Read Sidama_Qullaawa _Maxaafa YOHAANNISI 19 Bible Online

YOHAANNISI 19 - Sidama_Qullaawa _Maxaafa bible

YOHAANNISI 19

¹Hakkunni gedensaanni Philaaxoosi Yesuusa lichetenni gansiisi.

²Olantono utu worraaqqa seekkite Yesuusira umoho wortu. Duume uddanono uddisiissusi.

³Isiwa marte, «Ayihudete moote, keere nootto?» yite qacifattanni baqqaalla qawaaddusi.

⁴Philaaxoosi layinkimeeshsho gobbara fule, «Assinoti mitte bunshe nafa leeltinoekkita affinanni gede, agarre iso gobbara fushsheemmo'nena» yiinsa.

⁵Yesuusira utu worraaqqa umoho worte duume uddano uddisiisseenna gobbara fulita Philaaxoosi, «Manchu kuneeti» yiinsa.

⁶Qeesootu roorrootinna Qullaawu Mini agaraasine Yesuusa affe, «Suti! Suti!» yitanni cancitu. Philaaxoosi kayinni, «Ane woyite assino bunshe diafoommona, ki'ne massitine sutte» yiinsa.

⁷Ayihudootuno, «Ninkera seeru noonke; kuni manchi, ‹Ani Maganu Beettooti› yaanni coyi'ranno daafira reya hasiissannosi» yitu.

⁸Philaaxoosi konne coye macciishshi woyite, lowo geeshsha waajji.

⁹Galagale hoowe giddoonni e"e, «Ati maminni dayotto?» yee xa'misi. Yesuusi kayinni mittoreno diqolinosi.

¹⁰Kunnira Philaaxoosi, «Dikulattoe? Tiratenna sutate wolqa afi'roommota diafootto?» yiisi.

¹¹Yesuusi kayinni, «Roorre gordunni aamama hooggoommehero ane aana wolqa diafi'ratto. Kunnira ane atera sayise uyihura rooru cubbi noosi» yiisi.

¹²Philaaxoosino Yesuusi coyi'rinore macciishshe tire agurara hasi'ri. Ayihudootu kayinni, «Konne mancho tirittoro qaru Roomu mootera jaala di"ikkootto. Umosi moote assannohu baalu qaru mootera diinaho!» yitanni cancitu.

¹³Philaaxoosi konne coye macciishshi yannara Yesuusa gobbara fushshe, «Baattote aana Karroonni Kincho» yinanni darga yoote barcimira ofolli. Hakko darga Ibiraawootu afiinni, «Gabata» yinanni.

¹⁴Yanna, Agure Sa"ate Ayyaani qixxaawo lamalara barru taalooteeti. Hatte yannara Philaaxoosi Ayihudoota, «Moote'ne kuneeti» yiinsa.

¹⁵Insano, «Hoolinke! Hoolinke! Sutte aguri!» yitanni cancitu. Philaaxoosino, «Moote'ne sutoni?» yiinsa. Qeesootu roorrootino, «Qeesaari agurranna wolu moote dinonke» yite qoltu.

¹⁶Hatte yannara, Yesuusi sutamanno gede Philaaxoosi sayise uyinsa. Insano Yesuusa amadde haadhe hadhu.

¹⁷Hakkunni gedensaanni Yesuusi masiqalasi duqqe, «Umu Qooncho» yinanni darga mari. Hakkonne darga Ibiraawootu afiinni, «Golgoota» yinanni.

¹⁸Insano hakkiicho suttusi. Yesuusa mereeroho worte, ledo wole lame manna guraanna qiniiteenni suttu.

¹⁹Philaaxoosi, «Naaziretete Yesuusa, Ayihudete Moote» yee borreesse Yesuusi masiqalira umoonni wori.

²⁰Yesuusi sutaminohu katamaho mule ikkinohura, lowo Ayihude borreessine worroonnire la'u. Borreessinoonnihu Ibiraawootu, Laatiinetenna Giriikete afiinniiti.

²¹Ayihudete qeese roorrooti Philaaxoosi, «Ati, ‹Ayihudete mooteeti› yite borreessitooti. ‹Kuni manchi, «Ani Ayihudete mooteeti» yiino› yite borreessi» yitusi.

²²Philaaxoosi kayinni, «Ani borreessoommore borreessoommo» yee qolinsa.

²³Olanto Yesuusa sutte ka'e uddannasi shoolewa babbadde annu annunni beeqqitu. Giddoyidi uddanosino adhitu. Giddoyidi uddano kayinni alinni eeli geeshsha mittu garinni gannoonnite.

²⁴Kunnira olanto, «Iillituhura iillitona, daddara agurre hixa tuqqino» yitu. Hatto ikkinohu, «Uddano'ya beeqqitu; giddoyidi uddano'yarano hixa tuqqitu» yinoonnihu Qullaawu Qaali wo'manno gedeeti. Olantono heddino gede assitu.

²⁵Yesuusi masiqali mule amasi, la'lamasi, Qeleyopha galte Maariyaaminna Megidelitte Maariyaami uurre no.

²⁶Yesuusi amasinna baxanno rosaanchi hakko uurrite noore afe amasi, «Ama, beettikki kuneeti» yiise.

²⁷Hakkunni gedensaanni rosaanchohono, «Amakki kuneeti» yiisi. Hatte yannara rosaanchu ise haa're minisira ha'ri.

²⁸Hakkunni gedensaanni Yesuusi duuchunku coyi wo'minota afe, Qullaawu Qaali wo'manno gede, «Goo'rummo!» yii.

²⁹Hakkiicho shiishino ago wonshinoonni uduunnichi no. Haanxicho giddo cuu'e, garambichu haqqira rarraasse, Yesuusira shiqqi assitu.

³⁰Yesuusino shiisha suumetenni kisihu gedensaanni, «Xaate ikkino» yii. Umosi heeshshi asse lubbosi sayise uyi.

³¹Hakkunni gedensaanni, Ayihudootu suttino manna mogolensa cancante dirrissara hasidhe Philaaxoosi xa'mitu. Hatto assa hasidhinohu, aane noohu Fooliishshote Barri baxxinoha ikkino daafira, Ayihudootu hakko barra reeshshu masiqalu aana hosannota gibbeeti.

³²Kunnira, olanto marte Yesuusi ledo sutantinori mogole cancantu.

³³Yesuusiwa shiqqi yitanno woyite balaxe reyino daafira isi mogole dicancantino.

³⁴Ikkollana olantote giddonni mittu Yesuusi midaado urdetenni qasi; midaadosi urdetenni qasita, mundeenna wayi fuli.

³⁵Ki'neno ammantinanni gede, konne coye laihu farci'rino; farci'rino coyino halaaleho. Farci'rino coyi halaale ikkinota isino egennino.

³⁶Kuni coyi ikkinohuno, «Miqichisi mittu nafa dihiiqqamanno» yaannohu Qullaawu Qaali wo'manno gedeeti.

³⁷Wolu Qullaawu Qaalino, «Hakkonne qassuha la'anno» yaanno.

³⁸Yesuusi rosaancho ikkinohu Armaatiyu katamihu Yooseefi, Yesuusi reeshsha fajjannosi gede Philaaxoosi xa'mi'ri. Ayihude waajjino daafira maaxame mare xa'mi'rino. Philaaxoosino fajjeennasi mare Yesuusi reeshsha adhe ha'ri.

³⁹Mitto waro hashsha Yesuusiwa marihu Niqoodimoosi kaarbenna argiisa karsiise 30 kiilo geeshsha asse haa're abbi.

⁴⁰Lamunku Yesuusi reeshsha haadhe Ayihudete budi garinni biddi assite, shitto buurte, shaalado uddanonni kafantu.

⁴¹Yesuusi sutamiwa kaansoonni haqqe no. Hatte haqqe giddo manna madaarroonnikkiti mitte haaro waamma no.

⁴²Fooliishshote Barrira qixxaabbanni noohuranna waammano mule noo daafira, Yesuusa hakkiicho madaartu.