Read Sidama_Qullaawa _Maxaafa MARRO 22 Bible Online

MARRO 22 - Sidama_Qullaawa _Maxaafa bible

MARRO 22

¹«Gobba'ne manchihu lalu woy ge'reewu bainoha affiniro, haadhine massesi ikkinnina sammi yitine sa'inoonte.

²Gobba'ne manchi fafe nooha ikkironna woy saada ayetero affinoonnikkiha ikkiro, annu hasi'ranni daa geeshsha, haadhine mini'nera masse. Hasi'ranni daanno woyite uuyyesi.

³Gobba'ne manchiha harricho woy uddano woy bainosire baala affiniro hattonni asse. Sammi yitine sa'inoonte.

⁴«Gobba'ne manchira harrichu woy bootu doogote ubbe noota affiniro, kayissinikkinni sammi yitine sa'inoonte.

⁵«Meyati labbaahu uddano uddidhoonke; labbaahuno meyate uddano uddi'roonke. Hatto assannohu baalu Magani'ne Kaaliiqi albaanni bushaho.

⁶«Doogo sa'inanni, caacurre woy quuphe hanqafidhe noo ceicho mine haqqu aana woy baattote aana affiniro, ama caacurrise ledo adhitinoonte.

⁷Caacurrese adhitinara dandiitinanni. Seyanno'ne gedenna diri'neno seedanno'ne gede caacurru ama hadhona agurrese.

⁸«Mine mi'nitinanni yannara kaxxine fullanni darga seekkidhiniro, mannu minu aaninni uweenna xa'mantinannikki gede gammala seekke.

⁹«Woyinete kaashshi'ne darga wole jajja loosi'ra hoolloonnite. Hatto assitiniro, hakku jajji'neno ikko woyine'ne kaa'litanno'nekkita ikkitanno.

¹⁰«Handonna harricho mitteenni waaxxine hawuudhitinoonte.

¹¹«Addi addi shalonni gannoonni uddano uddidhinoonte.

¹²«Uddidhinanni uddanora shoolente qaccera handaara worre.

¹³«Mittu manchi galte adhe ledose galihu gedensaanni, baxisa hooggusiro,

¹⁴su'mase hunara, ‹Tenne beetto adhoommollana laummo woyite seemo di''ikkitino› yiiro,

¹⁵beettote anninna ama seemo ikkase leellishanno malaate haa're katamu waalchira noo geerriwa dayona.

¹⁶Beettote anni geerraho, ‹Beetto'ya kunni beettira oommo. Isi kayinni xa giwinose.

¹⁷Su'mase hunara: Beettokki wo'ma di"ikkitino yiinoe. Beetto'ya wo'ma ikkase egenshiishshi kayinni kuneeti› yee kulona. Hakkunni gedensaanni annisenna amase itiillete haanxicho hakko katami geerri albaanni fantona.

¹⁸Hakkunni gedensaanni, geerru giwinoseha amade ereccishona.

¹⁹Kuni beetti Israeelitte seemo su'ma hunino daafira, 100 kinchu birra mursiisse, woxe beettote annira oona. Beettono galtesi ikkite heedhona. Lubbotenni noo geeshsha ha'risasera didandaanno.

²⁰«Ikkeennano, ku'lasi halaale ikkiteenna beetto wo'ma ikkasera egenshiishsha shiqisha hoongiro,

²¹annise mine heedhenni baashaabbe Israeelete giddo shollaataamo coye assitinona, annise mini waalchiwa massineenna, hakko katami manni ise reyita geeshsha kinnatenni awwaalona. Kunni garinni busha mereeri'nenni hunne.

²²«Mittu manchi, wolu manchi galte ledo goxinota anfiro, isonna hattenne mancho shinona. Busha Israeelete giddonni huna hasiissanno'ne.

²³«Mittu manchi huucci'noonnita wo'ma seemo katamu giddo afe ledose goxiro,

²⁴seemo katamu giddo heedhenni iille"e yite raara hoogginohura, manchuno wolu huucci'rinota uggino daafira, lamenka katamu waalchira gobbaanni massitine reyita geeshsha kinnatenni awwaalle. Busha mereeri'nenni huna hasiissanno'ne.

²⁵«Ikkollana, mittu manchi huuccantinota seemo beetto katamu gobbaanni afe wolqatenni uggiro, konne assoote assinohu isi callu reyona.

²⁶Reyote iillishanno cubbo loossinokki daafira, hattenne seemo aana mittorichono assitinoonte. Kuni coyi olliichosi hedeweelcho dano tuge shiinohu ledo mittoho.

²⁷Togo yinoonnihu, tenne beetto katamu gobbaanni amade ugginose daafiranna raarteenna nafa iille gatisannosehu nookki daafiraati.

²⁸«Mittu manchi huucci'noonnikki beetto wolqatenni macca huneenna anfe amandiro,

²⁹kuni manchi beettote annira 50 kinchu birra miinona. Beetto wolqatenni ugginose daafira, isi adha hasiissannosi. Reya geeshsha minisinni ha'risasera didandaanno.

³⁰«Ayino annisi galte ledo goxe annasi shollishoonke.