Read Sidama_Qullaawa _Maxaafa YOHAANNISI 14 Bible Online

YOHAANNISI 14 - Sidama_Qullaawa _Maxaafa bible

YOHAANNISI 14

¹Hakkiinni aanche Yesuusi, «Wodani'ne masoonke; Magano ammanne; aneno ammanne.

²Anni'ya mine lowo dargi no; hatto ikka hoogoommero, ‹Heedhinanni darga qixxeessate ha'reemmo› diyeemmo'ne.

³Ha're darga qixxeessummo'nehu gedensaanni, ani noommowa heedhinanni gede galagale daye haa'reemmo'ne.

⁴Ani ha'reemmowa massitanno doogono egentinoonni» yii.

⁵Toomaasi, «Mooticha, ati hiikka ha'rattoro dianfoommo; doogono hige maminni anfeemmo?» yii.

⁶Yesuusi qole, «Doogono, halaaluno, heeshshono aneeti. Ane widoonni ikka hoogiro, ayino Anni'yawa daannohu dino.

⁷Ane egentinoonniha ikkoommero, Anna'yano egentinanni. Kunni ka'a iso egentinanni; qoltineno la'inoonnisi» yiisi.

⁸Filiphoosino, «Mooticha, Magano Anna leellishittonkero, ikkannonke» yii.

⁹Yesuusi daware, «Filiphoosi, kageeshshi geeshsha ledo'ne hee'ranna diafoottoe? Ane afinohu anna'yano afino. Ati hiitto, ‹Magano Anna leellishinke› yaatto?

¹⁰Ani Anni'yanni noommota, Anni'yano anenni noota diammanootto? Ki'nera kuleemmo qaale ani umi'yanni dicoyi'reemmo. Baalanka looso anenni hee'rannohu Anni'ya loosanno.

¹¹Ani Anni'yanni, Anni'yano anenni noota ammanne. Hattenne hoogginiro, loosoommo loosinnino ikka ammanne"e.

¹²Halaale kuleemmo'nena, ane ammaninohu ani looseemmo looso loosanno; hakkiinni saino looso nafa loosanno. Hatto loosa dandaannohu, ani Anni'yawa ha'reemmo daafiraati.

¹³Maganu Annu, Beettunni ayirranno gede su'mi'yanni huuccidhinannire baala asseemmo'ne.

¹⁴Aye coyeno su'mi'yanni huuccidhiniro, ani eemmo'ne.

¹⁵«Baxxinannieha ikkiro, hajajo'ya agadhitinanni.

¹⁶Ani Anna'ya huucceenna, isi hegere geeshsha ledo'ne hee'rannoha wole jawaachishaancho aanno'ne.

¹⁷Isino halaalu Ayyaanaati. Tenne gobba manni afinosikkinna egenninosikki daafira, adhasira didandaanno. Ki'ne kayinni, isi ledo'nenna giddo'ne hee'ranno daafira affinannisi.

¹⁸Amanna anna afidhinokki ooso gede calluwa'ne diagureemmo'ne; galagale ki'newa dayemmo.

¹⁹Shiima yanna gedensaanni tini gobba diaffannoe; ki'ne kayinni affinannie. Ani heeshshonniha ikkoommo daafira, ki'neno lubbotenni heedhinanni.

²⁰Ani Anni'yanni hee'reemmota, ki'neno anenni heedhinannita, anino ki'nenni hee'reemmota hakko barra affinanni.

²¹«Hajajo'ya adhannohunna wonshannohu baxannoeho; ane baxannoha Anni'yano baxannosi. Anino baxeemmosi. Isira aneneete'ya leellisheemmosi» yii.

²²Asiqorootunniha ikkikkinni wolu Yihudi, «Mooticha, ateneete tenne gobbara leellisha agurte ninkera mayira leellishatto?» yii.

²³Yesuusino, «Baxannoehu qaale'ya wonshanno. Anni'yano baxannosi; lamunku dange ledosi hee'neemmo.

²⁴Ane baxannokkihu qaale'ya diwonshanno. Kuni macciishshitinannihu ane umi'yaha ikkikkinni soyinoehu Anni'ya qaaleeti.

²⁵«Ani xa ki'ne ledo hee're konne coye kuloommo'ne.

²⁶Anni'ya ane su'minni soyanno'nehu jawaachishannohu Qullaawu Ayyaani kayinni baalankare rosiisanno'ne; ani kuloommo'nere baalanka qaagiissanno'ne» yii.

²⁷«Keere'ya ki'newa woreemmo; keere'ya eemmo'ne. Ani eemmo'ne keeri tini gobba uyitanno'nehu gedeeha di"ikkino. Wodani'ne masoonke; waajjitinoonte!

²⁸Coyi'ranna macciishshitininte gede ani ha'reemmo; galagaleno ki'newa dayemmo. Anni'ya anewiinni rooranno daafira, baxxinoomme"ero Anni'yawa ha'reemmota hagiidhitinanni.

²⁹Kuni coyi ikkanno woyite ammantinanni gede, xa alba asse kuloommo'ne.

³⁰Tenne gobba gashshaanchi Sheexaanu daanni noo daafira, ki'ne ledo lowore dihasaaweemmo. Isi ane aana wolqa diafi'rino.

³¹Ikkollana ani Anna'ya baxeemmota tini gobba affanno gede, Anni'ya hajajinoere baala wonsheemmo. Xa ka'e! Kawiinni ha'nona» yii.