Read Sidama_Qullaawa _Maxaafa MARRO 19 Bible Online

MARRO 19 - Sidama_Qullaawa _Maxaafa bible

MARRO 19

¹«Magani'ne Kaaliiqi baattonsa ki'nera aara daga hunanno yannaranna, ki'neno insa shorritine katammansaranna minnansara heedhinanni yannara,

²Magani'ne Kaaliiqi iqqa asse aanno'ne baattora 3 katamma umi'nera qixxeessidhe.

³Manna shiinohu baalu xooqe mare maaxamanno gede, Magani'ne Kaaliiqi iqqa asse aanno'ne baatto sasewa beekkine katama massitanno doogo seekke.

⁴«Mittu manchi afikkinni danotenni baarigaara ikkinokki mancho shiiro, lubbosi gatisi'rara hattenne katamma giddonni mitto katama xooqe eona.

⁵Qoleno mittu manchi olliichisi ledo haqqa mudhara dubbo ha'riro, mudhanni heereenna hedeweelcho meesane cu"u giddonni fulte olliichosi gante shituro, hakku manchi hattenne katamma giddonni mitticho katama xooqe e"e lubbosi gatisi'ra dandaanno.

⁶Hatto ikka hoogiro, baarigaarretenni ikkikkinni danotenni shiinoha, doogo seeddeenna rabbisannohu aarame faana gane iille, reyate hasiisannokki mancho shaara dandaanno.

⁷Sase katamma umi'nera baxxitinanni gede hajajoommo'nehu kunniraati.

⁸«Annuwa'nera uyino hexxo garinni, Magani'ne Kaaliiqi gobba'ne halashshanno yannaranna yiino garinni baatto baala aanno'ne woyite,

⁹Magano'ne Kaaliiqa baxxinanni gedenna doogosi hadhinanni gede techo eemmo'neha konne seera baala seekkitine agadhitiniha ikkiro, kuri aana woloota 3 katamma lexxitinanni.

¹⁰Magani'ne Kaaliiqi iqqa asse aanno'ne baattora keeraancho mancho shinannikki gedenna reyino manchi barshi amadanno'nekki gede konne coye asse.

¹¹«Ikkollana mittu manchi olliichosi giwino daafira, duge agare shiironna tenne katamma giddonni mittu giddora xooqe eiro,

¹²hee'ranno katami geerri manna soye abbisiisona. Hakkunni gedensaanni shaanno gede rabbisannohura sayise oona.

¹³Hakkonne mancho marartinoonte. Seyanno'ne gede keeraanchu manchi mundee barshi Israeelete hee'rannokki gede asse.

¹⁴«Magani'ne Kaaliiqi ragidhinara aanno'ne baattora ki'nera iillanno'ne iqqi aana albi manni worinoha olliichi'ne danna diigginoonte.

¹⁵«Aye manchi hunino coyirano mittu manchi callu naqaashshe ikkara didandaanno. Ajaa ajeenna lamu manchi naqqasa hasiissanno.

¹⁶«Mittu manchi bunshetenni wole beebbatenni Maganoho gara giwino yee yekkeeriro,

¹⁷lamunku hatte yannara Kaaliiqi albaanni soqqantanno qeesootinna daanyootiwa shiqqona.

¹⁸Yoo yitannorino hajo seekkite buuxxona. Ku'u rodoosi beebbatenni bushiishinosita buunxiro,

¹⁹rodiisira hedinore umisira qolle. Kunni garinni busha mereeri'nenni huntinanni.

²⁰Wolu mannino konne coye macciishshe layinkimeeshsho hattoo coye assa waajjanno.

²¹Hattoo coye assannoha marartinoonte. Lubbote darga lubbo, illete darga ille, hinkote darga hinko, angate darga anga, lekkate darga lekka hunne.