Read Sidama_Qullaawa _Maxaafa YOHAANNISI 11 Bible Online

YOHAANNISI 11 - Sidama_Qullaawa _Maxaafa bible

YOHAANNISI 11

¹Biitaaniyaho hee'rannohu mittu Aliaazaari yinanni manchi dhiwami. Biitaaniyu Maariyaaminna rodoose Maarta heedhanno qachaati.

²Hatti Maariyaami Mootichaho shitto buurte, lekkasi dananchisenni fiitute. Dhiwaminohu Aliaazaari rodooseeti.

³Lamenti roduuwi, «Mooticha, ati baxattohu dhiwamino» yee Yesuusiwa soqqi.

⁴Yesuusino konne coye macciishshe, «Kuni dhibbi reyote iillishannoha di"ikkino. Ikkollana Maganu ayirrinyira ikkanno. Maganu Beettino kunninni ayirranno gedeeti» yii.

⁵Yesuusi Maartanna rodoose Maariyaamino, rodoonsa Aliaazaarino baxanno.

⁶Ikkollana Aliaazaari dhiwaminota macciishshe hee'renni hakkiicho noowa lame barra keeshshi.

⁷Hakkunni gedensaanni rosaanosi, «Amme galagalle Yihuda ha'nona!» yiinsa.

⁸Rosaanosino, «Rosiisaancho, tenne mule Ayihudootu ate kinnatenni gantahera hasidhino. Xaa galagalte hakkiira ha'ratto?» yitu.

⁹Yesuusi qole, «Mittu barri giddo ditonaa lame saate no? Barra ha'rannohu tenne gobba xawaabba la"anno daafira digufi'ranno.

¹⁰Hashsha ha'rannohu kayinni xawaabbu nookki daafira gufi'ranno» yiinsa.

¹¹Yesuusi hatto yiihu gedensaanni, «Jaalinke Aliaazaari goxinona, ani goxichunni kayisammosira ha'reemmo» yii.

¹²Rosaanosi, «Mooticha, goxe nooha ikkiro higannosi» yitu.

¹³Yesuusi coyi'ranni noohu Aliaazaari reyoreeti. Insara kayinni goxichunnire coyi'rinoha lawinonsa.

¹⁴Kunnira Yesuusi xawise kulanni, «Aliaazaari reyino.

¹⁵Kunnira, ki'ne ammantinanni gede ani hakko hooga'yara hagiidhoommo. Xa kayinni isiwa ha'nona ka'e!» yiinsa.

¹⁶Hatte yannara, Lakkichaho[9] yinannihu Toomaasi wole rosaanora, «Isi ledo reyineemmo gede, amme ninkeno rosiisaanchu ledo ha'nona!» yii.

¹⁷Yesuusi hakkiira mare iillanno woyite, Aliaazaari madaarrinkunni shoole barra ikke no.

¹⁸Biitaaniyu Yerusaalametenni 3,000 qaafo geeshsha xeerti'ranno.

¹⁹Lowohu Ayihudete manni rodiinsa reyora sheshifachishansara Maartanna Maariyaamiwa daye no.

²⁰Maarta Yesuusi dayinota macciishshite, haadhasira gobbara fultu. Maariyaami kayinni mine gattino.

²¹Maarta Yesuusa, «Mooticha'ya, ati kawiicho hee'roottoha ikkoommero rodii'ya direyanno.

²²Xaano ikkiro, huucci'rattore baala Maganu aannoheta afoomma» yitu.

²³Yesuusino, «Rodiikki reyotenni ka"anno» yiise.

²⁴Maartano, «Goofimarchoho reyotenni ka'nanni barra ka"annota afoomma» yitu.

²⁵Yesuusino, «Kaonna heeshsho aneeti; ane ammanannohu reyiro nafa lubbotenni hee'ranno.

²⁶Hee'rannohunna ane ammanannohu baalu hegerera direyanno. Konne coye ammanatta?» yiise.

²⁷Iseno, «Ee Mooticha'ya ammaneemma; ati tenne gobba daanno yiniha Kiristoosa Maganu Beetto ikkoottota ammanoomma» yitusi.

²⁸Maarta hatto yituhu gedensaanni handuruffi yite ka'e rodoosewa Maariyaamiwa marte, «Rosiisaanchu dayino; ateno xa'manni noohe» yite sununni kultuse.

²⁹Maariyaami konne coye macciishshitanni heedhenni, rakke Yesuusiwa martu.

³⁰Yesuusi kayinni Maartanni xaadi dargalla noota ikkinnina xaara qacha dieino.

³¹Maariyaami sheshifachishshara dagge mine noo Ayihudooti, ise rakke fultu gara la'e, wi'litara waammanniwa hadhanni nooha laweennansa faanase fultu.

³²Maariyaami marte Yesuusa affuti lekkasi hunda ubbe, «Mooticha'ya, ati kawiicho hee'roottoha ikkoommero, rodii'ya direyanno» yitu.

³³Yesuusi Maariyaaminna ledose noo Ayihudooti wi'litanna lae lowo geeshsha marare cinca hooge,

³⁴«Hiikko madaartinoonni?» yee xa'mi. Insano, «Mooticha, amo dagge lai!» yitu.

³⁵Yesuusino wi'li.

³⁶Kunnira Ayihudootu, «Hiitto baxannosiro la'e!» yitu.

³⁷Gamu kayinni, «Ballicha ille faninohu, wona konne mancho reyannokki gede asse diafanno?» yitu.

³⁸Yesuusi lowo geeshsha marare cinca hooge waammanniwa mari; waammano afoo kinchunni cunfoonni godaati.

³⁹Yesuusi, «Kincho hoolle!» yii. Reyi manchi rodoo Maarta, «Reyinkunni shoole barra keeshshino daafira, xa bowanno!» yitu.

⁴⁰Yesuusino, «Ammanittaha ikkiro Maganu ayirrinye la"atta diyoommohe?» yiise.

⁴¹Mannuno kincho hooli. Hakkunni gedensaanni Yesuusi iima hige lae, «Anna'ya, macciishshoottoehura galaxxeemmohe.

⁴²Wo'manka woyite macciishshattoeta afoommo. Tenne yoommohu kayinni kawiicho uurre noo manni ane ati soottoeta ammanara yeeti» yii.

⁴³Yesuusi hatto yiihu gedensaanni, «Aliaazaari, amo fuli!» yee qoonqosi naggi asse coyi'ri.

⁴⁴Aliaazaarino waammate giddonni angano lekkano usurre kafannoonni gedeenni hee're fuli. Albano uddanotenni xaanxoonni gedeenni no. Yesuusino, «Tirtine agurre, ha'rona!» yiinsa.

⁴⁵Maariyaami sheshifachishshara dagginoti lowo Ayihude Yesuusi assinore la'e ammantusi.

⁴⁶Gamu kayinni marte, Yesuusi assinore Farisootaho kultu.

⁴⁷Kunnira qeesootu roorrootinna Farisootu Songo woshshite gamba assite, «Kuni manchi lowo maalale loosanni noona, ma assino?

⁴⁸Sammi yine agurrummoro mannu baalu iso ammananno. Roomu roorrootino dagge Qullaawa Minenna mannanke guddanno» yitu.

⁴⁹Hakko diro qeesootu roorricha ikke noohu mittu Qeyaafa yinannihu, «Ki'ne horonta mittoreno diegentinoonni!

⁵⁰Mannu baalu ba"antenni mannu daafira mittu manchi reyiro woyyannota diaffinoonni?» yii.

⁵¹Isi konne coye umisinni dicoyi'rino; ikkollana, hakko diro isi qeesootu roorricha ikkinohura Yesuusi mannu daafira reyannota kulanni himana coyi'rino.

⁵²Reyannohu insa calluwaho ikkikkinni, billaallite noota Maganu ooso mittowa gamba assateeti.

⁵³Kunnira, hakko barrinni kayisse Yesuusa shitara ma'litu.

⁵⁴Hakko barrinni kayise Yesuusi Ayihudootu mereero xawoho ha'rama aguri. Hakkiinni kae Efireeme yinanni katamira mule noo halalla ha'ri. Hakkiichono rosaanosi ledo keeshshi.

⁵⁵Hatte yannara Ayihudennihu Agure Sa"ate Ayyaani iille no. Lowo manni Agure Sa"ate Ayyaani barri eikkinni seeru garinni keeraa'mate yee, dargu dargunkunni kae Yerusaalame dayi.

⁵⁶Insano Qullaawa Mine gamba yite Yesuusi daannota agartanni, «Mayi leellanno'ne? Ayyaana ayirrisate didaanno ikka?» yitanni insa insanaawa xa'mantu.

⁵⁷Qeesootu roorrootinna Farisootu Yesuusa amaddara hasidhe, noowa afinohu hee'riro kulannonsa gede manna hajajju.