Read Sidama_Qullaawa _Maxaafa MARRO 30 Bible Online

MARRO 30 - Sidama_Qullaawa _Maxaafa bible

MARRO 30

¹«Alba'neenni woroommoti tini maassonna rumo baalanti ki'newa dagganno woyitenna Magani'ne Kaaliiqi billaallisanno'ne gosa mereero heedhine galfattinanni yannara, kuloommo'ne coye qaaga dandiitinanni.

²Hattoonnino techo ani hajajeemmo'ne garinni ki'nenna ooso'ne Magani'ne Kaaliiqiwa higgine wo'mu wodani'nenninna wo'ma lubbo'nenni hajajantinisiro,

³Magani'ne Kaaliiqi mararanno'ne. Dagate mereero billaallisino'newiinnino galagalche gamba asse duroonsanno'ne.

⁴Lowo geeshsha xeerto, gobbate qacce geeshsha massini'nero nafa, Magani'ne Kaaliiqi hakkiinni gamba assanno'ne; qoleno abbanno'ne.

⁵Annuwa'ne heedhino gobbanni jiro ragidhinanni gede galagalche abbanno'ne. Annuwa'nenni roore duroonsanno'ne; batisanno'ne.

⁶Magano'ne Kaaliiqa wo'mu wodani'nenninna wo'ma lubbo'nenni baxxinanninna lubbotenni heedhinannni gede, Magani'ne Kaaliiqi ki'nenna sircho'ne owaatu wodanire assanno'ne.

⁷Magani'ne Kaaliiqi tenne rumo baalanta gibbanno'neriranna okkitanno'ne diinna aana dirrisanno.

⁸Ki'neno galagaltine Kaaliiqira hajajantinanni. Techo ani hajajeemmo'ne hajajo baalantano agadhitinanni.

⁹Magani'ne Kaaliiqi assidhinanniri baalunkunni duroonsanno'ne. Lowo oosonna lowo saada afidhinanni. Baatto'neno lowo jajja laashshitanno'ne. Annuwa'ne duroonse hagiidhinte gede, Kaaliiqi ki'neno dureensatenni hagiidhanno.

¹⁰Ki'ne kayinni, Magani'ne Kaaliiqira hajajama hasiissanno'ne. Kunni Seeru Maxaafi giddo borreessinoonnita wogasinna hajajosi baala agadhe. Wo'mu wodani'nenninna wo'ma lubbo'nenni Magani'ne Kaaliiqiwa higge.

¹¹«Techo eemmo'ne hajajo lowo geeshsha digo'litannote; woy hajajamateno diqarrissannote.

¹²‹Iima noota di"ikkitinona, macciishshine hajajammeemmo gede xeertidhinonkena, iimira ayi mare abbannonke?› yitinoonte.

¹³Qoltineno, ‹Baara widoonni noota di"ikkitinona, macciishshine hajajammeemmo gede, baara widira fule ayi abbannonke?› yitine xa'mitinoonte.

¹⁴Qaalu kune ki'newa no. Wodani'neranna afii'nera noona hajajamme.

¹⁵«Kuneeti, techo doodhitinanni gede danchanna busha, heeshshonna reyo oommo'ne.

¹⁶Techo ani eemmo'neta Magani'ne Kaaliiqi hajajo iso baxatenni, doogosi ha'ratenni seerasi baala, wogasinna wodhosi wonshitiniro, lubbotenni heedhinanni. Batidhinanni; Magani'ne Kaaliiqino martine ragidhinanni baattora maassi'ranno'ne.

¹⁷«Wodani'ne wolewa higironna hajajama gibbiniro, wole maganna magansidhinoronna soqqantininsaro kayinni,

¹⁸halaalintanni ba'inannita ani techo barra kuloommo'ne. Yordaanoosi Waa fultine ragidhinanni baattora lowo yanna diheedhinanni.

¹⁹«Doodhitinanni gede heeshshonna reyo, maassonna rumo alba'neenni woroommohura, techo gordonna baatto naqaashshe asse kiiroommo. Lubbotenni heedhinanni gede heeshsho doodhe.

²⁰Magano'ne Kaaliiqa baxxe; isira hajajamme; ammanantinoonnire ikke. Hatto assitiniro, annuwa'nera Abirihaamira, Yisihaaqiranna Yaiqoobira aansara xaarino baattora heeshsho eenna'ne ki'nenna sirchi'ne seeda diro heedhinanni» yii.