Read Sidama_Qullaawa _Maxaafa LUQAASI 9 Bible Online

LUQAASI 9 - Sidama_Qullaawa _Maxaafa bible

LUQAASI 9

¹Yesuusi tonaa lamenka soqqamaasinesi woshshe battete ayyaana fushshitannonna dhiwantinore hursitanno gede wolqanna roorre uyinsa.

²Gordu Gashshooti gamba yiinota manna baalaho kultanno gedenna dhiwantinore hursitanno gede soyinsa.

³Qoleno, «Hadhinanni woyite doogora ikkannore: Siqqo, ogoro, sagale, woxe woy lame uddano anga adhitinoonte!

⁴Wosinchimma martinoonni darginni agurtine hadhina geeshsha hakkiicho keeshshe.

⁵Martinoonniwa mannu haa'ra giweenna'ne hakko katama agurtine fultinanni woyite, malaate ikkannonsa gede lekka'ne buko ganga'ne!» yiinsa.

⁶Kunnira rosaanosi hakkiichinni fulte Dancha Duduwo dudubbanninna dhiwamaano hursitanni qacha baala hadhu.

⁷Mitu mitu manni, «Cuuaanchu Yohaannisi reyotenni kaino» yaanni duduwanni noo daafira Galiilu gobba gashshaanchi Heeroodisi Yesuusi assinore baala macciishsheenna yaannori baisi.

⁸Wolu manni, «Himanaanchu Eeliyaasi galagale dayino» yii. Wolootu qolte, «Albi himanaano giddonni mittu reyotenni kaino» yitu.

⁹Heeroodisi kayinni konne coye macciishshe, «Ani Yohaannisi goowa mursiisoommo. Kuni wo'manka coye assa dandaanno yini manchi isi ayeti?» yee Iso la"ara hasi'ri.

¹⁰Soqqamaasine soyinowiinni galagalte higge, assitinore baala Yesuusira kultusi. Isino Beetesayidu katami mule mannu nookkiwa calluwansa haa're ha'ri.

¹¹Mannu Yesuusi ha'rinowa afihu gedensaanni iso faana gane ha'ri. Isino haa're Maganu Gashshootire rosiisinsa; dhibbunni hurtara hasidhe dagginore baalano hursinsa.

¹²Yanna hashshituta, tonaa lamenka rosaanosi Yesuusiwa shiqqi yite, «Kuni hee'noommo dargi halallaati. Kunnira mannu muli katammanna katammate gobbaanni noo qachuwa ha're, itannorenna galannowa hasi'ranno gede ha'risi» yitu.

¹³Yesuusi kayinni, «Ittannore ki'ne uuyyensa!» yiinsa. Insa qolte, «Ninkera ontu timinna lame qulxu'michi callu noonke. Ha'ne sagale hira hoongummoro kunni baalu mannira di"ikkitanno» yitu.

¹⁴Mannu kiirono onte kumeeti. Yesuusi rosaanosi, «Mannu 50, 50 ikke gaamame ofollanno gede asse» yiinsa.

¹⁵Rosaanosi Yesuusi yiino gede assite wo'manka ofoshshiishshu.

¹⁶Hakkunni gedensaanni Yesuusi onte timanna lame qulxu'micho haa're, gordo hige lae Magano galati. Timma hiiqqaqqe, mannaho iillishshanno gede rosaanosira uyi.

¹⁷Baalunku itte duubbu. Rosaanosi mannu iteenna gatinoha timmatenna qulxu'mete hambaa tonaa lame soro wonshite kayissu.

¹⁸Mitto barra Yesuusi callisi huucci'ranni noowa rosaanosi isiwa daggeenna Yesuusi, «Mannu ane ayeti yaanno?» yee xa'minsa.

¹⁹Insano, «Mitu, ‹Cuuaancho Yohaannisiiti› yaannohe; wolu kayinni, ‹Eeliyaasiiti› yaannohe; wolu qole, ‹Himanaanote giddonni mittu kaino› yaannohe» yite qoltusi.

²⁰«Ki'ne ayeti yitinannieyya?» yee xa'minsa. Pheexiroosi qole, «Ati Maganu Beetto Kiristoosaati» yii.

²¹Yesuusi hakka woyite konne coye mannaho kultannokki gede hajajinsa.

²²Yesuusi rosaanosi, «Manchi Beetti lowo qarra adha hasiissannosi; geerrunna qeesootu roorrooti, Seeru rosiisaano mishshannosi; shinannisi. Ikkollana sayikki barra reyotenni ka"anno» yiinsa.

²³Baalunkura qole, «Hoode'ya ha'ra hasi'rannohu umosi aguro; barru barrunkunni masiqalasi duqqe hoode'ya dayo!

²⁴Lubbosi gatisi'ra hasi'rannohu baalu hu'nanno; ane daafira yee lubbosi hunannohu baalu kayinni gatisi'ranno.

²⁵Mannu gobba baalate jiro afi're lubbosi hu'niro, ma lexxanno?

²⁶Anenna qaale'ya fokkannoha baala, Manchi Beetti umisi ayirrinyinni, Annisi ayirrinyinninna qullaawa sokkaasine ayirrinyinni daanno yannara fokkannosi.

²⁷Halaale kuleemmo'nena, konniicho noori giddonni Maganu gashshooti daanna la'a geeshsha mitu mitu reyitannokkiri no» yiinsa.

²⁸Konne coye coyi'rihunni settu barri gedensaanni Yesuusi Pheexiroosi, Yaiqoobinna Yohaannisi calluwansa haa're huucci'rara mittu ilaali iimira fuli.

²⁹Huucci'ranni hee'reenna albisi soorrameenna wolu daniha ikki; uddanosino waajjo qoffe ikkitu.

³⁰Hatte yannara hedeweelcho lamu manni dagge isi ledo hasaabbanni no. Insa Museetinna Eeliyaasiiti.

³¹Ayirrinyunni leellite, Yesuusi Yerusaalamete qarra adhannotanna reyannota hasaabbanni no.

³²Hatte yannara Pheexiroosinna ledosi noori goxxe no. Baqqi yitanno woyite, Yesuusi ayirrinyenna ledosi noore lame manna affu.

³³Lamunku manni Yesuusiwiinni hadhu yannara Pheexiroosi Yesuusa, «Rosiisaancho'ya, ninkera konniicho hee'ra danchate. Kunnira, sase daase, mitto atera, mitto Musera, mitto Eeliyaasira qanso!» yii. (Pheexiroosi hatto yaanno woyite, umisi ma coyi'ranni nooronni diafino.)

³⁴Pheexiroosi konne coye coyi'ranni hee'reenna gomichu daye goleennansa waajjitu.

³⁵Gomichu giddonni, «Doodhoommohu Beetti'ya konneeti; isi yaannota macciishshe!» yitanno huuro daggu.

³⁶Huuro maacciishshinihu gedensaanni Yesuusi callisi uurre gati. Rosaanosi la'inore baala ayerano kultukkinni sammi yitu.

³⁷Layinki soodo Yesuusinna sasunku rosaanosi ilaalunni dirritanno woyite, lowo manni daye Yesuusi ledo xaadi.

³⁸Mannu giddonni mittichu manchi, «Rosiisaancho'ya, kuni afi'roommo mittootina hursattoe gede huucci'reemmohe.

³⁹Kuneeti bushu ayyaani hedeweelcho amade raashshiishannosi; baattote aana tuge hambiishshanni gongo'mishannosi. Bisosi mundiishshe lowo geeshsha shetise aguranno.

⁴⁰Konne busha ayyaana fushshitara rosaanokkira kulummota didandiitino» yii.

⁴¹Yesuusi, «Ki'ne amma'na noo'nekkiri shokkadda ilama, ani ki'ne ledo mageeshshi geeshsha hee'reemmo? Ki'nere mageeshshi geeshsha cinceemmo? Hanni beetto anewa abbe!» yii.

⁴²Beettu Yesuusiwa shiqita bushu ayyaani uulla tuge fittifachiishisi. Yesuusi kayinni busha ayyaana rufi; beettono hurse annaho uyi.

⁴³Mannu baalu Maganunnita jawa wolqa lae dhaggeeffati. Wo'munku Yesuusi assino coye dhaggeeffattanna isi rosaanosi,

⁴⁴«Konne kuleemmo'ne qaale wodanche! Manchi Beetto mannu angara sayinse uyinanni» yiinsa.

⁴⁵Rosaanosira kayinni kuni coyi dileellinonsa; coyisi tiro go'litinonsa; xa'mitannokki gedeno waajjitino.

⁴⁶Rosaanosi, «Ninke baalunku giddo rooru ayeti?» yitanni heewisantu.

⁴⁷Yesuusi kayinni wodaninsa hedo afe, mitto qaaqqo haa're mulesi uurrise,

⁴⁸Rosaanosira, «Konne qaaqqo su'mi'yanni adhannohu aneno adhanno. Ane adhannohu, ane calla ikkummokkinni ane soyinoehano adhanno. Ki'ne giddo wo'munkura woriidihu baalunkura rooriidiha ikkanno» yiinsa.

⁴⁹Hakkunni gedensaanni Yohaannisi Yesuusa, «Rosiisaancho'ya, mittu manchi su'mikkinni durriisa fushshanna anfe, ninke ledoha ikkinokki daafira hoolloommo» yii.

⁵⁰Yesuusi qole, «Giwanno'nekkihu baalu ki'ne ledoha ikkino daafira agurre» yiinsa.

⁵¹Yesuusi iimira ha'ranno barri gamba yiita Yerusaalame ha'rara murci're kai.

⁵²Isi alba ikkite hadhanno sokkaano soyi. Insano baalanka coye qixxeessitara Samaariyu qacha hadhu.

⁵³Ikkollana isi hakkaanni hige sae Yerusaalame ha'ranni noota affino daafira, hakko qachi manni haa'rasira dihasi'rino.

⁵⁴Rosaanosi Yaiqoobinna Yohaannisi konne coye affe, «Mooticha, iiminni giira dirrite konne manna itte guddanno gede hajanjammora fajjattonkeni?» yitusi.

⁵⁵Yesuusi kayinni hanqe rufe, «Ki'nera hiittoo Ayyaani noo'nero diaffinoonni.

⁵⁶Manchi Beetti mannu lubbo gatisara ikkinnina hunara didayino» yii.[1] Hakkiinni ka'e wole qacha hadhu.

⁵⁷Doogo hadhanni heedheenna mittichu manchi Yesuusira, «Ati ha'rattowa baala hoodekki ha'reemmo» yii.

⁵⁸Yesuusi qole, «Yeedaala galtanno bale afidhino; ceateno heedhanno mini noonsa. Manchi Beetti kayinni umo worannowa nafa diafi'rino» yiisi.

⁵⁹Yesuusi wole mancho, «Hoode'ya amo!» yii. Hakku manchi kayinni, «Mooticha'ya ballo, balaxe ha're anna'ya madaadhe dayemmona fajjie!» yii.

⁶⁰Yesuusi qole, «Reyitinori reyitinonsare madaadhitona, ati hadhe Maganu Gashshootire kuli!» yiisi.

⁶¹Mittu wolu manchi qole, «Mooticha'ya, ani hoodekki ha'reemmo; balaxe kayinni mini'ya manna keerunni yee dayemmona agarie» yii.

⁶²Yesuusi daware, «Hawuurranni wenencho amade hee're badhe hige caaqqi yaannohu, Maganu Gashshootira di"ikkanno» yiisi.