Read Sidama_Qullaawa _Maxaafa MARRO 2 Bible Online

MARRO 2 - Sidama_Qullaawa _Maxaafa bible

MARRO 2

¹Hakkiinnino, Kaaliiqi hajajinoe garinni hingoommo. Duumu Baari doogo amande halallitte gobba ha'noommo. Edoomi gaaraame gobbara lowo yanna raataamboommo.

²Hakkunni gedensaanni Kaaliiqi,

³«Kawiicho gaaraame gobbara lowo geeshsha raataabbinoonni. Xa kayinni alba aliyyera higgine hadhe.

⁴Mannaho, ‹Xeertote hee'rannohu fiixi'ne Eesawu sirchi hee'rannowa gaaraame Edoomi gobba widoonni higgine sa'inanni. Insa ki'ne waajjitanno. Ikkirono seekkitine agadhe.

⁵Baattonsa aaninni kaxxitine uurritinanni geeshshiwa nafa eemmo'nekki daafira, insa hasiissinoonte. Gaaraame Edoomi gobba Eesawu sirchira oommo.

⁶Hasiissanno'neta sagalenna waa woxunni hidhe› yiino yite kulinsa» yii.

⁷Anga'nenni assitinoonni coyi baalunkura Magani'ne Kaaliiqi lowo atoote uyino'ne. Tenne hala'lado halallitte gobbara raataabbini yanna baalate towatanni agarino'ne. Kunni shoyilluu diri wo'mu giddo Kaaliiqi ki'ne ledo noo daafira, xeino'neri mitturino dino.

⁸Kunnira, Edoomi heedhannore Eesawu sircho ikkitinori roduuwinke widoonni hinge sa'ne ha'noommo. Elaatinna Etsiyonigabiirinni daggannota Areba doogo agurre hinge, Moaabi Halallitte amande ha'noommo.

⁹Hakkiinni Kaaliiqi, «Moaabootu baattonni shiima baattono eemmo'nekki daafira, insa qarrissinoonte. Olahono kakkayissinoontensa. Eeri Looxi sirchira iqqa asse oommo» yiinoe.

¹⁰(Hakkiichino kee'maddunna wolqaataammu hattono Enaaqootu gede hojjaameeyye ikkitinori Emiimootu heedhinowaati.

¹¹Kurino Enaaqootu gede Refootaho yine hendannireeti. Moaabootu kayinni Emiimootaho yitannonsa.

¹²Horootu alba Edoomi heedhanno. Eesawu sircho ikkitinori kayinni, insa shorrite huntuhu gedensaanni hakkiicho heedhino. Kunino Kaaliiqi iqqa asse uyinonsa baattora Israeelete manni assino garaati.)

¹³Hakkunni gedensaanni Kaaliiqi, «Xaanni ka'ine Zereedi Lagicha fulle» yiinonke. Ninkeno hakkonne lagicha fulloommo.

¹⁴Qaadesi Bernenni ka'nummo yannanni kayise, Zereediha moola laga fullummo geeshsha 38 diri goofino. Hatte yannara olaho iillitinori hatte ilama labballi baalunku Kaaliiqi balaxe xaarino garinni co'o yite gooffino.

¹⁵Heedhannowiinni co'o asse hunansa geeshsha Kaaliiqi anga aaninsanni dika'ino.

¹⁶Mannu mereero noori olantannori baalunku reyituhu gedensaanni,

¹⁸«Moaabi qacce Eeri Katama techonni sa'inanni.

¹⁹Amoonootu gobbanni ki'nera mittoreno eemmo'nekkihura, Amoonootunniwa iillitinanni yannara insa qarrissinoonte. Olahono kakkayissinoontensa. Hakkonne darga Looxi sirchira iqqa asse oommona» yiino.

²⁰(Hatti qolte hakkiicho heedhannori Refootu baatto ikkitino gede hendanni. Amoonootu kayinni Zemizumootaho yitannonsa.

²¹Zemizumootu kee'maddahonna batinyeho. Hattono Enaaqootu gede hojjaameeyyete. Ikkollana insa Kaaliiqi albinsanni hunino. Amoonootuno insa shorrite dargansa amaddu.

²²Kaaliiqi Edoomi heedhannorira Eesawu sirchirano hattonni assino. Kunino Horaawoota albinsanni shorre hune baattonsa ragidhanno gede assino; insano techo geeshsha hakkiicho heedhanno.

²³Kereeti yinanni giddichonni dagginori Gaazu geeshsha noo qachuwara heedhanno Awiimoota hunte gobbansa baalanta adhite hakkiicho heedhino.)

²⁴Kaaliiqino, «Xaanni ka'ine Arnooni Xashsho fulle. Kuneeti, Hasebooni moote, Amooraawicha Sewooninna gobbasi anga'nera sayise oommo'nena, iso qassine baattosi ragidhe.

²⁵Techonni kayisse Gordoho woroonni noo daga duuchanti, ki'ne huxidhe waajjitanno'ne; ki'ne duduwo macciishshite masse qece yitanno» yii.

²⁶Ani Muse Qedemooti Halallittenni, Hasebooni moote Sewoonira keeru sokka iillishshannosi gede manna soye,

²⁷«Gobbakki giddoonni hinge sa'neemmo gede fajjinke. Ka'anna kawa hingummokkinni doogo calla amande ha'neemmo.

²⁸Inteemmo sagalenna angeemmo waa woxunni hidhineemmo. Giddoonni hinge sa'neemmo gede calla fajjinke.

²⁹Edoomi heedhannori Eesawu sirchinna Eeri heedhannori Moaabootu assitunke gede, Maganinke Kaaliiqi aannonke gobba e'nammora Yordaanoosi Waa fullammo geeshsha atino kaa'linke» yoommo.

³⁰Magani'ne Kaaliiqi xa assinonte gede iso anga'nera sayise aara wodanasi kaajjishe mokkookka assino daafira, Hasebooni moote Sewooni sa'nammora difajjinonke.

³¹Kaaliiqino, «Kuneeti, Sewooninna gobbasi ki'nera sayise aammo'nera kaoommona, iso qeeltine baattosi ragi'rate ka'e» yiinoe.

³²Sewooninna olantosi baala Yahaatsi Katamira ninke ledo gaarantara fultu yannara,

³³Maganinke Kaaliiqi insa angankera sayise uyino. Ninkeno iso, labballi oososinna olantosi baalante ledo mitteenni gundoommo.

³⁴Hatte yannara, katammasi wo'manta amande diinge hunnoommo. Hakkiicho heedhannore labballo, meentonna oosonsa baala co'o assine gundoommo; mittono digatinsoommo.

³⁵Saadansanna amandoommo katammansa giddonni adhinoommore seyinore kayinni uminkera gatisi'noommo.

³⁶Arnooni Lagichi qaccera noo lagichi Aroeerihu giddo noo kataminni kayise, Geleaadi geeshsha noo katamma giddonni mittu nafa ittisankera dandaanno huxxa afi'rinohu dino. Maganinke Kaaliiqi baalanka angankera sayise uyinonke.

³⁷Ikkollana, Maganinke Kaaliiqi marreemmokki gede hajajinonke garinni, Amoonootu baatto woy Yaabooqi Wayi dirranno baatto, woy qole gaarrate aana noo katammanna wole gobba sa'ne diha'noommmo.