Read Sidama_Qullaawa _Maxaafa MARRO 26 Bible Online

MARRO 26 - Sidama_Qullaawa _Maxaafa bible

MARRO 26

¹«Magani'ne Kaaliiqi iqqa asse aanno'ne baatto ragidhine heedhinanni yannara,

²mitti mitti'ne Magani'ne Kaaliiqi aanno'ne baattonni gamba assidhinanni laalchi baalunkunni umiha haadhine gimboolaho worre. Hakkunni gedensaanni, Magani'ne Kaaliiqi magansi'nasira doodhanno dargira haadhine abbe.

³Hatte yannara soqqamanni noo qeesichira, ‹Kaaliiqi ninkera aankera annuwankera xaarino baatto iillinoommota techo Maganikki Kaaliiqi albaanni coyi'neemmo› yiiyye.

⁴«Qeesichuno, gimboola anga'nenni haa're, Magani'ne Kaaliiqira kakkallanni dargira albaanni woranno.

⁵Mitti mitti'ne Magani'ne Kaaliiqi albaanni, ‹Ahaahinke xeeda galanno Sooriyichaati. Shiimu manni ledo Gibitse dirre hakkiicho hee'rino. Jawaata, wolqaataamonna kiirono bati'ra manna ikkino.

⁶Gibitsootu kayinni, wolqate looso loosiissanni wotto wortinonke.

⁷Hatte yannara, annuwanke Magani Kaaliiqiwa hinge raarroommo. Kaaliiqino raarenke macciishshino. Shettonke, qarrankenna gadadonkeno laino.

⁸Kunninni kainohunni, Kaaliiqi jawaata angasinninna wolqaataame cigilesinni lowo masillinni, maala'linanni malaatinninna dhaggetenni Gibitsetenni fushshinonke.

⁹Kawiichirano haa're abbinonke. Malawunna ado lolakkannota tenne shaqqado baatto uyinonke.

¹⁰Xaano Kaaliiqa, kuneeti ati oottoeha baattonniha umi laalcho abboommohe› yiiyye. Gide amadino gimboolano Magani'ne Kaaliiqi albaanni worre. Magano'ne Kaaliiqa magansidhe.

¹¹Ki'nenna maate'ne, Leewaawootunna giddo'ne hee'rannohu manni gobba manni Magani'ne Kaaliiqi uyino'nehu danchu coyi baalunkunni ji'litinanni hagiidhe.

¹²«Sayikki sayikki diro, gidi'nenni tonnunni mitte anga baddine fushshitine katamma'nera noori Leewaawootu, manni gobba manni, anna ama afidhinokkirinna gunnootu ite duuwanno gede uuyyensa.

¹³Hakkunni gedensaanni, mitti mitti'ne Magani'ne Kaaliiqira, ‹Oottonke hajajo garinni ate Kaaliiqira bandoommohunni mittorichono gatinsummokkinni Leewaawootaho, manni gobba mannira, annunna ama noonsakkiriranna gunnootaho uyinoommo. Hajajokki baala wonshinoommo; mittorichono dihamboommo.

¹⁴Wi'late aana hee'ne, ate Kaaliiqira bandoommori aaninni mittoreno di"intoommo. Keeraa'minoommokki yannarano kunni aaninni adhinoommori woy reyino mannira uyinoommori mitturino dino. Ate Maganinke Kaaliiqira hajajammoommo; hajajokki baalanta wonshinoommo.

¹⁵Qullaawa gollora gordoho heedhe kawa higge lai; mannakki Israeeleno maassi'ri; annuwankera ootto hexxo garinni, ninkera oottonketa tenne malawunna ado lolakkanno baatto maassi'rinke› yiiyye.

¹⁶«Magani'ne Kaaliiqi tenne woganna seera agadhitinanni gede techo hajajinonke. Ki'neno wo'mu wodani'nenninna wo'ma lubbo'nenni wonshate seekkitine agadhe.

¹⁷Kaaliiqi Magano'ne ikkino gede doogosino ha'runsitinanni gede wogasi, hajajosinna seerasi agadhitinanni gedenna hajajantinannisi gede techo lallabbinoonni.

¹⁸Kaaliiqi uyino'ne hexxo garinni ki'ne mannasinna iqqasi ikkitinoonnita, hajajosi baalanta agadhitinannita isino techo lallawino.

¹⁹Kalaqino gosa baalatenni roore ayirradda assanna'ne ki'neno galatanna ayirrinye su'misira uyitinanni. Uyino'ne hexxo garinnino ki'ne isi umisi manna ikkitinanni» yii.