Read Sidama_Qullaawa _Maxaafa YOHAANNISI 20 Bible Online

YOHAANNISI 20 - Sidama_Qullaawa _Maxaafa bible

YOHAANNISI 20

¹Sambatu barra soodo guto duu'mo saaqqukkinni Megidelitte Maariyaami Yesuusi waammawa martu. Hakkiira iillitanno woyite waamma tu'noonni kinchi waammate afiinni ho'le nooha affu.

²Kunnira, Simiooni Pheexiroosiwanna Yesuusi baxannohuwa wolu rosaanchiwa doddanni marte, «Mooticha waammate giddonni fushshite haadhino; mamiicho wortinoro diafoomma» yitu.

³Pheexiroosinna wolu rosaanchino waammanniwa ka'e martu.

⁴Lamunku mitteenni doddanni heedheenna, ku'u rosaanchi kayinni Pheexiroosi balaxe waammanniwa mare iilli.

⁵Heeshshi yee waammate giddora qole la"anno woyite, kafanu uddano afi. Isi kayinni giddora dieino.

⁶Simiooni Pheexiroosi hoodesi mare iille, waammate giddora ei. Isino hakkiicho noota kafanu uddano afi.

⁷Yesuusi umira xaanxoonni uddano, kafanunnitewiinni baxxite xaaxante ubbe noota afi.

⁸Waammanniwa balaxe mari rosaanchino waammate giddora ei. Isino lae ammani.

⁹Hakkuno: «Reyotenni ka"a hasiissannosi» yaannoha Maganu Qaale wodana assitinokkihuraati.

¹⁰Hakkunni gedensaanni lamenti rosaano galagalte mininsara higgu.

¹¹Megidelitte Maariyaami wi'litanni waammate gobbaanni uurrite no. Wi'litanni heedhe heeshshi yite waammate giddora qolte la'anno woyite,

¹²Yesuusi reeshsha worroonniwa lamu waajjo uddano uddidhino sokkaasine mittu umaalloonni mittu lekkaalloonni ofolte no.

¹³Insano Maariyaami, «Tee mancho, mayira wi'latta?» yituse. Iseno, «Mooticha'ya fushshite hiikka qoltinoro diafoomma» yitu.

¹⁴Hatto yite ka'e badhe higge caaqqi yite la'anno woyite, Yesuusi uurre nooha affu; iso ikkinota kayinni dibuuxxino.

¹⁵Yesuusi kayinni, «Tee mancho, mayira wi'latta? Aye hasidhanni nootta?» yee xa'mise. Iseno gate towaxxanni noo mancho laweennase, «Mooticha'ya, ati haa'roottoro, ballo worootto darga kulie; ani haa'reemmana» yitu.

¹⁶Yesuusino, «Maariyaami» yee woshshise. Iseno isi widira caaqqi yite Ibiraawootu afiinni, «Rabuuni» yitusi. Hatto yaa, «Rosiisaancho» yaate.

¹⁷Yesuusino, «Xaara Anni'yawa difuloommona amaddootie!» yiise. Qoleno, «Marte ka'e kayinni roduuwi'yara, ‹Ani galagale Anni'yawanna Anni'newa, Magani'yawanna Magani'newa ha'ranni noommo yiino› yite kulinsa!» yiise.

¹⁸Kunnira Megidelitte Maariyaami rosaanosiwa marte, Mooticha affinotanna isi yiinosereno kultunsa.

¹⁹Sambatu hawarro rosaanosi Ayihude waajjite cufana cufidhe mitto mine gamba yite no. Cufanu cufame hee'reenna Yesuusi rosaanosi gamba yite noowa daye mereeronsa uurre, «Keeru ki'ne ledo hee'ro!» yiinsa.

²⁰Hatto yee kae midaadosinna angasi leellishinsa. Rosaano Mooticha affe lowo geeshsha hagiidhitu.

²¹Yesuusi xaano lede, «Keeru ki'ne ledo hee'ro. Anni'ya ane soyie gede, anino ki'ne soyemmo'ne» yiinsa.

²²Hatto yiihu gedensaanni aanansa foolesi ufuufe, «Qullaawa Ayyaana adhe.

²³Cubbonsa agurtinanninsarira, cubbonsa agurranninsa. Ki'ne agura hoogginiro kayinni, diagurranninsa» yiinsa.

²⁴Yesuusi rosaanosiwa maranno woyite, tonaa lamu giddonni mittu Didimoosi yinannihu Toomaasi ledonsa dino.

²⁵Kunnira wole rosaano Toomaasira, «Mooticha anfummowe» yite kultusi. Isi kayinni, «Misimaaretenni qansoonnita angasi laummokkinni, qubbicho'ya angasi madara worummokkinninna anga'yano midaadisi madara wore laummokkinni diammaneemmo» yii.

²⁶Mitte lamala gedensaannino rosaanosi mitto mine gamba yite no. Toomaasino ledonsa no. Cufanu cufame hee'reenna Yesuusi daye mereeronsa uurre, «Keeru ki'ne ledo hee'ro!» yiinsa.

²⁷Hakkunni gedensaanni Toomaasi woshshe, «Qubbichokki kawa abbite anga'ya lai; angakki abbite midaadi'ya giddo worte lai. Huluullama agurte ammani!» yiisi.

²⁸Toomaasino, «Mooticha'ya! Magano'ya!» yii.

²⁹Yesuusi Toomaasira, «Ati laoottoe daafira ammanootto; la'uekkinni ammantannori maassantinoreeti» yii.

³⁰Yesuusi tenne borro giddo borreessinoonnikkita wole lowo maalale rosaanosi affanna loosino.

³¹Ikkirono, Yesuusi Kiristoosi Maganu Beetto ikkinota ammantinanni gedenna ammantine isi su'minni hegere heeshsho afidhinanni gede konne borreessinoonni.