Read Sidama_Qullaawa _Maxaafa YOHAANNISI 1 Bible Online

YOHAANNISI 1 - Sidama_Qullaawa _Maxaafa bible

YOHAANNISI 1

¹Umo Qaalu no. Qaaluno Maganu ledo no. Hakku Qaalino Maganoho.

²Qaalu umonni Maganu ledo no.

³Baalunkuri isinni ikkino. Kalaqaminori giddo, isiweello kalaqaminori mitturino dino.

⁴Isi giddo heeshsho no; hatti heeshshono mannu xawaabbaati.

⁵Xawaabbu tunsichoho xawanno; tunsichuno horontanni diqeelinosi.

⁶Maganu soyinohu mittu Yohaannisi yinanni manchi dayi.

⁷Isi xawaabbaho naqaashshe ikkaranna mannu baalu isi widoonni hige ammananno gede farci'rara dayino.

⁸Isi xawaabbu daafira farci'rannoho ikkinnina isi umisi xawaabba di"ikkino.

⁹Manna baalaho xawannohu halaalaanchu xawaabbi tenne alame daanni hee'rino.

¹⁰Isi alamete aana no; alameno isinni kalaqantino. Alame kayinni diegentinosi.

¹¹Isi isiriwa dayino; isiri kayinni dihaadhinosi.

¹²Haadhinosiriranna su'misinni amma'nitinorira kayinni, Maganu ooso ikkitanno gede roorre uyinsa.

¹³Insa Maganu ilaati ikkinnina, ronsoonni garinni woy mannu hedonni woy mannunni ilantinore di"ikkitino.

¹⁴Qaalu manna ikki; eltonna halaale haraqi're ninke giddo gali. Mittichu ilamino Beetti Annuwiinni adhinohu gedeeha ayirrinyesi la'noommo.

¹⁵Yohaannisino, «‹Ane gedensaanni daannohu ane rooreho; ani ilamummo waronni nooho› yee kulummo'nehu isooti» yee farci'ri.

¹⁶Wo'ma eltosi aaninni ninke baalunkura eltote aana elto uyinonke.

¹⁷Seera Muse widoonni qolle uyinoonni; eltonna halaalu kayinni Yesuusi Kiristoosi widoonni hige dayino.

¹⁸Magano lae egenninohu ayino dino; ikkollana Magano ikkinohu Annu qote noohu mittu Beettisi egensiisinosi.

¹⁹Ayihudete mootoolla Yerusaalametenni qeesootanna Lewaawoota Yohaannisiwa sokke, «Ati ayiti?» yite xa'mitusi.

²⁰Yohaannisi qole, «Ani Kiristoosa di"ikkoommo» yee farci'rinota ikkinnina «Diafoommo» diyiino.

²¹Insano, «Ati ayetiyya? Eeliyaasiitini?» yite xa'mitusi. Isino, «Dee'ni» yii. Xaano ledde, «‹Daanno› yinanni himanaanchi ateetini?» yitu. Isi qole, «Dee'ni» yii.

²²«Soyinonke mannira qolleemmona, ati ayetiro kulinke; ati umikki daafira ma yaatto?» yite xa'mitusi.

²³Yohaannisi qole, «Himanaanchu Isayaasi yiinonte gede, ani, ‹Maganu doogo maxarre!› yaanni, halalla lallawanno manchi huurooti» yii.

²⁴Soqqame dayino manni Farisootuwiinniiti.

²⁵Qolteno, «Ati Kiristoosa woy Eeliyaasi woy, ‹Daanno› yinanni himanaancho ikka hoogittona, manna mayira cuuattoyya?» yitu.

²⁶Yohaannisino, «Ani cuueemmohu wayinniiti; ki'ne egentinoonnikkihu kayinni mereero'ne uurre no.

²⁷Isi anera gedensaanni daanno. Ani koattesi suncho nafa tira didandeemmo» yee dawarinsa.

²⁸Kuni coyi ikkinohu, Yohaannisi cuuanni noowa, Yordaanoosi Wayira widoonni Biitaaniyu Katamiraati.

²⁹Layinki soodo Yohaannisi Yesuusi isiwa hige daanna afe, «Kune alamete cubbo haa're hoolannohu Maganu Wilii'lichi isooti» yii.

³⁰Ledeno, «‹Ane gedensaanni daannohu ane rooreho; isi ani ilamummo waronni nooho› yuummo'nehu isooti.

³¹Kunni albaanni iso aninni diegennoommo. Ikkollana Israeelete mannira egensiisate yee, ani wayinni cuuanni dayommo» yii.

³²Qoleno Yohaannisi, «Qullaawu Ayyaani lembooli gede ikke gordunni dirre aanasi ofollanna afummo.

³³Ani iso afummokkinni hee'roommo; ikkollana wayinni cuuammora soyinoehu, ‹Qullaawu Ayyaani dirre aanasi ofollanna afattohu isi Qullaawu Ayyaaninni cuuanno› yee kulinoe.

³⁴Konne coye anino afoommo; kunni daafira, isi Maganu Beetto ikkinota farci'reemmo» yee coyi'ri.

³⁵Layinki soodono Yohaannisi lame rosaanosi ledo hakko uurre no.

³⁶Yohaannisi, Yesuusi hakkaanni hige sa"anna afe, «Maganu Wilii'lichi kuneeti» yii.

³⁷Lamunku rosaano, Yohaannisi yiinota macciishshite Yesuusi hoode hadhu.

³⁸Yesuusino caaqqi yee lae hoodesi noota afe, «Ma hasidhinanni?» yee xa'minsa. Insa qolte, «Rabii,[1] ati hiikko hee'ratto?» yitu.

³⁹Isino, «Amme daggine la'e!» yiinsa. Insano hee'rannowa marte la'e, hakko barra isi ledo hossu. Yannano tonne saate ikkitanno hedooti.

⁴⁰Yohaannisi yiinota macciishshite Yesuusi hoode hadhu rosaano giddo mittu Pheexiroosi rodii Indiriyaasiiti.

⁴¹Indiriyaasi alba ikke rodiisiwa Simiooni Pheexiroosiwa mare, «Kiristoosa anfummowe» yii.

⁴²Hakkunni gedensaanni Indiriyaasi, Simiooni Yesuusiwa haa're massi. Yesuusino Simiooni seekke lae, «Ati Yoona beetti Simiooniiti. Kunni ka'a, ‹Keefa›[2] yinannihe» yiisi.

⁴³Layinki soodo Yesuusi Galiila ha'rara kai. Filiphoosinni xaade, «Hoode'ya amo!» yiisi.

⁴⁴Filiphoosino Indiriyaasinna Pheexiroosi gede Beetesayidu Katamiho.

⁴⁵Filiphoosi Naatinaeeli afe, «Muse Seerunnihura, himanaanono himanu maxaaffara isi daafira borreessituhawe anfummo. Isi Yooseefi beetti, Naaziretete Yesuusaati» yii.

⁴⁶Naatinaeeli kayinni, «Naaziretetenni danchu coyi fulannoni?» yii. Filiphoosino, «Amo dagge lai!» yiisi.

⁴⁷Yesuusi Naatinaeeli isiwa hige daanna afe, «Kuni xagarro afi'rinokkihu halaalaancho Israeelete manchooti» yee coyi'ri.

⁴⁸Naatinaeelino, «Hiikko egennoottoe?» yii. Yesuusino, «Filiphoosi woshshahera albaanni balasete haqqicho hunda heedheenna afoommohe» yiisi.

⁴⁹Hatto yiita Naatinaeeli, «Rosiisaancho'ya, ati Maganu Beettooti! Ati Israeelete Mooteeti!» yii.

⁵⁰Yesuusi daware, «Ati ammanittohu, ‹Balasete haqqicho hunda heedheenna afoommohe› yoommohuraatini? Kunni ka'a roore coye la"atto.

⁵¹Halaale kuleemmo'ne; gordu fa'nameenna Maganu sokkaasine Manchi Beetti aanira gidditannanna dirritanna la'inanni» yii.