Read Sidama_Qullaawa _Maxaafa YOHAANNISI 3 Bible Online

YOHAANNISI 3 - Sidama_Qullaawa _Maxaafa bible

YOHAANNISI 3

¹Farisootu gaamo giddo Niqoodimoosi yinannihu mittu Ayihudete gashshaanchi no.

²Kuni manchi hashsha Yesuusiwa daye, «Rosiisaancho'ya, Maganu ledo hee'ra hoogiro tenne ati assatto maalale asse afannohu mittuno dino. Kunnira, ati Maganuwiinni dayotto rosiisaancho ikkoottota anfoommo» yii.

³Yesuusino qole, «Halaale kuleemmohena, mannu layinkimeeshsho ilama hoogiro Maganu gashshoote la"a didandaanno» yiisi.

⁴Niqoodimoosino, «Mannu geedhihu gedensaanni galagale ilamannoni? Layinkimeeshsho amate godowi giddora hige ilama dandaannoni?» yee xa'mi.

⁵Yesuusino, «Halaale kuleemmohena, mannu wayinninna Qullaawu Ayyaaninni ilama hoogiro, Maganu gashshoote ea didandaanno.

⁶Mannunni ilamannohu mannaho; Ayyaanunni ilamannohu kayinni ayyaanaamoho.

⁷Kunni daafira, ‹Layinkimeeshsho ilama hasiissanno'ne› yoommoti dhagge ikkitoonkehe.

⁸Bubbe baxxu widira bubbissanno; luulo macciishshatto; maminni daggannoronna mamira hadhannoro kayinni diafatto. Ayyaanunni ilaminohu baalu hattooti» yiisi.

⁹Niqoodimoosino, «Kuni hiitto ikke ikkanno?» yee xa'mi.

¹⁰Yesuusi, «Ati Israeelete rosiisaancho ikkite heedhe konne coye diafootto?

¹¹Halaale kuleemmohena, anfoommore kulleemmo; la'noommore farci'neemmo; ki'ne kayinni farci'ranke diadhitinanni.

¹²Baattote aani coye kulleenna ammana hoogginiro, gordu coye kulleenna maminni ammantinanni?

¹³Gordunni dirrinoha Manchi Beetto agurranna gordu iimira fulinohu wolu dino» yii.

¹⁴Muse halalla hamashsho sutinte gede, Manchi Beettino hatto ikke sutama hasiissinosi.

¹⁵Hatto ikkannohu, iso amma'nannohu baalu hegere heeshsho afi'ranno gedeeti.

¹⁶Kunni garinni Maganu baattote aana noo manna baala baxino daafira, iso amma'ninohu baalu hegere heeshsho afi'ranno gede ikkinnina ba"annokki gede, Maganu mitto Beettosi uyino.

¹⁷Maganu beettosi soyinohu baattote aana noo mannira busha yoo yaate ikkikkinni gatisate yeeti.

¹⁸Iso amma'nannohura busha yoo diyinannisi; iso amma'nannokkihura kayinni mitto Maganu Beetto amma'nannokki daafira busha yoo yineennasi no.

¹⁹Yinoonni yoono: Xawaabbu tenne alame dayino; mannu kayinni loosisi busha ikkinohura xawaabbunkunni roore tunsicho baxino.

²⁰Busha looso loosannohu baalu xawaabba giwanno. Bushu loosisi leellannota afe, xawaabbunniwa didaanno.

²¹Halaale loosannohu kayinni xawaabbunniwa daanno. Xawaabbunniwa daannohuno loosanno loosi Maganu hajajo garinni ikkinota anfanni gedeeti.

²²Hakkunni gedensaanni Yesuusinna rosaanosi Yihudu gobba hadhu. Hakkiicho cuuanni insa ledo shiima yanna keeshshi.

²³Yohaannisi qole lowo wayi noowa Saalemi mule Anooni yinanni darga cuui. Mannuno isiwa daye cuuami.

²⁴Hatte yannara Yohaannisi usuru minira dieino.

²⁵Kunnira, Yohaannisi rosaanonna mittu Ayihudichi [3] keeraa'mate seeri daafira xa'mantu.

²⁶Yohaannisi rosaano Yohaannisiwa marte, «Rosiisaancho, Yordaanoosira widoonni tenne ate ledo noohu ati isire farci'rittohu manna cuuanni no; mannu baaluno isiwa maranni no» yitu.

²⁷Yohaannisino, «Mannu Maganu uyisikkinni mittorichono diafi'ranno.

²⁸‹Ane alba qollella sonkoonnieta ikkinnina, Kiristoosi ane di"ikkoommo› yee kuloommo'neta ki'nenni affinoonni.

²⁹Idayicho noosihu adhannoho; albisu kayinni adhannohu mule uurre huurosi macciishshe hagiidhanno. Kunnira, ane hagiirrino xa wo'mino.

³⁰Isi rooriidiha ikkeenna, ani kayinni hooffayidiha ikka hasiissannoe» yii.

³¹Ledeno, «Gordunni daannohu wo'munkura aliidiho; uullate aanihu uullaho; uullare coyi'ranno; gordunni daannohu kayinni wo'munkura aliidiho.

³²Isi lainorenna macciishshinore farci'ranno. Ikkollana isi farci'rinore adhannohu dino.

³³Isi farci'rinore adhannohu kayinni, Maganu halaalaancho ikkinota buuxanno.

³⁴Maganu Ayyaanasi qircikkinni aannosi daafira, Maganu soyinohu Maganu qaale coyi'ranno.

³⁵Annu Beettosi baxanno; wo'mankareno angasi worino.

³⁶Beettosi amma'ninohura hegere heeshsho noosi. Beettosi amma'ninokkihura kayinni, Maganu hanqi aanasi hee'ranno ikkinnina heeshsho diafi'ranno» yii.