Read Sidama_Qullaawa _Maxaafa YOHAANNISI 8 Bible Online

YOHAANNISI 8 - Sidama_Qullaawa _Maxaafa bible

YOHAANNISI 8

¹[Yesuusi kayinni Ejedhete Ilaala ha'ri.

²Layinki soodo gute galagale Qullaawu Minira dayi. Mannu baaluno isiwa dayenna ofolle rosiisinsa.

³Muse Seeri rosiisaanonna Farisootu foortanna amaddino mancho haadhe abbite mannu mereero uurrissu.

⁴Yesuusira, «Rosiisaancho, tenne mancho foortanna amandoonni.

⁵Seerinke giddo Muse togoo mancho kinnatenni ganne shinanni gede hajajino. Ati ma yaattoyya?» yite xa'mitusi.

⁶Tenne xa'mo xa'mitinosihu, aanasi mite so'ro anfeemmo yiteeti. Yesuusi kayinni uulla heeshshi yee baattote aana qubbichunni borreessi.

⁷Marro marro higge xa'mituta heeshshi yiinowiinni gotti yee, «Ki'ne giddo cubbu nookkihu hee'riro, balaxe kinchunni ole gano!» yii.

⁸Xaano galagale heeshshi yee baattote aana borreessi.

⁹Insano konne coye macciishshite, geerrunni kayisse mittu mittunni fulte hakkiinni hadhu. Kunnira mereeroho uurrite noo mancho ledo Yesuusi callu gati.

¹⁰Yesuusino heeshshi yiinowiinni gotti yee, «Tee mancho, insa hiikkitu? Yoo yiihehu mittuno dinoni?» yee xa'mise.

¹¹Iseno, «Mooticha'ya, mittuno dino» yitu. Yesuusi qole, «Anino busha yoo diyeemmohena ha'ri; kunni ka'a cubbo loossooti!» yiise.][8]

¹²Qoleno Yesuusi, «Ani baattote aana noo mannira xawaabbaho; ane hoode ha'rannohu heeshshote xawaabba afi'ranno ikkinnina tunsichoho diha'ramanno» yii.

¹³Farisootu, «Ati umikki daafira farci'rootto; farci'rakki leddannori dinoote» yitu.

¹⁴Yesuusi qole, «Umi'ya daafirano farci'rummoro, hiikkiinni dayommoronna hiikka ha'reemmoro afoommo daafira, yoommori halaaleho. Ki'ne kayinni hiikkiinni dayommoronna hiikka ha'reemmoro diaffinoonni.

¹⁵Ki'ne mannu hedo garinni yoo yitinanni; ani ayerano busha yoo diyeemmo.

¹⁶Yoo yeemmohano ikkiro, ani calla'ya ikkoommokki daafira yoo'ya halaaleho; soyinoehu anni'ya ledo'ya no.

¹⁷Lamu manchi farci'riro ku'linoonni coyi halaale ikkannota seeri'ne giddo borreessineenna no.

¹⁸Kunnira, anere ani farci'reemmo; soyinoehu Anni'yano anere farci'ranno» yii.

¹⁹Insa qolte, «Annikki hiikko no?» yitu. Yesuusi, «Aneno anna'yano diegentinoonni. Ane egentinoommero Anna'yano egentinanni» yee qolinsa.

²⁰Yesuusi konne coye coyi'rinohu Qullaawa Mine woxe tunganni ogori mule rosiisanni hee'reeti. Yannasi iillitinokki daafira, mittuno angatenni dikisinosi.

²¹Xaano Yesuusi, «Ani ha'reemmo; ki'ne ane hasidhinanni; qoltineno cubbi'nenni reyitinanni; ani ha'reemmowano daggine diaffinanni» yiinsa.

²²Ayihudete gashshaano kayinni, «‹Ani ha'reemmowa ki'ne daggine diaffinanni› yaannohu isonoo shaa hasi'reeti ikka?» yitu.

²³Yesuusi lede, «Ki'ne uullanniiti; ani kayinni iiminniiti. Ki'ne tenne gobbareeti; ani kayinni tenne gobbaha di"ikkoommo.

²⁴Cubbi'nenni reyitinanni yoommohu kunniraati. Ane ewelumma affine ammana hoogginiro cubbi'nenni reyitinanni» yii.

²⁵Insano, «Ati ayeti?» yite xa'mitusi. Yesuusino, «Xaa geeshsha kulummo'ne aneeti.

²⁶Coyi'reemmorinna yeemmori ki'neri lowori nooe. Ikkollana soyinoehu halaalaanchoho. Ani tenne gobba mannira coyi'reemmorino isiwiinni macciishshoommoho» yee qolinsa.

²⁷Insa kayinni Annisire kulanni noonsata diaffino.

²⁸Kunnira Yesuusi, «Manchi Beetto suttinanni woyite Ani Ane ikkoommota affinanni. Anni'ya rosiisinoere ikkinnina, ani umi'ya wolqanni mittoreno asseemmokkita hatte yannara buuxxinanni.

²⁹Soyinoehu ane ledo no. Wo'manka woyite iso hagiirsiisannore asseemmo daafira calla'ya diagurannoe» yiinsa.

³⁰Yesuusi konne coye coyi'rita lowo manni ammani.

³¹Yesuusi iso ammantino Ayihudoota, «Rosiisoommo'ne coye agadhitiniro halaalenka rosaano'ya ikkitinanni.

³²Halaale affinanni; halaaluno borojjimmatenni fushshanno'ne» yiinsa.

³³Insa kayinni, «Ninke Abirihaami sirchooti; borojjimmate hiramme diegenninoommo; ati hiitto ‹Borojjimmatenni fultinanni› yaattonke?» yitu.

³⁴Yesuusi qole, «Halaale kuleemmo'nena, cubbo loosannohu baalu cubbu borojjichooti.

³⁵Borojjichu mini beetto di"ikkanno; illoonnihu kayinni geedote geeshsha minella hee'ranno.

³⁶Kunni daafira Beettu borojjimmatenni fushshi'nero, addintanni borojjimmatenni fultinanni.

³⁷Abirihaami sircho ikkitinoonnita afoommo; ikkollana, qaali'ya giddo'ne nookkihura, shitinaera hasidhinanni heedhinoonni.

³⁸Ani, Anni'ya leellishinoere coyi'reemmo; ki'neno anni'ne kulino'nere assitinanni» yiinsa.

³⁹Insa, «Anninke Abirihaamiiti» yituta, Yesuusi kayinni, «Abirihaami ooso ikkitinoommero Abirihaami assinore assitinanni.

⁴⁰Ani anni'yawiinni macciishshoommo halaale kuloommo'ne; ki'ne kayinni, shitinaera hasidhinanni. Abirihaami hattoo looso diloosino.

⁴¹Ki'ne anni'ne loosanno looso loossinanni» yiinsa. Insa qolte, «Ninke darchoho ilammoommore di"ikkinoommo. Noonke Anni Magano callaho» yitu.

⁴²Yesuusi lede, «Maganu Anna'ne ikkoommero, ane baxxinannie; ani Maganuwiinni daye konne noommo. Soyinoehuno isooti ikkinnina, ani umi'ya roorrenni didayommo.

⁴³Ani yeemmori mayira leella giwi'ne? Coyi'reemmore buuxa dandiitinannikki daafiraati.

⁴⁴Ki'ne anni'ne Daawuloosi oosooti. Anni'ne hedinore wonshitinara hasidhinanni. Isi bi're hundanni manna shiinoho. Halaalu isiwa hoongohura, halaalu ledo horonta xaadu dinosi. Isi kaphaanchonna kaphu anna ikkinohura, kapho coyi'ranno woyite rosinorella assanno.

⁴⁵Ani kayinni halaale coyi'reemmohura diammantinannie.

⁴⁶Ki'ne giddo ane, ‹Cubbaataamoho› yaannohu ayeti? Halaale coyi'rummona, mayira ammana gibbinieyya?

⁴⁷Maganunnihu Maganu yaannore macciishshanno. Ki'ne Maganu qaale macciishshitinannikkihu Maganunnire ikka hoogginoonnihuraati» yiinsa.

⁴⁸Ayihudootu, «Ati Samaarichaho; durriisuno noohe yaankera ninke digaraho?» yitu.

⁴⁹Yesuusino, «Anera durriisu dinoe. Ani Anna'ya ayirriseemmo; ki'ne kayinni ane shollishshinannie.

⁵⁰Ani umi'ya ayirrinye dihasi'reemmo; ayirrinyu hasiisannosihunna yoo yaannohu kayinni mittu no.

⁵¹Halaale kuleemmo'nena, qaale'ya agadhannohu horonta direyanno» yiinsa.

⁵²Ayihudootu, «Durriisu nooheta xa anfummo; Abirihaami reyino; himanaanono reyitino. Ati kayinni, ‹Qaale'ya agadhannohu horonta direyanno› yaatto.

⁵³Ati reyiha annanke Abirihaami rooratto? Himanaanono reyitino! Ati atenee ayeti yite hedatto?» yitu.

⁵⁴Yesuusi daware, «Ani umo'ya ayirrisummoro ledannori dino. Ane ayirrisannoehu Anna'yaati; isi ‹Maganonkeeti› yitinanniho.

⁵⁵Ikkollana ki'ne iso diaffinoonni; ani kayinni iso egennoommo. Ani iso diegennoommo yuummoro ki'nente gede kaphaancho ikka'yaati. Iso egennoommo; qaalesino agadheemmo.

⁵⁶Anni'ne Abirihaami ane barra lae hagiidhate halchino; afe kae hagiidhino» yiinsa.

⁵⁷Ayihude, «Atera ilamittonkunni 50 diro nafa di"ikkinohena, ‹Abirihaami afoommo› yaattonso?» yitu.

⁵⁸Yesuusino, «Halaale kuleemmo'nena, Abirihaami ilamara albaanni ani noommo» yii.

⁵⁹Kunnira Ayihudootu kinnatenni gantasira ka'u. Yesuusi kayinni insara leellikkinni Qullaawu Mininni fule ha'ri.