Read Sidama_Qullaawa _Maxaafa MARRO 34 Bible Online

MARRO 34 - Sidama_Qullaawa _Maxaafa bible

MARRO 34

¹Muse Moaabi xawinni kae Iyyaarkora soojjaatoonni nooha Nebo Ilaali birxe Fisiga giddi. Hakkiicho Kaaliiqi Geleaadinni kayisse Daani Katami geeshsha noo baatto baala leellishisi.

²Nifitaalemi baatto baala Efireeminna Minaase baatto galchimaanni Mediteraaniyu Baari qaccera nooti Yihudu baatto,

³Yihudaho wodiidoonni noota Negebi baatto, Zooaarinni kayise Iyyaarko saattu hee'ranno katami geeshsha noo xawo baalanka leellishisi.

⁴Hakkunni gedensaanni Kaaliiqi Musera, «Abirihaamira Yisihaaqiranna Yaiqoobira, ‹Sirchi'nera eemmo› yee xaaroommo baatto tenneeti. Illekkinni la"atto gede assoommohe; lekkakkinni kadattora kayinni dieemmohe» yiisi.

⁵Kaaliiqi coyi'rinonte gede soqqamaanchisi Muse Moaabi gobbara reyi.

⁶Moaabi baattora Beeti-Fegoori albaanni noo lagira Kaaliiqi madaarisi. Ikkollana waammasi hiikkiicho nooro techo geeshsha afinohu dino.

⁷Muse reyi yannara dirisi mitto xibbenna lemooho. Ikkirono illesi dijaaroortino; wolqasino dixe'ino.

⁸Israeelete manni budinsa garinni Muse reyora wi'lanninna manchitanni Moaabi Xawira 30 barra keeshshi.

⁹Muse dargasi amadanno gede angasi aanaho worinosi daafira, Kaaliiqi Newe beettira Iyyaasura egenno wonshisi. Israeeleno macciishshitusi; Maganu Muse widoonni qole hajajinonsare baalano wonshitu.

¹⁰Kaaliiqi albaanni uurre hasaawannoha Muse gedee himanaancho hakkunni kawa Israeelete gobbara anfe diegenninoonni.

¹¹Kaaliiqi Gibitsete mootewanna ayirraddisiwa, hattono gobbate aana baalankawa soyennasi mare dhaggenna maalale leellishinohu isi gedeehu wolu himanaanchi horontanni dino.

¹²Muse Israeelete manni baalunku albaanni assinohu gedeeha jawanna waajjishanno coye assinohu wolu himanaanchi dino.