe? Eeggakkiitina shetissootie» yii.

²⁹Hatto yiinohu, Yesuusi bushu ayyaani manchuwiinni fulanno gede hajajinohuraati. Bushu ayyaani kunni albaanni batinye hige ka"annosi; cagaagetenninna quwetenni usurre agarranni; ikkollana cagaagenna quwe tattayise tuganno. Durriisuno halallitte gobba haa're ha'rannosi.

³⁰Yesuusi, «Su'mikki ayeti?» yee xa'misi. Isino giddosi lowo durriissa noo daafira, «Su'mi'ya Legewooniiti» yee dawari.

³¹Durriissano, «Yesuusa diimete giddora qolte huntootinke» yiite huuccidhu.

³²Hakkiicho gaaru hunda kiiro haammata manchaame hayisso ittanni no. Durriissa, «Marre manchaamete giddora e'neemmo gede fajjinke!» yite Yesuusa huuccidhu. Isino fajjinsa.

³³Kunnira durriissa manchu giddonni fulte manchaamete giddora e'u. Manchaameno baaru gaminni bitintirtanni wayi giddora e'e egemmantu.

³⁴Manchaame allaalte noori ikkino coye la'e xooqqe marte, katamahonna katamu gobbaanni dudubbu.

³⁵Mannuno tenne ikkito la"ara Yesuusiwa dayi. Durriisu amadino manchi wodanu higeennasi hure uddano uddi're Yesuusi lekka mule ofolle nooha affe waajjitu.

³⁶Balaxxe affinori durriisu amadino manchi hiitto ikke hurinoro mannaho kultu.

³⁷Hakkunni gedensaanni Gergesenooni gobba manni, Yesuusa hakkiichinni agure ha'ranno gede huucci'ri. Hatto yitinohuno lowo geeshsha waajjitino daafiraati. Kunnira Yesuusi yowolo e"e galagale dayinowa ha'ri.

³⁸Durriisu fulisi manchi Yesuusa, «Ballo ledokki ha'roni?» yee huucci'ri. Yesuusi kayinni,

³⁹«Qaera hadhe Maganu assinohere kuli!» yiisi. Manchu Yesuusi assinosiha jawa coye katamma baalate duduwanni ha'ri.

⁴⁰Yesuusi galagale higita agare noo manni lowo hagiirrinni haa'risi.

⁴¹Hatte yannara mittu xaadu mini roorrichi Iyairoosi yinanni manchi daye, Yesuusi lekkara uwe, «Eeggatena rakke mini'yara amoe» yee huucci'ri.

⁴²Hatto yiinohu mitte afi'rinoti tonaa lame diro ikkannose qaaqqo lowo geeshsha dhiwanteenna reyote agarre hee'noonni daafiraati. Yesuusi insa ledo ha'ranni hee'reenna, ledosi noohu lowo manni doogote aana cifisi.

⁴³Hakko manni mereero tonaa lame diro wo'ma mundee lolakkanna heedhannoti mitte mancho no. Tini mancho xagissannori baalunkuwa hadhanni, woxese baala guxxitino; ayino hursasera didandiino.

⁴⁴Ise Yesuusiwa dagge, badheenni uddanosi qacce kissu. Hakkawoyintenni du'nantanni noo mundee uurritu.

⁴⁵Yesuusino, «Kisiehu ayeti?» yee xa'mi. Mannu baalu «Ninke dikinsoommohe» yii. Pheexiroosino, «Mooticha'ya, mannu cifamanni hoodenke ha'ranni noota affanni heedhe, ‹Ayi kisie› yaatto?» yiisi.

⁴⁶Yesuusi kayinni, «Wolqa giddo'yanni fultinona, mittu kisinoehu no» yii.

⁴⁷Mancho anfoonniseta affe, huxidhanni Yesuusiwa dagge albasiinni ubbu. Hakkunni gedensaanni mayira kissinosironna hiitto ikkite hurtinoro mannu baalu albaanni coyidhu.

⁴⁸Yesuusi manchote, «Beetto'ya, amma'nakki gatissinohena keerunni ha'ri!» yiise.

⁴⁹Yesuusi togo yee coyi'ranni hee'reenna, Iyairoosi mininni dayino manni, «Beetto reyitinona, xaate rosiisaancho daafursitooti» yii.

⁵⁰Yesuusi kayinni konne coye macciishshe Iyairoosi, «Ammani ikkinnina waajjitooti, beettokki hurtannona!» yiisi.

⁵¹Yesuusi Iyairoosi minira iilli yannara Pheexiroosinna Yaiqoobi, Yaiqoobi rodoo Yohaannisi hattono beettote annanna ama agurranna wole ayeno ledosi minira ea diuyino.

⁵²Hakkiicho noo manni baalu beettote reyora didanninna kooce wi'lanni no. Yesuusi kayinni, «Beetto goxxinota ikkinnina direyitino» yiinsa.

⁵³Mannu kayinni beetto reyitinota afino daafira maaeelse oso'lisi.

⁵⁴Yesuusi beettote anga amade, «Tee beetto, gotti yii!» yiise.

⁵⁵Iseno lubbose base higgeenna hakkawoyintenni ka'e uurritu. Yesuusino, «Ittannore uuyyese» yiinsa.

⁵⁶Beettote ayiddino dhaggeeffati. Yesuusi kayinni konne coye mannaho kultannokki gede qorophisiisinsa.