Read Sidama_Qullaawa _Maxaafa YOHAANNISI 13 Bible Online

YOHAANNISI 13 - Sidama_Qullaawa _Maxaafa bible

YOHAANNISI 13

¹Yanna Agure Sa"ate Ayyaanira albaanniiti. Yesuusi tenne gobba agure Annisiwa ha'rannoti yanna iillitinota afe, tenne gobbara noore isire ikkitinore baxannonsare, goofimarchu geeshsha baxinsa.

²Yesuusinna rosaanosi hashshi hurbaate ittanni heedheenna, Simiooni beetti Asiqorootu Yihudira Yesuusa sayise aanno gede Sheexaanu wodanisi giddo busha hedo wori.

³Yesuusi, Maganu Annu roorre baala uyinosita afino. Maganuwiinni dayinotanna galagale Maganunniwa ha'rannota egennino.

⁴Sagalete aaninni kae uddano uulla wodhe feyanno hocco halloho xaaxi'ri.

⁵Waa gawatete wore rosaanosira lekka hayishsha hanafi. Halloho xaaxi'rino hoccinni fee mooshshinsa.

⁶Yesuusi Simiooni Pheexiroosiwa iillita isi, «Mooticha'ya, ati ane lekka hayishshattoraatini?» yii.

⁷Yesuusi qole, «Ani asseemmore ati xa diafatto; gedensaanni kayinni afatto» yiisi.

⁸Pheexiroosino, «Ati ane lekka horontanni dihayishshatto» yii. Yesuusi qole, «Ani hayishsha hoogummohero ane ledo xaadu dinohe» yiisi.

⁹Simiooni Pheexiroosino, «Mooticha'ya, hattootiro lekka'ya calla ikkikkinni anga'yano umo'yano hayishshie» yii.

¹⁰Yesuusino, «Biso hayishshi'rinohu, bisisi baalu xuru nookkiha ikkino daafira, lekka hayishshi'ra agurranna wolere dihasiisannosi. Ki'ne fayyaaleeyyete; kayinnilla baalunku fayyaaleeyye di"ikkitinoonni» yiisi.

¹¹Yesuusi, «Baalunku fayyaaleeyye di"ikkitinoonni» yiinohu, reyote sayise aannosihu ayetiro afinohuraati.

¹²Lekkansa hayishshihu gedensaanni uddanosi uddi're mare dargasi ofolle, «Assoommo'nere wodana assitinoonni?

¹³Ki'ne, ‹Rosiisaanchonna Mooticha› yitinannie; hatto yaa'ne garaho; yitinannintalla yitinoonni.

¹⁴Xa ani Rosiisaancho'nenna Mooticha'ne ikke hee'renni lekka'ne hayishshummonte gede, ki'neno mimmiti'ne lekka hayishsha hasiissanno'ne.

¹⁵Ani ki'nera assoommore ki'neno assitinanni gede lawishsha ikka'nera assoommo.

¹⁶Halaale kuleemmo'nena, faantichu mootichasi dirooranno; sokkaanchu soyinosiha dirooranno.

¹⁷Konne coye affinoonni; affinoonniha assitiniro maassantinanni.

¹⁸Konne coye coyi'roommohu ki'ne baalunku daafira di"ikkino. Ani doodhoommore egennoommo. Ikkirono, ‹Hurbaate'ya itinohu anera badhe wodhinoe› yaannohu Maganu qaali wo'ma hasiissanno.

¹⁹«Kuni coyi ikkara albaanni kulanni noommo'nehu, ikkihu gedensaanni yinannihu ane ikkoommota ammantinanni gedeeti.

²⁰Halaale kuleemmo'nena, ani soyemmoha adhannohu ane adhanno. Ane adhannohuno ane soyinoha adhanno» yiinsa.

²¹Yesuusi konne coye coyi'rihu gedensaanni dadille maaxi'ra hooge, «Halaale kuleemmo'nena, ki'ne giddonni mittu ane reyote sayise aannoe» yee kulinsa.

²²Rosaanosino aye hede coyi'rinoro afa hoogge mimmito alba la'u.

²³Rosaanosi giddonni mittichu Yesuusi baxannosihu isira aane ofolle no.

²⁴Simiooni Pheexiroosi hakkonne rosaancho qiphi asse, «Hanni aye hede coyi'ranni nooro xa'mi» yii.

²⁵Kunnira Yesuusiwa goowa shiqqi asse, «Mooticha, yaattohu ayeti?» yee xa'mi.

²⁶Yesuusino, «Ani tima hiiqqe qaamattotenni qase chuucisheemmoho» yii. Hatto yee kae Asiqorootunnihura Simiooni beettira tima hiiqqe qaamattotenni qase chuucishi.

²⁷Yihudi, chuucihu gedensaanni hakkawoyintenni Sheexaanu eisi. Yesuusino, «Assate hedoottore rakke assi!» yiisi.

²⁸Yesuusi hatto yiinohu mayiraatiro, sagalete ofolte noori giddonni mittuno wodana assinohu dino.

²⁹Yihudi woxe amadannoha ikkino daafira rosaanote giddonni mito mitoho, «Ayyaana ayirrisate ikkannore hiri» woy, «Woxe buxanete uyi» yiinoha lawinonsa.

³⁰Yihudi, tima ite kaihu gedensaanni fule ha'ri. Yannano hashshaati.

³¹Yihudi fule ha'rihu gedensaanni Yesuusi, «Manchi Beetti xa ayirrino; Maganuno isinni ayirrino.

³²Maganu isi widoonni ayirriro, Maganuno Manchi Beetto ayirrisannosi; rahotenni ayirrisannosi.

³³«Ooso'ya, ki'ne ledo lowo yanna dikeeshsheemmo; ki'neno hasidhinannie. Ayihudete gashshaanora, ‹Ani noommowa ki'ne daa didandiitinanni› yuummonsante gede, ki'nerano hatto yeemmo.

³⁴Ki'ne ki'neneewa baxantinanni gede, haaro hajajo eemmo'ne; ani baxummo'nente gede ki'ne ki'neneewa baxamme!

³⁵Ki'ne ki'neneewa baxantiniro, ane rosaano ikkitinoonnita mannu baalu tennenni egennanno'ne» yii.

³⁶Simiooni Pheexiroosi Yesuusa, «Mooticha, ha'rattohu hiikkiichiraati?» yee xa'misi. Yesuusi daware, «Ani ha'reemmowa, hoode'ya dagge diafatto; gedensaanni kayinni, hoode'ya daatto» yiisi.

³⁷Pheexiroosi, «Mooticha, xa mayira hoodekki daa hoogeemmo? Ani lubbo'ya nafa ate daafira sayise aa dimarareemmo» yee coyi'ri.

³⁸Yesuusi qole, «Ati halaalinta lubbokki ane daafira sayisse aatto? Halaale kuleemmohena, lukkichu gana geeshsha sase higge ‹Iso diegennoommo!› yaattoe» yii.