Read Sidama_Qullaawa _Maxaafa MARRO 21 Bible Online

MARRO 21 - Sidama_Qullaawa _Maxaafa bible

MARRO 21

¹«Magani'ne Kaaliiqi ragidhinara aanno'ne baattora shine tungoonni manna affinironna shiinoha afa hoogginiro,

²geerri'nenna daanyooti'ne fulte reeshshu uwe noowiinni kayisse qamattete noo katamma geeshsha noo xeertinye bikkite la'ona.

³Hakkunni gedensaanni, reeshshu uwino dargira roore gamba yiino katami geerri hawuurshaho iillitinokkitanna qambara haxote worroonnikki adde haa're,

⁴loonsenna winxe egenninoonnikkiwa wayi xoannokki lagicha massona. Hakkunni lagichira adde haxo qiqqishshe shitona.

⁵Soqqantanno gedenna mannaho Kaaliiqi maasso huuccitanno gede, yekkeeramatenna gawajjo baalate daafira yoo yitanno gede Magani'ne Kaaliiqi doorinonsana, qeesootu Leewi ooso alba higge shiqqona.

⁶Hakkunni gedensaanni, reeshsha anfi qamattera noo katamira heedhanno geerri baalunku, lagichaho haxo hiiqqine shini adde aana anga hayishshi'ranni,

⁷‹Anganke dishitino; shinannano illenke diaffino.

⁸Kaaliiqa, Gibitsetenni wodde abboottohura Israeelete mannira yite dallaa agurinke. Mannakkino kunni beebbaataamu reyora xa'mammeemmore assitootinke› yoona.

⁹Kaaliiqi albaanni taalo coye assitiniro, beebbaataamu mundee barshe giddo'nenni hoo'litinanni.

¹⁰«Diinna'ne ledo olantinara fultineenna Magani'ne Kaaliiqi insa anga'nera sayise eenna'ne qafaddinanni yannara,

¹¹ki'ne giddonni mittu manchi qafadaminori giddonni xuma mancho afe adhara hasi'riro,

¹²minisira massi'reenna, dananchose meexxitona; culunqaseno mudhitona.

¹³Qafadantu yannara uddidhe noo uddanono soorridhona. Minesi ofolte anniseranna amasera mitto agana wo'ma wi'lituhu gedensaanni, galtesi assi're adhosena.

¹⁴Baxisa hooggusiro ha'risosena. Ledose galino daafira borojjimmate kiiroonkese woy hiroonkesena, hasidhuwa hadhanno gede agurosena.

¹⁵«Mittu manchira lame galte heedhusiro, lamente giddonni mitte roorse baxannoha ikkiro, lamenti labballi ooso ilisironna bayiru beetti baxannosekkiti iltinosiha ikkiro,

¹⁶jajjasi oososira iqqanno yannara, bayirroonye baxannokkitenni ilamino beetti aaninni hoole, baxanno galte iltino beettira aa dihasiissannosi.

¹⁷Baxannosekki galte iltinosiha nafa ikkiro, bayiru beettira jajjisi giddonni 2 anga ee bayirroonyesi egensiisona. Hakku beetti qeedhichimmasiha ikkino daafira bayirroonyu isiho.

¹⁸«Annahonna amate hajajamannokkihu, seejjonsano macciishshannokkihu mokkookkunna haxawarru beetti hee'riro,

¹⁹annisinna amasi haadhe heedhanno katami waalchira noo geerriwa massite,

²⁰‹Kuni beettinke mokkookkahonna haxawarraho; dihajajamannonke; aganni woxe billaallisanno› yite geerraho kultona.

²¹Hakkunni gedensaanni, katamu manni baalunku reya geeshsha kinnatenni awwaalona. Kunni garinni busha mereeri'nenni hunne. Israeelete manni baalunku konne coye macciishshe waajjanno.

²²«Mittu manchi reyote iillishshanno sao asseenna shinironna reeshshasi haqqu aana suntiro,

²³reeshsha sutammowa gashshitinoonte. Haqqu aana sutamannohu Maganu ruminohona, Magani'ne Kaaliiqi iqqa asse aanno'ne baatto batteessitinannikki gede, hakko barranni dirrissine madaarre.