Read Sidama_Qullaawa _Maxaafa YOHAANNISI 15 Bible Online

YOHAANNISI 15 - Sidama_Qullaawa _Maxaafa bible

YOHAANNISI 15

¹Yesuusi lede, «Halaalaanchu woyinete haqqicho damatte aneeti; loosannohuno Anna'yaati.

²Ane aana hee're guma laalannokki sina baala Anni'ya mure hunanno; guma laalannoha lede guma aanno gede qonqolche seekkanno.

³Ki'ne kuloommo'ne qaalinni kainohunni xaanni fayyaaleeyyete.

⁴Ki'ne anenni heedhe; anino ki'nenni hee'reemmo. Sinu damattete aana hee'ra hoogiro, umisinni guma laala dandaannokkinte gede, ki'neno anenni hee'ra hoogginiro guma laala didandiitinanni.

⁵«Ani woyinete haqqicho damatteeti; ki'ne kayinni sinna'yaati. Anenni hee'rannohu, anino isinni hee'reemmohu batinye guma laalanno. Aneweello kayinni mittoreno assa didandiitinanni.

⁶Anenni hee'rannokkihu, gobbara tunge agurreenna moolanno sini gedeeho. Hattoo sinna gamba assine giirate tungeenna giirantanno.

⁷Anenni heedhiniro, qaali'yano ki'newa hee'riro, hasidhinannire baala huuccidhe; afidhinannina.

⁸Batinye guma laaltiniro, kunninni Anni'ya ayirranno. Ki'neno ane rosaano ikkitinoonnita anfanni.

⁹«Anni'ya ane baxinoe gede, anino ki'ne baxoommo'ne. Ane baxillinni heedhe!

¹⁰Ani Anni'ya hajajo wonshanni baxillisinni hee'rummonte gede, ki'neno ane hajajo wonshitiniro, ane baxillinni heedhinanni.

¹¹«Konne coye kuloommo'nehu hagiirri'ya giddo'ne hee'ranno gedeetinna ki'ne hagiirrino wo'ma ikkanno gedeeti.

¹²Ane hajajo, ani baxummo'nente gede, ki'ne ki'neneewano baxantinaraati.

¹³Lubbosi jaalisira sayise aanno manchiha roorino baxilli ayewano dino.

¹⁴Ani hajajoommo'nere wonshitiniro, ki'ne jaalla'yaati.

¹⁵Faantichu mootichu assannore afannokki daafira, kunni ka'a ki'ne faantootaho diyeemmo'ne. Anni'yawiinni macciishshoommore baala kuloommo'ne daafira, jaalla'ya yoommo'ne.

¹⁶Anilla ki'ne dooroommo'ne ikkinnina, ki'ne ane didoodhitinoonnie. Hadhine batinye guma laaltinanni gede, gumi'neno ba"annokki gede shoomoommo'ne. Kunnira ane su'minni huuccidhinannire baala Anni'ya aanno'ne.

¹⁷Ani hajajeemmo'ne hajajo ki'ne ki'neneewa baxantinanni gedeeti.

¹⁸«Tini gobba gibbu'nero, ki'nera albaanni aneno gibbinoeta affe.

¹⁹Ki'ne tenne gobbare ikkitinoommero, umiseri gede assite baxxanno'ne. Ikkollana, ani tenne gobbanni bade dooroommo'ne ikkinnina ki'ne tenne gobbare ikkitinoonnikkihura, tini gobba gibbanno'ne.

²⁰‹Faantichu mootichasi dirooranno› yuummo'neta habbinoonte. Ane xiibbunte gede, ki'neno xiibbanno'ne. Ane qaale wonshituro, ki'ne qaaleno wonshitanno.

²¹Soyinoeha egentinokkihura, anenni kainohunni konne baala assitanno'ne.

²²Ani daye kula hoogoommonsaro, cubbo di"ikkannonsa. Xa kayinni, cubbo loosansara ku'lite gattannori dinonsa.

²³Ane giwannohu Anna'yano giwanno.

²⁴Wolu loosinokki looso mereeronsa loosa hoogoommoro, cubbo di"ikkannonsa. Xa kayinni, konne baala la'uhu gedensaanni aneno Anna'yano gibbino.

²⁵Kuni ikkinohuno seerinsa giddo, ‹Beebbatenni gibbue› yine borreessinoonni qaali wo'manno gedeeti.

²⁶«Ikkollana, jawaachishannohu, Anni'yawiinni soyemmo'nehunna Anni'yawiinni fulannohu halaalaanchu Ayyaani daanno woyite, isi anere farci'ranno.

²⁷Ki'neno albinkunni ane ledo heedhinoonni daafira farcidhinanni.