Read Sidama_Qullaawa _Maxaafa YOHAANNISI 10 Bible Online

YOHAANNISI 10 - Sidama_Qullaawa _Maxaafa bible

YOHAANNISI 10

¹Yesuusi qole, «Halaale kuleemmo'nena, ge'reewu hoowe giddora waalcho agure wole widoonni mure eannohu mooraanchohonna wolqatenni adhannoho.

²Waalchu widoonni hige eannohu kayinni ge'reewu allaalaanchooti.

³Waalcho agarannohu allaalaanchoho cufana fanannosi; ge'reewu allaalaanchunnita huurosi egennino; isino ge'reewosi su'minsanni woshshannonsa. Hakkunni gedensaanni albaanni ha'ranni gobbara fushshannonsa.

⁴Ge'reewosi gobbara fushshe, albansaanni ha'ranno. Ge'reewuno huurosi egennino daafira, hoodesi ha'ranno.

⁵Wolu hoode kayinni diha'ranno; huurosi egenninokki daafira wole afanno woyite xooqanno» yii.

⁶Yesuusi tenne masalo kulinonsa; insa kayinni, yiinonsare dibuuxxino.

⁷Yesuusi lede, «Halaale kuleemmo'nena, ani ge'reewu waalchooti.

⁸Ane balaxxe dagginori wolootu mooraanotenna wolqatenni adhitannoreeti; ge'reewu kayinni qaalensa dimacciishshino.

⁹Waalchu aneeti; ane widoonni hige eannohu gatanno; ane widoonni hige eanno; ane widoonni hige fulanno; hosanno qanchono afi'ranno.

¹⁰Mooraanchu moorara, shaaranna hunaralla daanno. Ani kayinni, heeshsho afidharanna heeshshonsano hala'litara yee dayommo.

¹¹«Ani dancha allaalaanchooti. Danchu allaalaanchi lubbosi ge'reewoho sayise aanno.

¹²Kiraho allaalannohu kayinni, hiyyeeyye dagganna afiro, ge'reewo agure xooqanno. Hiyyeeyyeno ge'reewo gawajjitanno; qolteno billaallissanno.

¹³Allaalaanchu agure xooqannohu kiranya ikkinohuraatinna ge'reewoho diinaggaawannokki daafiraati.

¹⁴«Danchu allaalaanchi aneeti; ani ge'reewo'ya egennoommo; ge'reewi'yano ane egenninoe.

¹⁵Ani insa egennoommohu, Anni'ya ane egenninoenna anino Anna'ya egennoommo garinniiti. Lubbo'ya ge'reewi'yara yee sayise eemmo.

¹⁶Tenne hoowe giddo nookkihu wolu ge'reewino nooe; insano abba hasiissannoe. Insano huuro'ya macciishshitanno. Mitte hoshsha ikkitanno; allaalaanchuno mitto ikkanno.

¹⁷«Qole adheemmota lubbo'ya sayise eemmo daafira, Anni'ya ane baxannoe.

¹⁸Lubbo'ya ani baxe eemmo ikkinnina, anewiinni ayino diadhanno. Lubbo'ya aateno qole adhateno wolqa nooe. Tenne hajajo Anni'yawiinni adhoommo» yii.

¹⁹Konne coye coyi'rasinni Ayihudete mereero xaano babbadooshshu kalaqami.

²⁰Insa giddonni lowo manni, «Isira durriisu no; wodana difayyinona, isi yaannore mayira macciishshitinanni?» yitu.

²¹Gamu kayinni, «Kuni coyi durriisu noo manchi coyi'rannoha di"ikkino; durriisu ballitino ille fane afannoni?» yitu.

²²Yerusaalamete Qullaawu Mini gatamarshi ayyaana ayirrinsanni yanna iillitu; yannano hawadooti.

²³Yesuusino Qullaawa Mine Selemooni daasira millisanni no.

²⁴Hatte yannara Ayihudootu iso gaangeessite, «Ati ninke mamooti geeshsha huluullisattonke? Ati Kiristoosaatiro xawisse kulinke» yitu.

²⁵Yesuusi qole, «Ani kuloommo'ne; ki'ne kayinni diammantinanni. Anni'ya su'minni looseemmo loosi anere farci'ranno.

²⁶Ki'ne kayinni ge'reewi'ya ledore ikkitinoonnikki daafira, diammantinanni.

²⁷Ge'reewi'ya huuro'ya macciishshanno; anino egennoommonsa; hoode'yano ha'ranno.

²⁸Ani insara hegere heeshsho eemmo; horonta diba'anno. Anga'yanni ayino dihawulukannonsa.

²⁹Insa anera uyinoehu anni'ya, wo'manka rooreho. Anni'ya anganni hawulukannonsahu ayino dino.

³⁰Aninna Anni'ya mittoho» yii.

³¹Hatte yannara Ayihudootu xaano Yesuusa gantara kinna haadhu.

³²Yesuusino, «Anni'ya uyinoeha lowoha dancha looso ki'ne la'inanna loosoommo. Kinnatenni gantinaera ka'inihu hiikko loosi daafiraati?» yii.

³³Insa qolte, «Kinnatenni ganneemmohehu Magano xonootto daafiraati ikkinnina, dancha looso loosakkira di"ikkino. Ati manchoholla; kayinni umokki Magano assootto» yitu.

³⁴Yesuusi daware, «Seeri'nera, ‹Ki'ne magannate yoommo› yine diborreessinoonni?

³⁵Qullaawu qaali wo'manka woyite halaale ikkinota anfoonni. Maganu qaalisi dayinonsare magannate yiiro,

³⁶ki'ne kayinni Maganu doodhinohanna tenne gobba mannira soyinoha, ‹Ani Maganu Beettooti› yiino daafira, ‹Magano xonootto› mayira yitinanniyya?

³⁷Ani Anni'ya looso looseemmokkiha ikkiro ammantinoonte"e.

³⁸Anni'ya looso looseemmoha ikkiro kayinni, ane ammana hoogginirono, looso'ya ammanne. Kunni garinni Anni'ya anenni nootanna anino Anni'yanni noommota egentinanni» yiinsa.

³⁹Insa xaano Yesuusa amaddara hasidhu; isi kayinni angansanni luxuphe ha'ri.

⁴⁰Hakkiinni kae galagale Yordaanoosi tayise fule alba Yohaannisi manna cuui darga mare hakkiicho keeshshi.

⁴¹Lowo manni isiwa daye, «Yohaannisi mitte maalaleno diassino. Ikkollana Yohaannisi kunni manchi daafira coyi'rinori baalu halaaleho» yitu.

⁴²Hakkiicho lowo manni Yesuusa ammani.