Read Sidama_Qullaawa _Maxaafa MARRO 6 Bible Online

MARRO 6 - Sidama_Qullaawa _Maxaafa bible

MARRO 6

¹«Martine ragidhinanni baattora agadhitinanni gede rosiisammo'nera Magani'ne Kaaliiqi uyinoe hajajo, woganna seeru kunninni aane nooho:

²Kunino, eemmo'neta woganna hajajo baalanta agadhatenni, diri'ne seedanno gede, ki'ne, ooso'nenna ooso'ne ooso lubbotenni heedhinoonni diri baalunkunni Magano'ne Kaaliiqa ayirrissinanni gedeeti.

³Kunnira Israeele, macciishshe! Annuwa'ne Magani Kaaliiqi uyino'ne hexxo garinni, malawunna ado lolakkannotera danchanna shaqqado baattora seyanno'ne gedenna lowo geeshsha batidhinanni gede, hajajosi seekkitine agadhe.

⁴«Israeele, macciishshe! Magani'ne Kaaliiqi mitto Kaaliiqaati.

⁵Magano'ne Kaaliiqa, wo'mu wodani'nenni, wo'ma lubbo'nenni, wo'ma wolqa'nenni baxxe.

⁶Techo eemmo'neta tenne hajajo wodani'nera wodhe.

⁷Ooso'nerano rosiissensa. Mine'ne ofoltinanni woyite, doogo hadhinanni woyiteno, goxxinanninna ka'inanni woyite hajajo'yare kula agurtinoonte.

⁸Qaagginanni gede tenne hajajo borreessitine anga'nera usudhe; albi'ne aanano wodhe.

⁹Mini'ne tanqiranna katami'ne waalchira borreessidhe.

¹⁰«Magani'ne Kaaliiqi ki'nera aara annuwa'ne Abirihaamira, Yisihaaqiranna Yaiqoobira xaarinonsa baatto haa're massanno'ne woyite, hakkiicho ki'ne mi'nitinoonnikkire jajjabbanna biifadda katamma,

¹¹umi'neta ikkitinokkita danchu coyi baalu wo'mino minna, u'mitinoonnikkita wayi balla, kaasidhinoonnikkiha woyinete kaashshonna ejersu haqqe eenna'ne ittine duubbinanni woyite,

¹²borojjimmatenni Gibitsete gobbanni fushshino'neha Kaaliiqa habbinannikki gede qorophe.

¹³«Magano'ne Kaaliiqa ayirrisse; isi callaho soqqamme. Isi su'mi callunni xaarre.

¹⁴Gaangaawi'nera noo manni magansi'rannota wole maganna ha'runsitinoonte.

¹⁵Mereero'ne noohu Magani'ne Kaaliiqi wole maganna magansi'nanna lae cincannokki daafira, hanqisi aana'ne giirate gede buweenna baattote aaninni hunanno'ne.

¹⁶«Maasahi yinanni darga assitininte gede Magano'ne Kaaliiqa jiffinoontesi.

¹⁷Magani'ne Kaaliiqi uyino'ne hajajo, biddishshanna woga seekkitine agadhe.

¹⁸Seyanno'ne gedenna Kaaliiqi annuwa'nera xaare uyinonsa hexxonni shaqqado gobba martine ragidhinanni gede, Kaaliiqi albaanni suwashshonna dancha coye asse.

¹⁹Kaaliiqi uyino'ne hexxo garinni diinna'ne baalanta albi'nenni shorritinanni.

²⁰«Kunni gedensaanni ooso'ne, ‹Maganinke Kaaliiqi konne biddishsha, woganna seera mayira uyinonke?› yite xa'mitanno'ne yannara,

²¹ki'neno, ‹Ninke Gibitsete gobbara Ferioonira borojje ikkine hee'noommo. Kaaliiqi kayinni jawaata angasinni hakkiinni fushshinonke.

²²Ninke illenkenni la'nanna Kaaliiqi jajjabbanna waajjishshanno dhagge Gibitsete Feriooninna minisi manni baalu aana leellishino.

²³Ninke kayinni, annuwankera xaare uyino hexxo garinni haa're masse baatto aankera hakkiichchinni fushshinonke.

²⁴Techonte gede aye yannarano seyannonke gedenna lubbotenni hee'neemmo gede, tenne woga baalanta wonshinammoranna ayirrinsammosira Maganinke Kaaliiqi hajajinonke.

²⁵Xa tenne baalanta hajajo Maganinke Kaaliiqi hajajinonke garinni isi yiinore seekkine agadhinummoro, ninkera keeraanchimmate kiirantannonke›[1] yitine kultinanninsa.