Read Sidama_Qullaawa _Maxaafa MARRO 12 Bible Online

MARRO 12 - Sidama_Qullaawa _Maxaafa bible

MARRO 12

¹«Annuwa'ne Magani Kaaliiqi, ragidhinara uyino'ne baatto aana heedhinanni diri baalunkunni agadha hasiissanno'neti woganna seeru kunninni aante nooreeti:

²Baattonsa aaninni shorritinanni daga seeddaanna ilaallara, gaarratenna lattino haqqe hunda magannansa magansidhanno darga baala co'o assitine hunne.

³Kakkalonsa dargano diigge; kakka'litanno sooddiyye hiiqqaqqe. Asheera maganota mokkollose giirre. Sooddiyyese cancanne. Layinkimeeshsho magansi'nannikki gede su'mansano hakko darginni hunne.

⁴«Magano'ne Kaaliiqa insa magannansa magansidhanno garinni magansidhinoonte.

⁵Kayinnilla, Magani'ne Kaaliiqi su'misi hee'rannowa ikkanno gede ga're'ne mereero doodhannowa martine magansidhesi.

⁶Hakkiirano shilqote kakkalonna wole kakkalo, tonnunni mitto, fushsho, baxxine uyitinanni afansha, xano, lalunniha, ge'reewunnihanna meunniha umo qalaminoha baala abbe.

⁷Hakkiicho Magani'ne Kaaliiqi albaanni ittinanni hagiidhitinanni. Magani'ne Kaaliiqi assidhinoonnihu baalunkunni maassi'ranno'ne daafira, ki'nenna mini'ne manni baalunku hagiidhitinanni.

⁸«Fooliishshote gobbanna Magani'ne Kaaliiqi aanno'ne baatto iillitinoonnikki daafira, techo assitinanni gedenna mittu mittunku lawisiwa magansi'rannohu gede assitinoonte.

¹⁰Yordaanoosi fultinanni yannaranna Magani'ne Kaaliiqi iqqa asse aanno'ne baattora heedhinanni yannara, waajja nookkiha heedhinanni gede gaangaawi'nera noo diinna baalantenni fooliishshiishanno'ne.

¹¹Hakkunni gedensaanni, Magani'ne Kaaliiqi su'misi galannowa ikkanno gede doodhanno darga, hajajeemmo'nere baalanka: Shilqote kakkalonna wole kakkalo, tonnunni mittonna baxxine uyitinanni afansha, hattono Kaaliiqira xa'nitinoonniha ayirrado coye baala hakkiira abbitinanni.

¹²Hakkiicho ki'ne, ooso'ne, soqqamaano'ne, hattono katamma'nera heedhannori uminsa baatto afidhinokki Leewaawooti ledo mitteenni hagiidhe.

¹³Shilqote kakkalo hasidhini darga baalawa shiqishshinannikki gede qorophe.

¹⁴Shilqote kakkalo'ne, gosa'ne mereero mittowa, Kaaliiqi doodhannowa calla shiqishshe. Hakkiicho ani hajajeemmo'nere baala wonshitinanni.

¹⁵«Ikkirono, Magani'ne Kaaliiqi aanno'ne atooti deerrinni, heedhiniwa baala bulaanna geedimo ittinanninte gede, umi'ne saada gorritine hasidhini geeshshi maala itte. Seeru garinni maganittete doogora keeraa'minohuno ikko keeraa'minokkihu baalu konne maala ita dandaanno.

¹⁶Mundee kayinni wayi gede baattote aana dunne ikkinnina agginoonte.

¹⁷Gidi'neha, haaro woyinete xajje'nehanna zayite'neha tonnunni mitto, woy lali'neha, ge'reewi'nehanna mei'neha umiha, woy xa'nitinoonniha, woy baxxine uyitinanni afanshanna fushsho, katamma'ne giddo ita dihasiissanno'ne.

¹⁸Magani'ne Kaaliiqi doodhanno darga ki'ne, ooso'ne, soqqamaano'ne, katamma'nera heedhanno Leewaawooti ledo Magani'ne Kaaliiqi albaanni ittinanni. Anga'nenni loossinoonni loosi baalunkunni Magani'ne Kaaliiqi albaanni hagiidhitinanni.

¹⁹Tenne baatto aana heedhinoonni geeshsha Leewaawoota de'inoontensa.

²⁰«Magani'ne Kaaliiqi uyino'ne hexxo garinni gashshoote'ne halashshanno yannara, maala yorsiisi'nero, hasidhini yannara ita dandiitinanni.

²¹Magani'ne Kaaliiqi magansidhinasira doodhino dargi ki'newiinni lowo geeshsha fafinoha ikkiro, hajajoommo'ne garinni Kaaliiqi uyino'ne lalo, ge'reewonna me"e gorridhine mine'ne hasidhini yannara ita dandiitinanni.

²²Seeru garinni keeraa'minohuno ikko keeraa'minokkihu bulaanniha woy geedimu maala, wole saada itanno garinni itona.

²³Mundee kayinni, agginannikki gede qorophe. Mundeete giddo lubbo noo daafira, lubbo maalu ledo ittinoonte.

²⁴Mundee wayi gede baattote aana dunne ikkinnina agginoonte.

²⁵Kaaliiqi albaanni dancha coye assitinironna mundee aga agurtiniro, ki'neranna ki'ne gedensaanni ooso'nera seyanno'ne.

²⁶«Ikkollana, qullaawanna xa'nitinoonni afansha baala haadhine Kaaliiqi doodhanno dargira abbe.

²⁷Shilqote kakkalo'ne, maalano mundeeno Magani'ne Kaaliiqira kakkallanni dargira shiqishshe. Wole kakkalo mundee Magani'ne Kaaliiqi kakkalo darga massitine duntine, maala kayinni ita dandiitinanni.

²⁸Hajajoommo'ne coye seekkitine agadhitiniro, Maganu albaanni dancha coye ikkanno'ne. Ki'neranna ki'ne gedensaanni ooso'nera geedote seyanno'ne.

²⁹«Magani'ne Kaaliiqi horritinannirenna shorritine huntinanni daga albi'nenni hunanno. Insa huneenna baattonsara heedhinanni yannara kayinni,

³⁰albi'nenni ba'uhu gedensaanni, ‹Tini daga magannansa hiitto assite magansidhanno? Ninkeno insa gede assineemmo› yitine woshshaadantinannikki gede qorophe.

³¹Insa magansidhanno woyite, Kaaliiqi giwanno coye baala assitanno. Oosonsa nafa magannansara giirte kakkaltanno. Kunni daafira, Magano'ne Kaaliiqa insa magansidhanno garinni horonta magansidhinoonte.

³²«Ani hajajummo'nere baala agadhe; leddinoonte; xeissinoonte.