Read Sidama_Qullaawa _Maxaafa YOHAANNISI 16 Bible Online

YOHAANNISI 16 - Sidama_Qullaawa _Maxaafa bible

YOHAANNISI 16

¹«Kuneeti, konne baala kuloommo'nehu amma'na'nenni gufidhinannikki gedeeti.

²Xaadu mininni fushshite huntanno'ne; shaanno'nehu baalu Maganoho soqqamannoha lawannositi yanna dagganno.

³Insa hatto assitanno'nehu Anna'ya woy ane egentinokki daafiraati.

⁴Balaxe konne ki'nera kuloommo'nehu yanna iillitanno woyite yoommo'nere qaagginaraati» yiinsa. Yesuusi lede, «Konne baala balaxe kuloommo'nekkihu ledo'ne noommo daafiraati.

⁵Xa kayinni soyinoehuwa ha'rammoraati; ikkollana ki'ne giddonni, ‹Hiikka ha'ratto?› yee xa'mannoehu dino.

⁶Konne baala kuloommo'nehura wodani'ne dadillino.

⁷Ani kayinni halaale kuleemmo'ne; ani ha'rummoro woyyanno'ne. Ha'ra hoogummoro Jawaachishaanchu ki'newa didaanno. Ani ha'rummoro kayinni iso ki'newa soyemmo'ne.

⁸Isi daanno yannara, alamete aana noo manni cubbire, keeraanchimmannirenna Maganu yoore mannaho xawise kulanno.

⁹Cubbunnire xawise kulannonsahu, ane ammantannokki daafiraati.

¹⁰Keeraanchimmannire xawise kulannohu, ani Anni'yawa ha'reemmohuraatinna kunni ka'ano affinanniekki daafiraati.

¹¹Yoonnireno xawise kulannohu, tenne alame gashshaanchi aana yoo yinoonni daafiraati.

¹²«Kunni ka'ira kuleemmo'nehu lowo coyi nooe; ikkollana, xa adha didandiitinanni.

¹³Halaalu Ayyaani daanno woyite halaalu baalunniwa massaganno'ne. Isi macciishshinohalla coyi'ranno ikkinnina umisinni dicoyi'ranno. Qoleno kunni albira ikkanno coye kulanno'ne.

¹⁴Ani yeemmore haa're kulanno'ne daafira, ane ayirrisannoe.

¹⁵Anni'yaha ikkinohu baalu aneho, ‹Ani yeemmo'nere haa're kulanno'ne› yoommo'nehu kunni daafiraati» yii.

¹⁶Yesuusi, «Shiima yanna gedensaanni diaffinannie; qoltineno shiima yanna gedensaanni affinannie» yiinsa.

¹⁷Rosaanosi giddonni mitu mitu insa insanaawa, «‹Shiima yanna gedensaanni diaffinannie; qoltineno shiima yanna gedensaanni affinannie› yaannohunna, ‹Anni'yawa ha'reemmo› yaannohu mayiraati?» yitu.

¹⁸«‹Shiima yanna gedensaanni› yaasi mayaate? Mayi daafira coyi'ranni nooro dileellinonke» yitanni mimmitonsa xa'mitu.

¹⁹Yesuusino xa'mate heddinota afe, «Ki'ne mimmito'ne xa'mitinannihu, ‹Shiima yanna gedensaanni diaffinannie› qoltineno, ‹Shiima yanna gedensaanni affinannie› yoommo'nehuraatini?

²⁰Halaale kuleemmo'nena, ki'ne wi'litinanni; raartinanni; tini gobba kayinni hagiidhitanno. Ikkirono dadilli'ne hagiirreho soorramanno.

²¹Ila rakkino meyati gamete barri iillinosehura yaaddanno. Iltuhu gedensaanni kayinni, tenne gobbara qaaqqu ilamino daafira hagiidhite qarrase habbanno.

²²Ki'neno xa hatto dadillitinanni; ani kayinni galagale afeemmo'ne. Wodani'ne hagiidhanno; hagiirre'neno adhannohu dino.

²³«Hakko barri iillanno woyite ane mittoreno dihuuccidhinannie. Halaale kuleemmo'nena, ane su'minni huuccidhinannire baala Anni'ya aanno'ne.

²⁴Xaa geeshsha su'mi'yanni mittoreno dihuuccidhinoonni. Huuccidhe, adhitinannina; hagiirri'neno wo'ma ikkanno.

²⁵«Konne coye maammaashshunni kuloommo'ne; kunni ka'a maammaashshunni coyi'reemmokki yanna dagganno. Ikkollana, Anni'yare xawise kuleemmo'ne.

²⁶Hakko barri iilliro su'mi'yanni huuccidhinanni. Ani Anna'ya ki'ne su'minni huucceemmo yaa di"ikkino.

²⁷Anni'ya umisi ki'ne baxanno'ne. Anni'ya baxino'nehu ane baxxinoonniehuranna Maganuwiinni dayommota ammantinoonnihuraati.

²⁸Anni'yawiinni daye tenne gobba eoommo; galagale tenne gobba agure Anni'yawa ha'reemmo» yii.

²⁹Rosaanosino, «Xa kuneeti maammaashsha agurte xawisse coyidhanni nootto.

³⁰Ati baalankare egennoottotanna ayino xa'mo xa'mahera dandaannokkita xa anfoommo. Kunnira, Maganuwiinni dayottota ammanneemmo» yitusi.

³¹Yesuusino, «Xa amma'nitinanni?

³²Mittu mittunkunni billaallitine ane calla'ya agurtinannie yanna dagganno. Kune iillitino. Ikkollana Anni'ya ledo'ya noo daafira callicho'ya di"ikkoommo.

³³Konne coye kuloommo'nehu, anenni heedhine keere afidhinara yeeti. Tenne gobbara heedhini geeshsha qarru noo'ne. Ikkirono waajjitinoonte; ani tenne gobba qeeloommona» yiinsa.