Read Sidama_Qullaawa _Maxaafa MARRO 3 Bible Online

MARRO 3 - Sidama_Qullaawa _Maxaafa bible

MARRO 3

¹Hakkiinni sa'ne aliyyeenni hinge Baasaanira ha'noommo. Baasaani moote Aagino olantosi baalante ledo Edirayi Katami mule ninke ledo gaaramara dayi.

²Kaaliiqi kayinni, «Iso, olantosi baalantanna baattosi angakkira sayise oommohena, waajjitooti. Isono Hasebooni gashshinoha Amooraawootu moote Sewooni assitto gede assi» yiie.

³Kunnira, Maganinke Kaaliiqi Baasaani moote Aaginna olantosi baalanta angankera sayise uyinonke. Ninkeno mitto nafa gatinsummokkinni shine gundoommo.

⁴Hatte yannara, katammasi baalanta amandoommo. Aagi gashshootira Baasaani Argobbi gobbara noo katamma leyante giddonni ninke amandoommokkihu mittu nafa dino.

⁵Tini katamma baala seedu huxxinni qiinshoonnite; huxxu cufannano waawansinoonnite. Qoleno huxxu noonsakkiti lowo qachuwa no.

⁶Hasebooni mooteha Sewooni katamma assinummonte gede katamma baalanta labballo, meentonna oosonsa co'o assine gundoommo.

⁷Saadansa wo'mantanna katammansa giddonni afi'noommore seyinore baala kayinni uminkera gatisi'noommo.

⁸Hatte yannara Yordaanoosira soojjaatoonni Arnooni Lagichinni kayise Hermooni Ilaali geeshsha noo gobba, kore lamenka Amooraawootu mootoollawiinni adhinoommo.

⁹(Hermooni Ilaala, Sidoonootu Siriyooni yitanno. Amooraawootu kayinni, Seniiri yitanno.)

¹⁰Tullichaame baatto aana noo katamma baala, Geleaadi noo gedeenni, Salekanni kayisse Edirayi geeshsha noota Baasaani gudinse hattono giddose noota Aagi gashshooti katamma baala angara qo'linoommo.

¹¹(Refootu giddonni Baasaani moote Aagi callu gatino. Moogosi reeqqatenni seekkinoonni. Seendille honse cigile, hala'linye 4 cigile ikkanno. Kunino xaa geeshsha Amoonootu Katamira Raaba no.)

¹²Hattenne gobba adhinummo yannara, amandoommo baatto aaninni Arnooni Lagichi mule noohunni Aroeeri Kataminni kayise aliyyeenni noo gashshooti aana, gaaraame Geleaadi gobba darate katammante ledo Roobeelinna Gaadi ga'rera oommonsa.

¹³Gattinota Geleaadi baattonna Aagi gashshoote Baasaani gudise Minaase ga'rera darateho oommo. (Baasaani nooti Argobbi gobba baala Refootu baattooti yinanni.

¹⁴Minaase ga'rehu Yaiiri Geshuurootunna Maikootu danni geeshsha noota Argobbi baatto baala Baasaani adhino. Yaiirino qachuwa su'misinni woshshino. Techo geeshsha Habooti Yaiiri yinanni.)

¹⁵Geleaadi Minaase ga'rehura Makiirira oommo.

¹⁶Roobeelinna Gaadi ga'rera lagichu darate danna asse, Geleaadinni kayise Arnooni Lagicha iillishe, hakkiinnino Amoonootu danni Yaabooqi Wayi geeshsha noo gobba oommo.

¹⁷Galchimi Areba noohu Yordaanoosi Wayi danna ikkanna, Soojjaatoonni Fisiga Ilaali hundi geeshsha, Gensareexinni kayise Maxinete Baari geeshshaati.

¹⁸Hatte yannara ani, «Maganinke Kaaliiqi tenne baatto ki'nera iqqa asse uyino'ne. Ikkollana bagadaano'ne baalanti olaho qixxaabbo; roduuwinsa Israeelootu balaxxe Yordaanoosira widoonni fula hasiissannonsa.

¹⁹Meenti'ne, ooso'nenna saada'ne oommo'ne katammara keeshshito. (Lowo saada noo'neta afoommona.)

²⁰Kunino, ki'nera assinonte gede roduuwa'ne fooliishshiishansara Magani'ne Kaaliiqi Yordaanoosira widoonni aanno'ne baatto ragidha geeshshaati. Hakkunni gedensaanni, mitti mitti'ne oommo'ne iqqiwa higginanni» yee hajajoommo'ne.

²¹Hatte yannara Iyyaasu, «Magani'ne Kaaliiqi tenne lamenta mootoolla assinota baala illekkinni afootto; xaano martinanni gobba gashshoote baala Kaaliiqi hattonni assanno.

²²Magani'ne Kaaliiqi gaaramanno'nena, waajjitinoonte» yee hajajoommosi.

²³Hatte yannara ani,

²⁴«Mooticha Kaaliiqa'ya, jawimmakkinna jawaata cigilekki kune ane borojjichikkira leellisha hanafootto. Gordohonna baattote aana, ati loosatto gedeeha wolqaataamo looso loosara dandaanno magani nooni?

²⁵Xaano Yordaanoosira widoonni noota hattenne dancha baatto, xuma gaaraame gobbanna Libaanoosi ilaalla la"ammora fajjie» yee huucci'roommo.

²⁶Kaaliiqi kayinni ki'nenni kainohunni hanqinoe daafira dimacciishshinoe. Kaaliiqino, «Xaate ikkinona konne coye kayissinoonte.

²⁷Ati Yordaanoosi fulattokki daafira, Fisiga Ilaali birxe fulte, galchimiranna aliyyera, wodiidiranna soojjaatira higge baatto illekki callatenni lai.

²⁸Ikkollana, mannaho albisanni tenne la"atto baatto ragidhanno gede assannonsaha ikkino daafira, Iyyaasura assannore kulisi; jawaatannonna kaajjanno gede irkisisi» yiinoe.

²⁹Kunnira, ninke Beeti-Fegoori Katami mule noo lagichira keeshshinoommo.