Read Sidama_Qullaawa _Maxaafa MARRO 16 Bible Online

MARRO 16 - Sidama_Qullaawa _Maxaafa bible

MARRO 16

¹«Magani'ne Kaaliiqi Abiibi yinanni aganira hashsha Gibitsetenni fushshino'ne daafira, Mararrote Ayyaana kunni aganira ayirrisse.

²Kaaliiqi magansi'nannisi gede doodhanno darga ge'reewonna me"e woy saada'ne giddonni mittoricho Magani'ne Kaaliiqira Mararrote Ayyaani kakkalo assitine shiqishshe.

³Shiishshino liisamenni gannoonni timi ledo ittinoonte. Gibitsetenni muddamunni fultinoonni daafira, heeshsho'ne diri baalunkunni fultinoonni barra qaagginanni gede 7 barra qarru tima itte.

⁴Lamalu barri geeshsha baatto baalate aye manchi mineno shiishinorichi hee'roonke. Umi hawarro kakkaltinanni saada maala hashsha ittine gudde ikkinnina soodora gashshitinoonte.

⁵«Magani'ne Kaaliiqi aanno'nehura hiikko katamirano ikko Mararrote Ayyaani kakkalo shiqisha dihasiisanno'ne.

⁶Ikkollana kayinni, magansi'nannisi gede Magani'ne Kaaliiqi doodhanno darga, arrishsho e'anno woyite hawarro Gibitsetenni fultini wari yanna qaagate Mararrote Ayyaani kakkalo shiqishshe.

⁷Maalano du'rishshine Magani'ne Kaaliiqi doodhanno darga itte. Soodanno woyite dukkani'newa galagaltine hadhe.

⁸Lee barra shiishinokki tima itte. Lamalki barra Magani'ne Kaaliiqira qullaawa xaado assidhe; loosono loossinoonte.

⁹«Gide'ne gamba assidhinanni barrinni kayissine 7 higgine 7 barra kiirre.

¹⁰Hakkunni gedensaanni, Magani'ne Kaaliiqi maassi'rino'ne deerrinni, baxxine uyitinanni afansha shiqishshinannihunni Gide Gamba Assate Ayyaaninni Magano'ne Kaaliiqa ayirrisse.

¹¹Ki'ne, ooso'nenna, soqqamaano'ne, katamma'nera heedhanno Leewaawootinna giddo'ne hee'rannohu manni gobba manni, annunna ama noonsakki oosonna gunnootu Magani'ne Kaaliiqi magansi'nasira doodhanno darga martine Magani'ne Kaaliiqi albaanni mitteenni hagiidhe.

¹²Ki'neno Gibitsete borojje ikkitinoonnita qaagge. Tenne hajajono seekkitine agadhe.

¹³«Gidi'ne ayiddummetenni, woyine'ne huuncinanni darginni kayissinihu gedensaanni, Daasu Ayyaana 7 barra ayirrisse.

¹⁴Ayyaani'nera ki'ne, ooso'ne, soqqamaano'ne, katamma'nera heedhanno Leewaawooti, manni gobba manni, annunna ama noonsakki oosonna gunnootu ledo hagiidhe.

¹⁵Kaaliiqi doodhanno darga Magani'ne Kaaliiqira konne ayyaana 7 barra ayirrisse. Magani'ne Kaaliiqi lowo jajja aanno'nenna duushshanno'ne daafira, hagiirri'ne wo'ma ikkanno.

¹⁶«Labballi'ne baalu dirunni sase hige, Mararrote Ayyaanira, Gide Gamba Assinanni Ayyaaniranna Daasu Ayyaanira, doodhanno dargira Magani'ne Kaaliiqi albira shiqqona. Aye manchino Kaaliiqi albira mulla anganni shiqoonke.

¹⁷Magani'ne Kaaliiqi maassi'rino'ne deerrinni mittu mittunku dandiitini geeshsha uuyye.

¹⁸«Magani'ne Kaaliiqi aanno'ne katamma baalantera ga're ga're'nenni daanyootanna roorroota wodhe. Insano mannaho halaalaancho yoo yitona.

¹⁹Yoo shokkishshinoonte; godowa hossinoonte. Gubbo egennaammu ille ballisse, halaalaanote qaale shokkishshannona gubbo ittinoonte.

²⁰Noo'ne wolqa baalantenni halaalaancho yoo calla ha'runse. Hakkunni gedensaanni, Magani'ne Kaaliiqi aanno'ne baatto ragidhine heedhinanni.

²¹«Magani'ne Kaaliiqira seekkitinannihu kakkalote dargi mule Asheerara kakkallanni gede assitine mitto mokkollichono kaassinoonte.

²²Magani'ne Kaaliiqi baxannokki daafira, magansi'nanni sooddiyye uurrisidhinoonte.